लुका 18 - पहाड़ी महासुई

अधर्मी फैसलै कौरणै वाल़ौ और बिधवा रौ औनैणौ

¹ तैबै यीशुऐ आपणै च़ेलेऊ कै एथरै बारै दी औनैणौ दैऔ कि आमु रोज़ प्राथना कौरणी और हिम्मत च़ांई छ़ाड़णी।

² एकी इलाकै दी एक फैसलौ कौरणै वाल़ौ रौआ थौ, ज़ुण ना परमेश्‍वरा कु डौरा थौ और ना कासी आदमी री परवाह कौरा थौ।

³ सेज़ै इलाकै दी एक विधवा भी रौआ थी ज़ो तेस फैसलै कौरणै वाल़ै काऐ घौड़ी-घौड़ीऐ आशीयौ बोला थी, मैरौ फैसलौ कर और मुं मैरै दुश्मना कु बौच़ाऊ।

⁴ काफी बौगता झ़ांऊ ता तिणीऐ तिंआरी कौन्थशुणी की पर आखरी दी तिणीऐ आपणै ज़िवा दी विच़ार कियौ कि ना ता हाऊं परमेश्‍वरा कु डौरदौ और ना कासी आदमी री परवाह कौरदौ।

⁵ तैबै भी इऐ विधवा मुं रोज़ आशीयौ तंग कौरा, आबै हाऊं इऐं विधवा लै फैसलौ दिलावाऊ। केशी इणौ ना च़ांई हुऔ कि इऐ घौड़ी-घौड़ीऐ आशीयौ मुं भौरी परेशान कौरा।

⁶ प्रभु यीशुऐ बोलौ, “शुणौ, एऊ बुरौ फैसलै कौरणै वाल़ौ का बोला आ?

⁷ तैबै का परमेश्‍वर आपणै च़ुनै औन्दै लोगु रौ फैसलौ नाईं कौरालौ? ज़ुण राच दीन तेसकु प्राथना कौरा ई? का परमेश्‍वर आपणै लोगु लै बेर पा?

⁸ हाऊं तुमुलै बोलाऊ परमेश्‍वर आपणै लोगु रौ फैसलौ फेटी कौरा! तैबै भी पर ज़ेबी हाऊं आदमी रौ छ़ोहरु आशु लौ, ता तेबी धौतरी केती लोग हुणै ई ज़ो मुं माथै विश्वास कौरा ई?”

फरीसी और मामलै निणै वाल़ै रौ औनैणौ

⁹ ज़ुण आपुलै धौर्मी बौणा थै और दुजै लोगु सौमझ़ा थै बेकार तिउंलै यीशुऐ एज़ौ औनैणौ दैऔ कि,

¹⁰ “दुई आदमी परमेश्‍वरा रै घौरा दी प्राथना कौरदै डेवै, एक थौ फरीसी दुजौ थौ मामलै निणै वाल़ौ,

¹¹ फरीसी आपणै मौना दी इणी प्राथना कौरदै लागौ कि, ‘ओ परमेश्‍वर, हाऊं तैरौ धन्यबाद कौराऊ कि हाऊं दुजै लोगु ज़िणौ डाकु, ठौगणै वाल़ौ और गान्दै काम कौरणै वाल़ौ नाईं आसतौ, और ना एस मामलै निणै वाल़ै ज़िणौ आसतौ ज़ो इदै आ।’

¹² हाऊं हफ्ते दी दुई बारै ब्रौत छ़ाड़ाऊ, और हाऊं आपणी सारी कौमाई रौ दसवौ हिस्सौ भी दिआऊ।

¹³ पर मामलै निणै वाल़ै दूर खौड़ी हुइयौ सौरगा भिलै देखणौ भी ना च़ाऔ, और आपणै हिकड़ै पिटी-पिटीऔ बोलदै लागौ, ‘ओ परमेश्‍वर’ मुं पापी माथै दया कर।

