लुका 19 - पहाड़ी महासुई

मामलै निणै वाल़ौ जक्कई

¹ यीशु यरीहो इलाकै बाटीऐ थौ डेउंदै लागौ औन्दौ।

² तिऐ जक्कई नावां रौ एक आदमी थौ ज़ुण मामलै निणै वाल़ेऊ रौ मुख्यौ थौ और सेऊ बौड़ौ सेठ थौ।

³ सेऊ यीशु देखणे री कोशिश थौ लागौ औन्दौ कौरदै कि सेऊ कुण आ पर भीड़ा री वज़ाह कु सेऊ यीशु नाईं देखी बौल़ौ कैलैकि सेऊ कौदा रौ छ़ोटौ थौ।

⁴ तैबै यीशु देखणा लै सेऊ भीड़ा कु औगाड़िऐ फेटा मारीयौ डैऔ और एक गुलरा रै पेड़ा दी च़ौड़ौ कैलैकि यीशु सेज़ी बाटा दी डेउणै वाल़ौ थौ।

⁵ ज़ैबै यीशु तेस पेड़ा काऐ पौउंच़ौ, तैबै उपरै देखीयौ तेस जक्कई लै बोलौ, “ओ जक्कई फेटी धौनी उतुर कैलैकि आज़ मुंइऐ तैरै घौरा कै रौइणौ आ।”

⁶ जक्कई फेटी उतरौ, और यीशु खुशी कौरीऐ आपणै घौरै नियौं।

⁷ इणै देखीयौ सारै लोग आपु मांझ़िऐ गुणमुणांइयौ बोलदै लागै, “यीशु ता पापी आदमी रै काऐ पा डेई गौ आ।”

⁸ ज़ेबी सै रोटी खांदै थै लागै औन्दै ता जक्कई खौड़ौ उठौ और यीशु लै बोलदै लागौ, “ओ प्रभु हाऊं आपणी आधी ज़यदाद गरीबु लै दिआऊ और अगर मुंइऐ कासी कु भी धोखै देइयौ ज़ादौ मामलौ निऔं आ तेसकै हाऊं च़ार गुणौ वापिस दिआऊ।”

⁹ यीशुऐ तेसलै बोलौ, “आज़ एस घौरा दी छ़ुटकारौ हुई आ कैलैकि एऊ आदमी भी अब्राहमा रै वंशा रौ आ।

¹⁰ कैलैकि हाऊं आदमी रौ छ़ोहरु इणै लोगु ज़ो परमेश्‍वरा कु दूर पापा दी ई डुबै औन्दै तिऊं लोड़दै और सौदा री मौउता कु बौच़ाउंदे ऊ आशौ औन्दौ।”

दस मुहरी (तोड़ैऊ) रौ औनैणौ

¹¹ ज़ैबै लोग इऊं बुशु शुणदै थै लागै औन्दै तैबै यीशुऐ एक औनैणै देइयौ बोलौ, “कैलैकि सेऊ यरुशलेम रै नज़दीक थौ, और लोग सौमझ़ा थै कि परमेश्‍वरा रौ राज़ शिगरी पौगड़ौ हुणौ आ।

¹² एथीलै यीशुऐ बोलौ, ‘एक सेठ आदमी दूर देशा लै डैऔ ताकी सेऊ राज़ै रौ हक्क पाइयौ वापिस आशा।

¹³ तैबै तिणीऐ आपणै नुकरा मांझ़िया कु दस नुकुर औटाऐ, और तिउंकै दस शर्फी मुहरै देइयौ तिउंलै बोलौ, मैरै आशणै झ़ांऊ एथरौ लेण-देण कौरेऊ।’

¹⁴ और तेस सेठा रै इलाकै रै लोग तेस आइलै दुश्मनी छ़ाड़ा थै, तैबै तिंउऐ तेस सेठा पिछ़ु आपणै कुछ़ दूत खौबरी कौरी भेज़ौ कि आमै नाईं च़ांअदै कि एऊ आदमी आमु माथै राज़ कौरा।

¹⁵ ज़ैबै सेऊ आपणै राज़ा रौ हक्क पाइयौ वापिस आशौ तैबै तिणीऐ आपणै नुकुर औटाऐ ज़ासकै तिणीऐ शर्फी मुहरै थी देई ऐन्दी, ताकी सेऊ तिऊंकु लेण-देणा रै बारै दी पौतौ कौरा कि तिंउऐ का-का कौमाऔ आ?

