लुका 20 - पहाड़ी महासुई

यीशु रै हक्‍का माथी सवाल

¹ एकी दिनै इणौ हुऔ कि ज़ेबी यीशु परमेश्‍वरा रै घौरा दी लोगु लै शिक्षा दैंदै और खुशी री खौबर शुणाउंदै थौ लागौ औन्दौ, ता बौड़ै याजक, यहुदी शास्त्री, और स्याणै लोग यीशु काऐ आशै,

² और बोलदै लागै, “आमुकै बोल, तू इणै काम केज़ै हक्‍का कौरीऐ कौरा ई? और सेऊ कुण आ ज़ुणिऐ ताउंकै एऊ हक्क दैऔ आ?”

³ यीशुऐ बोलौ, “हाऊं भी तुमु कु एक सवाल पुछ़ाऊ, तुमै भी तेथरौ ज़वाब दैऔ,

⁴ यहुन्ना रौ बपतिस्मौ सौरगा री तौरफा कु थौ या आदमी री तौरफा कु थौ?”

⁵ तैबै सै आपु मांझ़िऐ चौपड़िंदै लागै, “अगर आमै बोलु लै परमेश्‍वरा री तौरफा कु दिआ थौ, तैबै इणीऐ बोलणौ आ इणौ कि, तुमुऐ तेस माथै विश्वास कैलै ना कियौ?”

⁶ अगर बोलु लै आमै आदमी री तौरफा कु तैबै ई लोग आमु ढोल़ीयावा, कैलैकि इऐ ज़ाणाई कि यहुन्ना भविष्यवक्ता थौ।

⁷ तैबै तिंउऐ यीशु लै ज़वाब दैऔ, “आमै नाईं ज़ाणदै कि सेऊ कासरी तौरफा कु थौ।”

⁸ यीशुऐ तिउंलै बोलौ, “हाऊं भी तुमुकै नाईं बोलदौ कि हाऊं एज़ौ काम केज़ै हक्‍का कौरीऐ कौराऊ।”

बुरै ज़िमदारु रौ औनैणौ

⁹ तैबै यीशुऐ लोगु कै एक औनैणौ दैऔ, “कि एकी आदमीऐ अंगुरा रौ बौगिच़ौ लाऔ, और तेथरौ ठेकौ ज़िमदारु कै देइयौ आपु डैऔ भौरी दिना लै परदेशा लै।

¹⁰ ज़ैबै अंगूर चोड़णै रौ बौगत आशौ ता तिणी मालिकै आपणौ एक नुकुर ज़िमदारु काऐ आपणै हिस्सै मांगदै भेज़ौ, पर तिऊं ज़िमदारुऐ सेऊ नुकुर पिटौ और तिदरु खाली हाथ भेज़ौ।

¹¹ तैबै तिणी मालिकै तौंइऐ एक नुकुर भेज़ौ, पर तिऊं ज़िमदारुऐ सेऊ भी पिटौ और तेसरी बेइज़्ज़ती कौरीयौ सेऊ भी खाली हाथ वापिस भेज़ौ।

¹² तैबै भेज़ौ तिणीऐ चिजौ नुकुर, तैबै तिंउऐ सेऊ भी पिटीयौ घायल कियौ और तिदरु पोरु गाड़ौ।

¹³ तैबै तिणी बौगिच़ै रै मालिकै आपणै ज़िवा दी सुंच़ौ, ‘आबै हाऊं का कौरुलै? आबै हाऊं आपणौ गौरतौ छ़ोहरु भेज़ाऊ, हुई सौका कि सै तेसरी इज़्ज़त कौरा।’

¹⁴ पर ज़ेबी तिऊं ज़िमदारुऐ सेऊ मालिका रौ छ़ोहरु देखौ ता सै आपु मांझ़िऐ चौपड़िंदै लागै, कि एऊ ता एस बौगिच़ै रौ हक्कदार आ। आशौ आमै एस पोरु झ़ांगी ई, ताकी एऊ बौगिच़ौ आमारौ हुआ।

¹⁵ तैबै तिऊं ज़िमदारुऐ सेऊ मालिका रौ छ़ोहरु बौगिच़ै कु बाइरै गाड़ीयौ पोरु झ़ांगौ। आबै सेऊ मालिक तिऊं ज़िमदारु आइलै का कौरा?

