लुका 12 - पहाड़ी महासुई

बुरै और पाखण्डी लोगु कु च़ितलाउणै

¹ सेज़ै बौगतै तिऐ कई हज़ार लोग कौठै हुई गौऐ और लोगु री भीड़ एती बौड़ी गोई कि, एकी दुजै माथै लागै लोटदै। यीशु सौभी कु पैहलै आपणै च़ेलेऊ भिलै मुड़ियौ बोलदै लागौ, फरीसी रै कौपटी संज़ेड़ै कु बौच़ियौ रौएऊ।

² सेऊ बौगत आशदै लागौ औन्दौ, ज़ेबी सारी बुशै पौगड़ौ हुआई। और ज़ो कुछ़ गुप्त आ सेऊ सामनै आशणौ आ।

³ ज़ो बुशै तुमुऐ पीठी पिछ़ु बोली आ सै बुशै छ़ापरा माथै खौड़ी हुइयौ हाके मारीयौ परचार कौरा ई, ताकी सारै लोग तिऊं बुशै शुणी बौल़ा।

कासकु डौरी लै

⁴ यीशुऐ आपणै च़ेलेउलै बोलौ, मैरै प्यारै गोश्टणो, तुमै तिऊंकु ना डौरौ ज़ो सिरफ तुमारौ शरीर झ़ांगी बौल़ा ई तेथकु ज़ादौ सै कुछ़ नाईं कौरी बौल़दै।

⁵ पर हाऊं तुमुलै बोलाऊ, कि कासकु डौरनौ च़ांई, परमेश्‍वरा कु डौरौ ज़ासकै लोगु झ़ांगणै और नौरका दी पाइणै रौ हक्क आ।

⁶ का पांज़ च़ौड़की दुई रुपाऐ दी ना बिकदी? तैबै भी परमेश्‍वर तिऊं मांझ़िया कु एक भी ना बिसुरदौ।

⁷ और तुमारै मुंडा रै बाल़ भी गौणै औन्दै ई, तुमै डौरौ नाईं कैलैकि तुमै परमेश्‍वरा लै तिऊं च़ौड़की रै बालरा कु भी ज़ादै किमत्ती ई।

यीशु मानणौ या नाईं मानणौ

⁸ हाऊं तुमुलै बोलाऊ, “कि ज़ुण-कुण मुं लोगु मांझ़िऐ माना लौ, ता हाऊं आदमी रौ छ़ोहरु तेस आदमी परमेश्‍वरा रै सौरगदूता रै सामनै माना ऊ।

⁹ पर अगर कुण, लोगु काऐ मैरौ इनकार कौरालौ, ता हाऊं तेस आदमी रौ परमेश्‍वरा रै सौरगदूता रै सामनै इनकार कौराऊ

¹⁰ ज़ुण कुण आदमी रै छ़ोहरु रै विरोधा ई बोलालौ तेसलै ता माफी मिला सा। पर ज़ुण कुण पवित्र आत्मा री बुराई कौरालौ तेसलै केबी भी माफी नाईं मिलदी।

¹¹ ज़ैबै तुमु आराधनालय दी राज़ च़लाउणै वाल़ै, बाकी अधिकारी लोगु काऐ तुमारौ मुकदमौ च़लावा लै ता तुमुऐ फिकर नाईं कौरणी, कि आपु बौच़णा लै आमु का और किणौ जा बोलणौ?

¹² कैलैकि ज़ैबै तुमै तिऐ खौड़ै औलै, सेज़ै बौगतै पवित्र आत्मा तुमु कु शिखावा कि तुमु का ज़वाब जा दैणौ।”

एक सेठ मुर्खा रौ औनैणौ

¹³ तैबै भीड़ा मांझ़िऐ कु एकी आदमीऐ यीशु लै बोलौ, ओ गुरु, “मैरै भाई लै बोल एरी कि आमै आपणै बाबा री ज़यदाद बांटी।

¹⁴ यीशुऐ तेसलै बोलौ, ‘ओ गोश्टण, हाऊं कुण औआ ऊ तुमारौ फैसलौ कौरणै वाल़ौ और तुमारी ज़यदाद बांडणै वाल़ौ?’