¹⁶ तैबै पैहलै नुकरै बोलौ, ‘मालिक तेरी देई ऐन्दी शर्फी मुहरी माथै मुंइऐ दस औज़ौ कौमाई।’

¹⁷ तिणी सेठै तेस नुकरा लै बोलौ, ‘ओ मैरै सौभी कु आच़्छ़ै नुकुर शाबाश’ तू भौरी थोड़ै दी भी विश्वास वाल़ौ निकल़ौ ई आबै तू दस इलाकै माथै राज़ कर।

¹⁸ तैबै दुजै नुकरै भी आशीयौ बोलौ, मुंइऐ तेरी शर्फी मुहरी कौरी पांज़ औज़ौ कौमाई।

¹⁹ तिणी सेठै तेसलै भी बोलौ ‘शाबाश’ तू भी पांज़ इलाकै माथै राज़ कर।

²⁰ चिजै नुकरै भी आशीयौ बोलौ, ओ मालिक तेरी देई ऐन्दी शर्फी मुहर इदै आ, ज़ो मैरै च़ादरु रै धुरै दी थी बानियौ छ़ाड़ी ऐन्दी।

²¹ हाऊं ताऊं कु भौरी डौरा थौ कैलैकि तू काठौ आदमी ई ज़ियै तैरौ नाईं आ तिदरु भी तू निंआई ज़ो तू नाईं बौइंदौ तेस भी तू लौआ ई।

²² सेठै तेसलै बोलौ, ओ दुष्ट नुकुर हाऊं तैरै मुआं कौरीऐ ताऊं आरोपी चाणाऊ, ज़ैबै तू ज़ाणा थौ कि हाऊं काठौ लोगु ज़ो मैरौ नाईं आ तेस हाऊं च़ुंगाऊ और ज़ो हाऊं नाईं बौइंदौ तेस हाऊं लौआऊ।

²³ तैबै ताऐं मेरी शर्फी मुहरै ब्याज़ा माथै कैलै ना देई ताकी ज़ेबी हाऊं आशा थौ ता तेबी सित ब्याज़ै निआं थौ।

²⁴ तिणी सेठै तिउंलै बोलौ ज़ो तिऐ खौड़ै थै, इऐं शर्फी मुहरै एसकु ओरु छ़ुड़ाऔ और तेसकै दैऔ ज़ासकै दस शर्फी मुहरै ई।

²⁵ तिंउऐ तेस सेठा लै बोलौ, ओ मालिक तेसकै ता ई आसती दस शर्फी मुहरै।

²⁶ हाऊं तुमुलै बोलाऊ, ज़ासकै आसती आ और सेऊ ठीक ढौंगारौ बौरता लौ तेसकै औज़ौ मिला। ज़ुण ठीक ढौंगारौ ना बौरता लौ तेसकु सेऊ भी ओरु निंईआ सा ज़ो तेसकै औलौ।

²⁷ पर मैरै तिऊं दुश्मना ज़ो नाईं च़ाहा थै कि हाऊं तिऊंरौ राज़ौ बौणु, तिऊं इदै मुकाऐ आणियौ पोरु झ़ांगौ।”

यरुशलेम दी ज़ीत आशणी

²⁸ इऊं बुशै बोलीयौ यीशु आपणै च़ेलेऊ आइलै यरुशलेम लै तिऊं सौभीऊ कु औगाड़िऐ आण्डदै लागौ।

²⁹ ज़ैबै सै जैतून नावां री पहाड़ी काऐ पौउंच़ै तिऐ बैतफगै और बेतनियाह नावां रै दुई गाऊं थै। तैबै यीशुऐ च़ेलेऊ मांझ़िया कु दुई च़ेलै इणै बोलीयौ भेज़ै कि,

³⁰ आपणै सामनै वाल़ै गांवा दी डैऔ, तिऐ पौउंच़िऔ तुमुकै एक गौधेटु मिला खुंटी दी बानौ औन्दौ। ज़ास माथै इबी झ़ांऊ कोई ना बोशौ, तेस खोलियौ ओरु आणेऊ।

³¹ अगर तुमु कु कुण पुछ़ा लौ कि एस कैलै खोलाई? तैबै तुमै बोलेऊ प्रभु कै एसरी ज़ुरत आ।

³² ज़ो च़ेलै यीशुऐ भेज़ै औन्दै थै तिंउऐ तिऐ डेइयौ तिणौ देखौ ज़िणौ यीशुऐ तिउंलै बोलौ थौ।

³³ ज़ैबै सै च़ेलै गौधेटु खोलदै लागै तैबै तेसरै मालिकुऐ तिऊं लै बोलौ, एस गौधेटु कैलै खोलाई?