¹⁴ तैबै यीशुऐ बोलौ, ‘हाऊं तुमुलै बोलाऊ, कि सेऊ फरीसी नाईं बल्कि एऊ मामलै निणै वाल़ौ आदमी परमेश्‍वरा री नौज़री दी धौर्मी बौणीयौ आपणै घौरै डैऔ आ, कैलैकि ज़ुण आपुलै बौड़ौ बौणा लौ सेऊ छ़ोटौ बौणनौ आ।’ और ज़ुण बौणा लौ आपुलै छ़ोटौ सेऊ बौणनौ आ बौड़ौ।”

छ़ोहरु लै आशीर्वाद

¹⁵ तैबै लोग आपणै लोल़डेऊ भी यीशु काऐ लागै आणदै ताकी यीशु तिऊं माथै हाथ छ़ाड़ा, पर च़ेलै लागै तिऊं धौमकाउंदै।

¹⁶ यीशुऐ लोल़डै आपु काऐ औटाऐ और बोलौ, “लोल़डेऊ मुं काऐ आशणै दैऔ, इऊं नाईं रोकौ कैलैकि परमेश्‍वरा रौ राज़ इणेऊ ज़िणौ आ।

¹⁷ हाऊं तुमुलै सौच़्च़ौ बोलाऊ ज़ुण परमेश्‍वरा रौ राज़ इऊं लोल़डेऊ ज़िणौ नाईं माना लौ सेऊ परमेश्‍वरा रै राज़ा दी केबी भी नाईं डेई बौल़दौ।”

सेठ आदमी और सौदा री ज़िन्दगी

¹⁸ तैबै यहुदिऊ रै एक मुख्यै यीशु कु पुछ़ौ, “ओ महान गुरु, ‘सौदा री ज़िन्दगी पाइणा लै हाऊं का कौरु?’

¹⁹ यीशुऐ तेसलै बोलौ, ‘तू मुलै सारेऊ कु भौलौ कैलै बोलाई?’ कोई भी भौलौ नाईं आसतौ परमेश्‍वरा रै सिवाऐ।

²⁰ तू हुकम ता ज़ाणदौ औलौ, ‘गान्दै काम ना कौरणी, खून ना कौरणौ, च़ोरी ना कौरणी, ना झ़ुठी गवाही दैणी, और आपणै मां-बाबा री इज़्ज़त कौरणी।’

²¹ तिणी मुख्यै बोलौ, इऊं आज्ञाऐं ता हाऊं लोल़डी ओउलै मानाऊं।

²² इणै शुणियौ यीशुऐ तेसलै बोलौ, ‘ताऊं दी औज़ौ भी एकी बुशा री कामी आ। आपणी सारी ज़यदाद बेच़ीयौ गरीबु लै बांट, ताउंलै मिला सौरगा दी धन-ज़यदाद, और आपु हांड मुं पिछ़ु।’

²³ इणै शुणियौ सेऊ मुख्यौ भौरी दुखी हुऔ कैलैकि सेऊ भौरी सेठ थौ।”

²⁴ यीशुऐ सेऊ सेठ दुखी देखीयौ आपणै च़ेलेऊ लै बोलौ, “सेठ लोगु कै आपणै ज़िवा दी परमेश्‍वर राज़ कौरणै री ज़ाज़त देणी केती मुश्कल़ आ।

²⁵ ऊंटा रै सिउणी री पाशी बाटीऐ डेउणौ आसान आ। तेथकु भी कठिण आ सेठ लोगु लै आपणै ज़िवा दी राज़ कौरणै दैणौ।”

²⁶ इणै शुणियौ लोगुऐ बोलौ, तैबै कासरौ छ़ुटकारौ हुई बौल़ा सा?