¹⁵ यीशुऐ तिउंलै तौंइऐ बोलौ, ‘च़ोकस रौ और सारै लोभ लाल़च़ा कु आपु बौच़ी थाकौ। कैलैकि कासी री भी ज़िन्दगी धन-ज़यदादा कौरीऐ नाईं काटींदी।’

¹⁶ यीशुऐ तिंउलै एक औनैणौ दैऔ, ‘एकी सेठा री ज़मीना दी भौरी नाज़ हुऔ।

¹⁷ तैबै सेऊ सेठ आपणै मौना दी विच़ार कौरदै लागौ कि आबै हाऊं किणौ कौरुलौ कैलैकि मुकै इऐं फौसली छ़ाड़ना लै भौरी ज़ागाह नाईं आसती।’

¹⁸ तैबै तिणी सेठै बोलौ कि हाऊं ज़ाणाऊ कि मुंइऐ का जा सा कौरणौ इऊं छ़ोटै कुठार ढाल़ीयौ बौड़ै चाणाऊ, और इऐं फसल तेथ भितै छ़ाड़ाऊ।

¹⁹ तैबै हाऊं आपुलै लै बोलाऊ, ‘ओ मैरै प्राण ताऊं कालै भौरी साला लै धन-ज़यदाद और नाज़ कौठै कियौ औन्दौ, खाऊ-पिऊ और मौज़ कर।’

²⁰ पर परमेश्‍वरै तेस सेठा लै बोलौ, ‘आज़ ई राचीऐ तैरौ प्राण ताऊं कु पोरु निंईआ ई, तैबै ज़ो कुछ़ तैरै कौठै कौरीयौ आ छ़ाड़ौ औन्दौ सेऊ कासरौ हुआ आ?’

²¹ तिणौ सेऊ आदमी भी आ ज़ुण आपु कालै ज़यदाद कौठै कौरा सा, सेऊ आदमी परमेश्‍वरा री नौज़रीऐ सेठ नाईं आसतौ।”

परमेश्‍वर माथी भरोसौ छ़ाड़ौ

²² तैबै यीशुऐ आपणै च़ेलेऊ लै बोलौ, “आबै हाऊं तुमुलै बोलाऊ आपणै ज़िन्दगी री फिकर नाईं कौरौ कि, आमै का खाऊ लै। और ना आपणै शरीरा री फिकर कौरौ कि आमै का भिड़ु लै।

²³ कैलैकि रोटी कु ज़िन्दगी और जुड़कै कु शरीर बौड़ीऔ आ।

²⁴ कौअगै माथै ध्यान दैऔ। सै ना बौइंदै, ना लौइंदै, और ना तिंउरै कुठार औन्दै, और ना तिंउरै खातै औन्दै, तैबै भी परमेश्‍वर तिऊं धाचा सा। पर तुमारी किम्मत ता च़ौड़किउ कु भी काफी ज़ादी आ।

²⁵ तुमु मांझ़िऐ इणौ कुण आ, ज़ो फिकर कौरीयौ आपणी उमर थोड़ी भी बड़ाई बौल़ा आ।

²⁶ अगर तुमै छ़ोटै कु छ़ोटौ काम नाईं कौरी बौल़दै तैबै बौड़ी बुशेऊ लै फिकर कैलै कौरा ई?

²⁷ ज़ांगल़ी फुला दी ध्यान दैऔ कि सै किणै बौड़ा ई सै ना ता मैहनत कौरदै और ना आपु कालै जुड़कै चाणदै तैबै भी केती बांठणै ई पर हाऊं तुमुलै बोलाऊ कि सुलेमान राज़ै भी आपणी सुखी ज़िन्दगी दी इऊं फुलु ज़िणै बांठणै जुड़कै नाईं भिड़ै

²⁸ अगर परमेश्‍वर इऐं धौतरी दी घास ज़मावा सा ज़ो घास आज़ औआ और बासिऐ ज़ौल़ा पोरु तैबै। ओ अविश्वासी लोगुओ तुमुकै सेऊ परमेश्‍वर जुड़कै कैलै ना भिड़ाऊंदौ।

²⁹ और ना तुमै एज़ी बुशेऊ री फिकर कौरौ कि आमै का खाऊ लै और का पिऊ लै और ना शक कौरौ।

³⁰ कैलैकि पुरी धौतरी री ज़ाती इऊं सारी च़िज़ा लै फिकर कौरदै थाका ई लागी पर तुमारौ बाब परमेश्‍वर ज़ाणा सा कि तुमुकै इऊं च़िज़ा री ज़ुरत आ।