¹⁶ आशीयौ तिऊं ज़िमदारु पोरु झ़ांगा और अंगुरा रौ बौगिच़ौ ओरी लोगु कै सौंभाल़ा। इणै शुणियौ लोगुऐ बोलौ, परमेश्‍वर कौरा, कि इणौ केबी ना च़ांई हुऔ।”

¹⁷ यीशुऐ तिऊं लोगु भिलै देखीयौ बोलौ, तैबै एऊ का सा लिखौ औन्दौ, “कि ज़ेज़ौ पात्थर घौरा चाणनै वाल़ै मिस्त्रीउऐ बेकार ज़ाणियौ पोरु शोटी गौ थौ, सेज़ौ पात्थर कुणे दी लागणै वाल़ौ बौणौ।

¹⁸ ज़ुण-कुण तेस पात्थरा माथै लोटालौ सेऊ च़ूर-च़ूर हुआ, और ज़ास माथै पौड़ालौ सेऊ पात्थर सेऊ पिशीया पोरु पा।”

कैसरा लै मामलौ दैणै

¹⁹ यहुदी शास्त्रिउऐ और बौड़ै याजकुऐ ज़िणी ई एऊ औनैणौ शुणौ, ता तिंउऐ यीशु पाकुड़नौ च़ाऔ कैलैकि सै सौमझ़ी गौऐ थै कि एऊ औनैणौ आमुलै बोलौ आ, पर सै लोगु कु डौरा थै।

²⁰ और सै एज़ै मौकै देखदै लागै कि, केबड़ी एऊ इणी बूश बोला, कि ज़ेज़ी बुशा दी एस फसाइयौ पाकड़िलै। इणै कामा लै तिंउऐ आपणै दुई गुप्त आदमी भेज़ै तिंउरै भेषा दी।

²¹ तिंउऐ यीशु कु पुछ़ौ, “ओ गुरु आमै ज़ाणी कि तू बिल्कुल ठीक बोलाई और शिखावा ई, और कासी रौ पक्ष भी नाईं कौरदौ। तुमै सौच़्च़ाई कौरीऐ परमेश्‍वरा री बाट देखाल़ाई।”

²² तुमै इणौ बोलौ, का कैसर राज़ै लै मामलै दैणै रौ हक्क आमुकै आसती कि नाईं?

²³ यीशुऐ तिउंरी च़ालाकी सौमझ़ी गोई, और तिउंलै बोलौ,

²⁴ “मुकै एक सिक्कौ (एक दिनार) देखाल़ौ और बोलौ, एस सिक्के दी कासरौ नाऊं और फोटु आ छ़ापौ औन्दौ? तिंउऐ बोलौ रोमी बौड़ै राज़ै रौ।”

²⁵ यीशुऐ बोलौ, “तैबै ठीक आ, ज़ो कैसर राज़ै रौ आ तेस कैसर राज़ै कै दैऔ, पर ज़ो परमेश्‍वरा रौ आ तेस सिरफ परमेश्‍वरा लै दैऔ।”

²⁶ सै लोगु रै सामनै एज़ी बुशा दी यीशु पाकड़ी ना बौल़ै, और तेसरै ज़वाबा शुणियौ च़ुटुकच़ार थाकै।

दुजी बारै पैदौ हुणौ और शादी

²⁷ तैबै सदुकी लोग ज़ो इणौ माना ई कि ज़ुण मौरा ई सै ज़िउंदै नाईं हुंदै, तिऊं मांझ़िऐ कु कुछ़ लोगुऐ यीशु काऐ आशीयौ पुछ़ौ,

²⁸ “ओ गुरु, मुसा भविष्यवक्तुऐ आमुलै इणौ लिखौ आ, कि अगर कासरौ भाई, शादी-शुदा औइयौ बिण औलादीऐ मौरा लौ, ता तेसरौ भाई तेसरी छ़ेउड़ी आइलै शादी कौरालौ, और आपणै भाई कालै वंश पैदौ कौरा।”

²⁹ सात भाई थै, पैहलौ भाई शादी कौरीयौ बिणा औलादीऐ मौरी गौ आ,

³⁰ तैबै दुजै भाईऐ तिंया विधवा आइलै शादी की पर सेऊ भी बिणा औलादीऐ मौरी गौ,

³¹ तैबै एक-एक कौरीऐ सारै भाईउऐ तिऐं विधवा आइलै शादी की और सारै बिणा औलादीऐ मौरी गौऐ।

³² और बासिऐ सै विधवा भी मौरी पोरु?