²⁷ यीशुऐ बोलौ, “ज़ो आदमी रै बोलै नाईं औन्दौ सेऊ परमेश्‍वरा रै बोलै औआ सा।”

²⁸ पतरसै बोलौ, “देखौ आमै ता आपणौ घौर-बार छ़ाड़ियौ ताऊं पिछ़ु च़ाल पौड़ै ई।”

²⁹ यीशुऐ बोलौ, “हाऊं तुमुलै सौच़्च़ौ बोलाऊ इणौ कोई ना आसतौ ज़ुणिऐ परमेश्‍वरा रै राज़ा री ताइंऐ, आपणौ घौर, छ़ेउड़ी, भाई और मां-बाब या लोल़डै छ़ाड़ै औलै,

³⁰ और तेसलै इऐं ज़िन्दगी दी कई गुणौ ज़ादौ और आशणै वाल़ै जुगा दी सौदा री ज़िन्दगी ना मिला।”

आपणै मौरणै रै बारै दी यीशु रै चीजी बारै बोलणौ

³¹ तैबै यीशुऐ आपणै बारह च़ेलै आपु काऐ औटाऐ और तिउंलै बोलौ, “देखौ आमै यरुशलेम लै ई लागै औन्दै डेउंदै, ज़ो-ज़ो बुशै आदमी रै छ़ोहरु रै बारै दी पुराणै भविष्यवक्तुऐ लिखी सै सारी पुरी हुणी आ।

³² कैलैकि तेस दुजी ज़ाती रै लोगु रै हाथा दी दिआई, सै तेसरौ मज़ाक उड़ावा ई। सै तेसरी बेइज़्ज़ती कौरा ई और तेस माथै थुकाई।

³³ और तेसदी कोड़ै ला ई, तेस पोरु झ़ांगाई पर सेऊ चिजै दिनै ज़िउंदौ हुआ सा।”

³⁴ पर तिऊं च़ेलेउऐ यीशु री केज़ी भी बूश नाईं सौमझ़ी और इऐ बुशै तिऊंकु च़ोरुई थाकी, ज़ो बोलौ थौ सेऊ तिउंरी सौमझ़ी दी ना आशौ।

शेड़ै भीखारी लै आखी रौ दाण

³⁵ ज़ैबै यीशु यरीहो इलाकै रै नज़दीक पौउंच़ौ, तिऐ बाटा दी एकी भिलै बोशियौ एक शेड़ौ भीखा मांगदै थौ लागौ औन्दौ।

³⁶ तिणी शेड़ै भीड़ा री हाक शुणियौ पुछ़ौ, “एऊ का औन्दै लागौ औन्दौ?

³⁷ भीड़ा रै लोगुऐ बोलौ, नासरत गांवा रौ यीशु आ इदरा बाटीऐ डेउंदै लागौ औन्दौ।”

³⁸ इणै शुणियौ सेऊ शेड़ौ भीखारी च़िलांदै लागौ “ओ यीशु, राज़ै दाऊदा री खानदानी रौ, मुं माथै दया कर।”

³⁹ ज़ो लोग औगाड़िऐ थै लागै औन्दै डेउंदै तिंउऐ तेसलै डांटियौ बोलौ, “च़ुटुक थाक” पर सेऊ तौंइऐ भी ज़ोरै-ज़ोरै लागौ च़िलांदै, “ओ दाऊदा रौ छ़ोहरु मुं माथै दया कर।”

⁴⁰ ज़ैबै यीशुऐ तेसरी हाक शुणी, ता यीशु खौड़ी टेकौ और हुकम दैऔ कि “एस मुं काऐ आणौ” ज़ैबै सेऊ शेड़ौ भीखारी यीशु रै नज़दीक आशौ ता यीशुऐ तेसकु पुछ़ौ,

⁴¹ “तू का च़ाहा ई? हाऊं ताउंलै का कौरु? तैबै तिणीऐ बोलौ, ‘ओ प्रभु हाऊं च़ाहा ऊ की हाऊं देखदै लागु।’ ”

⁴² यीशुऐ बोलौ, “ठीक आ तू देखी बौल़ा ई, तैरै विश्वासै तू ठीक कियो ई।”

⁴³ तेबी ई सेऊ शेड़ौ भीखारी देखदै लागौ, और परमेश्‍वरा री बौड़ाई कौरीयौ यीशु पिछ़ु आण्डदै लागौ। ज़ुणिऐ भी एज़ौ च़मतकार देखौ सै सारै परमेश्‍वरा री महिमा कौरदै लागै।