³¹ पर हाऊं तुमुलै बोलाऊ कि परमेश्‍वरा रौ राज़ लोड़ौ तैबै सारी च़िज़ै तुमुकै मिला सा।”

सौरगा रौ धन

³² ओ छ़ोटी खुंबल़ी रै लोगुओ, “डौरौ नाईं कैलैकि तुमारौ बाब परमेश्‍वरा कै इणौ आच़्छ़ौ लागा कि सेऊ तुमारै ज़िवा दी राज़ कौरा।

³³ आपणी ज़यदाद बेच़ीयौ गरीबु लै दाण दैऔ और आपु कालै इणै बटुऐ चाणौ ज़ो केबी ना च़ीरिंदै और आपु कालै सौरगा दी इणी धन-ज़यदाद सांज़ौ ज़ो कादी ना घौटदी ज़िऐ ना ता च़ोर च़ोरदौ और ना किड़ौ लागदौ।

³⁴ कैलैकि ज़ियै तुमारौ धन औलौ तिऐ तुमारौ मन भी लागा।”

उज़ीई रौएऊ

³⁵ “परमेश्‍वरा रै कामा लै सौदा तैयार थाकौ, ज़िणै कामा कौरना लै लोग कौमर कौशा ई और पुरी राचीऐ मशाल ज़ाल़ियौ तैयार रौआ ई।

³⁶ तिऊं लोगु बाशीऐ बौणौ, ज़ुण आपणै मालिका ज़ागदै थाका ई लागी कि मैरौ मालिक शादी ब्याह कु वापिस केबड़ी आशा। और ज़िणी सेऊ मालिक दार खटखटावा लौ और सेऊ तेसलै खरकच़ार दार उगाड़ा और तेसरै स्वागत कौरना लै तैयार रौआ।

³⁷ भौलै ई सै ज़ो तेस पौखदै ई लागै औन्दै, और सेज़ै बौगता लै तैयार ई, हाऊं तुमुलै सौच़्च़ौ बोलाऊ सेऊ मालिक तेस आपणौ नुकुर धौनी बोशाल़ा आ, रोटी खान्दै। और आपणी कमर कौशीयौ आपु तेस दासा री सेवा कौरा आ।

³⁸ अगर सेऊ मालिक आधी राची, दोउत राची ई आशीयौ आपणौ दास उज़ीई देखा लौ ता सेऊ भौलौ आ।

³⁹ और एज़ी बुशु माथै ध्यान दैऔ कि, अगर घौरा रौ मालिक ज़ाणालौ कि च़ोर केज़ै बौगतै आशा आ, तैबै सेऊ मालिक तेस च़ोर भितरै आशणै नाईं दैंदौ।

⁴⁰ तुमुऐ हर बौगतै तैयार रौइणौ च़ांई, कैलैकि हाऊं आदमी रौ छ़ोहरु तेबी आशाऊ ज़ेबी तुमै सुंच़ा भी नाईं लै।”

विश्वासा वाल़ौ या बिण विश्वासा वाल़ौ सेवक

⁴¹ पतरसै यीशु कु पुछ़ौ, “ओ प्रभु का एऊ औनैणौ आमुलै आ या सारेऊ लै आ?”

⁴² प्रभुऐ तेसलै ज़वाब दैऔ, “हाऊं केज़ै भी विश्वास वाल़ै, और बुद्धी वाल़ै लोगु रै बारै दी ऊ बोलदै लागौ औन्दौ, ज़ासकै तिऊंरौ मालिक आपणै घर-परिवारा री देखभाल़ कौरना री और रोटी दैणै री ज़िमैबारी दिआ लौ।

⁴³ अगर सेऊ मालिक आशीयौ देखाल़ौ कि तेसरै दासै आच़्छ़ा कौरीऐ ज़िमैबारी सौम्भाल़ी आ ता सेऊ भौलौ आ।

⁴⁴ हाऊं तुमुलै सौच़्च़ बोलाऊ कि, मालिक आपणै तेस दासा कै आपणी सारी धन-ज़यदादा सौम्भाल़णै रौ हक्क दिआ सा।

⁴⁵ अगर सेऊ दास सुंच़ा लौ मैरौ मालिक ता कुछ़ दिना झ़ांऊ वापिस ना आशदौ और दुजै नुकरा लै दुःख दैणौ शुरु कौरालौ, और आपुलै खाणै पिणै रौ इन्तज़ाम कौरालौ और सूर पिआ लौ।