³³ आबै आमु आइलै इणौ बोलौ, “ज़ैबै सै सारै ज़िउंदै औलै ता, तिंया लै कासरी छ़ेउड़ी बोलाई? कैलैकि तिऊं साता भाईऊ ऐ तिंया आइलै शादी की थी?”

³⁴ यीशुऐ तिऊं लै ज़वाब दैऔ, “शादी ता इऐं धौतरी माथै लोगु लै औआ ई।

³⁵ पर आशणै वाल़ै बौगतै, इणौ कुछ़ ना हुन्दौ। कैलैकि ज़ो मौरै औन्दै मांझ़िया कु ज़िउंदै हुणै लायक लोग ई। सेज़ै जुगा दी तिऐ ना ता आदमी शादी कौरदै और ना छ़ेउड़ी शादी लै दैंदै।

³⁶ और सै तेथ बासिऐ केबी ना मौरदै। कैलैकि सै सौरगदूता बाशीऐ हुणै ई। ज़िउंदै हुइयौ तिउंलै परमेश्‍वरा री सन्तान बोलाई।

³⁷ पर मौरै औन्दै ज़िउंदै हुआई कि नाईं, एथरै बारै दी शुणौ। मुसा भविष्यवक्तुऐ भी इऐ बुशै साबित की आ, ज़ैबै तिणीऐ तिऊं झ़ाढ़ी रै बारै दी लिखौ ज़ो तिणीऐ परमेश्‍वरा री बौरसाई ऐन्दी आगी कौरी ज़ौल़दै देखी आ। और मुसा भविष्यवक्ता अब्राहमा रौ परमेश्‍वर, इसहाक और याकुबा रौ परमेश्‍वरा कौरीऐ औटावा थौ, ज़ो कई साल पैहलै मौरी गौऐ थै।

³⁸ और सेऊ ज़िउंदै रौ परमेश्‍वर आ, मौरै औन्देऊ रौ नाईं भी नाईं। परमेश्‍वरा आइलै सै सारै ज़िउंदै ई।”

³⁹ तिऐ मौज़ूद यहुदी शास्त्रिउ मांझ़िया कु काइएउऐ बोलौ, “गुरुजी तुमुऐ ठीक बोलौ।

⁴⁰ तेथ बासिऐ कासी री भी प्रभु यीशु कु केज़ी बूश पूछ़णे री हिम्मत नाईं रौई।”

मसीह कासरौ छ़ोहरु आ?

⁴¹ तैबै यीशुऐ तिऊंकु पुछ़ौ, “मसीही लै दाऊदा री सन्तान कैलै बोलाई?”

⁴² कैलैकि दाऊदै आपु भजन सहिंता री किताबी दी बोलौ आ, “प्रभुऐ मैरै प्रभु लै बोलौ”

⁴³ मेरी सुल़टी भिलै बोश, “ज़ेबी झ़ांऊ हाऊं तैरै दुश्मनु तेरी लाता थालै ना कौरु।”

⁴⁴ दाऊद ता तेसलै प्रभु बोला आ। तैबै मसीह दाऊदा री सन्तान किणौ हुई सौका?

शास्त्रिउ कु बौच़ियौ रौएऊ

⁴⁵ ज़ेबी सारै लोग बुशै शुणदै थै लागै औन्दै, तेबी यीशुऐ आपणै च़ेलेऊ लै बोलौ,

⁴⁶ “इऊं यहुदी शास्त्रिउ कु बौच़ियौ रौएऊ। ज़ासकै लाम्बै-लाम्बै जुड़कै भिड़ीयौ घुमणौ आच़्छ़ौ लागा सा। ज़ेबी सै बज़ारा दी घुमाई तिउंकै आच़्छ़ौ लागा कि लोग तिऊं कै झुकियौ ढाल कौरा। आराधनालय और ज़िऐ धाम दिआई तिऐ भी सै च़ाहा ई कि आमु आच़्छ़ी और पैहली ज़ागाह दी बोशाल़ा तिऐ तिउंकै आच़्छ़ौ लागा आ।

⁴⁷ पर सै विधवा छ़ेउड़ी रै घौर-बार लुटा ई और देखाउणा लै सै काफी बौगता झ़ांऊ प्राथना कौरा ई। इणै लोग भौरी बौड़ी सौज़ा पा ई।”