³⁴ तिंउऐ बोलौ प्रभु कै एसरी ज़ुरत आ।

³⁵ तैबै च़ेलेउऐ सेऊ गौधेटु खोलियौ यीशु काऐ आणौ और तेस माथै आपणै जुड़कै पाइयौ यीशु तेस माथै बोशाल़ौ।

³⁶ ज़ैबै यीशु आण्डदै लागौ तैबै लोग आपणै जुड़कै बाटा दी बिछ़ाऊंदै लागै, यीशु रै स्वागता लै। यीशु रौ स्वागत

³⁷ ज़ैबै यीशु जैतून पहाड़ी री उतराई दी पौउंच़ौ, तैबै च़ेलेऊ री सारी भीड़ यीशु रै सारै शक्ति वाल़ै कामा देखीयौ खुश हुऐ और परमेश्‍वरा री बौड़ाई कौरदै लागै।

³⁸ “भौलौ सेऊ राज़ौ ज़ुण प्रभु रै नावां दी आशा आ, सौरगा दी शान्ति और परमेश्‍वरा री बौड़ाई हो।

³⁹ तैबै भीड़ा मांझ़िया कु कुछ़ फरीसी लोगुऐ यीशु लै बोलौ, ‘ओ गुरु, आपणै च़ेलेऊ धौमकाऊ कि च़ुटुक थाका।’

⁴⁰ यीशुऐ ज़वाब दैऔ, ‘हाऊं तुमुलै बोलाऊ अगर इऐ लोग च़ुटुक थाका लै तैबै ढोल़ च़िलांदै लागा।’ ”

यरुशलेम लै लेरणौ

⁴¹ “ज़ैबै यीशु यरुशलेम रै नज़दीक पौउंच़ौ तैबै यीशु यरुशलेम शहरा देखीयौ लेरौ।

⁴² और बोलौ, केती भौलौ औआ थौ कि तू, ओ तू ई, आज़कै दिना री शान्ति री बुशै ज़ाणा थौ। पर आबै इऐ बुशै तेरी नौज़री कु च़ोरुई गोई।

⁴³ कैलैकि ताऊं माथै इणै दीन आशणै ई कि तैरै दुश्मना कौठै हुइयौ ताऊं च़ारौ तौरफा कु घेरीयौ दबाउआ ई।

⁴⁴ ताऊं और तैरै लोल़डै ज़ो ताऊं भितै ई माटै दी मिलावा ई ताऊं दी पात्थरा माथै पात्थर भी ना छ़ाड़णै, कैलैकि ताऐं सेज़ौ मौकौ नाईं रवावौ ज़ेबी परमेश्‍वरै मसीह तुमु बौच़ाउणा लै भेज़ौ थौ।”

परमेश्‍वरा रै घौरा कु सामाना बेच़णै वाल़ै गाड़नै

⁴⁵ तैबै यीशु परमेश्‍वरा रै घौरा दी डैऔ और समान बेच़णै वाल़ै बाइरै भौगाऐ। यीशु परमेश्‍वरा रै घौरा दी

⁴⁶ और बोलौ, “पवित्रशास्त्रा दी इणौ आ लिखौ औन्दौ कि मैरौ घौर प्राथना कौरणै रौ घौर आ। पर तुमुऐ ता एऊ लुटणै वाल़ेऊ रौ आड्डौ चाणी गौ आ।”

⁴⁷ यीशु रोज़ परमेश्‍वरा रै घौरा दी लोगु लै शिक्षा दिआ थौ। पर बौड़ै याजक यहुदी शास्त्री और लोगु रै बौड़ै नेतै यीशु झ़ांगणै रौ मौकौ लोड़ा थै।

⁴⁸ पर तिउंकै यीशु झ़ांगणै रौ कोई मौकौ ना मिलौ कैलैकि सारै लोग यीशु री बुशै बौड़ै ध्याना कौरी शुणा थै।