⁴⁶ ता तेसरौ मालिक बिण बोली तेबी आशा ज़ेबी तेसरै सुंच़ौ औन्दौ भी ना औलौ, और सेऊ मालिक तेस नुकरा लै सौज़ा दिआ और अविश्वासिऊ मांझ़िऐ भेज़ा।

⁴⁷ तिऊं नुकरु लै काठी सौज़ा दिआई, कैलैकि ज़ैबै सेऊ आपणै मालिका री इच़्छ़ा ज़ाणा थौ, तैबै भी तिणीऐ आपणी ज़िमैबारी पुरी नाईं की।

⁴⁸ पर सै लोग, ज़ुण नाईं ज़ाणा थै अगर सै गलत काम कौरा ई, तिउंलै थोड़ी सौज़ा मिला आ। ज़ासकै ज़ादौ दैऔ औन्दौ तेसकु ज़ादौ हिसाब मांगा ई और ज़ासकै ज़ादौ सम्भाल़ौ औन्दौ तेसकु भी तेती हिसाब मांगा ई ज़ेती तेसकै सम्भाल़ौ औन्दौ आ।”

यीशु रै आशणै रौ नतीज़ौ

⁴⁹ “हाऊं धौतरी माथै आगी लाइंदै ऊ आशौ औन्दौ, और हाऊं च़ाहा ऊ कि मैरौ एऊ काम इबी लै पुरौ च़ांई थौ हुऔ।

⁵⁰ पर मुंइऐ ता तौंइऐ एक बपतिस्मौ निणौ आ, और ज़ेबी झ़ांऊ मुंइऐ सेऊ निऔं नाईं तेबी झ़ांऊ हाऊं परेशान रौआऊ।

⁵¹ तुमै का सुंच़ाई कि हाऊं धौतरी दी मेल मिलाप कौरदै ऊ आशौ औन्दौ? हाऊं तुमुलै बोलाऊ कि, नाईं बल्कि अलग कौरदै ऊ आशौ औन्दौ।

⁵² कैलैकि इबी कु एकी घौरा दी पांज़ आदमी आपु मांझ़िऐ बिरोध छ़ाड़ाई, चीन दुई आइलै और दुई चिआ आइलै।

⁵³ बाब छ़ोहरु आइलै, छ़ोहरु बाबा आइलै बिरोध छ़ाड़ा, मां छ़ोटी आइलै, और छ़ोटी मां आइलै, शाशु बोऊ आइलै और बोऊ शाशु आइलै बिरोध छ़ाड़ाई।”

बौगता रौ लौछ़ण

⁵⁴ यीशुऐ भीड़ा रै लोगु आइलै भी बोलौ, “ज़ैबै तुमै बादल तिदै उड़दै देखा ई ज़ेज़ी भिलै सुरज छ़िपा सा, तैबै तुमै खरकच़ार बोलाई कि पाणी-बागुर लागणै वाल़ौ आ और तिणौ हुआ सा।

⁵⁵ और ज़ेबी सुल़टी भिलै बागुर फिरदै देखा लै ता तुमै फेटी बोलाई कि आबै गौरमी पौड़ा ई तैबै तिणौ हुआ सा।

⁵⁶ ओ कौपटी लोगुओ तुमै धौतरी और सौरगा रै भेद ज़ाणाई पर एज़ै जुगा रै बारै दी भेद कैलै ना ज़ाणदै?”

आपणै बिरोधिऊ आइलै सुलौ

⁵⁷ “तुमै आपु ऊ एज़ी बुशु रौ फैसलौ कैलै ना निंदै कि किणौ कौरणौ ठीक आ।

⁵⁸ अगर तुमु कोर्टा लै निंदै औलै लागै औन्दै और बाटा दी तुमुकै तुमारौ बिरोधी मिला लौ ज़ुणिऐ तुमु माथै केस कियौ थौ, तैबै तिऐ आपु मांझ़िऐ सुलौ कौरौ, नाईं ता तुमुलै सौज़ा भी हुई सौका और तुमु कास अधिकारी कै सम्भाल़ा और सेऊ पा तुमु ज़ेला दी।

⁵⁹ अगर इणौ हुई जा लौ, ता तुमै आज़ाद नाईं हुई बौल़दै ज़ेबी झ़ांऊ तुमै एक-एक पाई रौ हिसाब ना दिआ लै।”