याकूब 2 - पहाड़ी महासुईभेदभाव रै विरुद्धा ई खौबरदारी 1 ओ मैरै प्यारै साथी विश्वासिउओ, आमारै महिमा वाल़ै प्रभु यीशु मसीह माथै तुमारौ विश्वास भेदभाव वाल़ौ ना च़ांई हुऔ। 2 मानौ, अगर एक आदमी सुनै रै कौड़ै और आच़्छ़ै जुड़कै भिड़ीयौ तुमारी कलिसिया री खुंबल़ी दी आशा लौ, और एक गरीब भी गान्दै जुड़कै भिड़ीयौ आशा लौ, 3 और तुमै तेस आच़्छ़ै जुड़कै भिड़ै औन्दै आदमी लै इज़्ज़ती कौरी बोलालै, “तुमै इदै आच़्छ़ी ज़ागाह दी बोशौ,” और तेस गरीबा लै बोलालै, “तू इदै खौड़ौ रौऊ,” या “मैरै बांगणै काऐ बोश,” 4 तैबै का तुमुऐ आपु मांझ़िऐ भेदभाव नाईं कियौ और बुरै विच़ारा कौरी फैसलै कौरणै वाल़ै नाईं बौणै? 5 ओ मैरै प्यारै साथी विश्वासिउओ, शुणौ। का परमेश्वरै इऐं धौतरी रै गरीब नाईं च़ुनै कि विश्वासा दी सेठ और सेज़ै राज़ा रै हक्कदार औलै, ज़ेथरौ वायदौ परमेश्वरै तिऊं आइलै कियौ ज़ुण तेस आइलै प्यार कौरा ई? 6 पर तुमुऐ तेस गरीबा री बेइज़्ज़ती की आ। का सेठ लोग तुमु माथै ज़ुलम नाईं कौरदै, और का सेई ई तुमु कोर्टा दी घीशी-घीशियौ नाईं निंदै? 7 का सै तेस महान नावां री बेइज़्ज़ती नाईं कौरदै ज़ेज़ौ नाऊं तुमारी पैहच़ाण आ? 8 तैबै भी तुमै पवित्रशास्त्रा रै एज़ै वचना ज़िणौ, कि “तू आपणै पड़ोसी आइलै आपु ज़िणौ प्यार कर” सौच़्च़ी तेस राज़ नियम पुरौ कौरा ई, ता आच़्छ़ौ कौरा ई। 9 पर अगर तुमै भेदभाव कौरा ई ता पाप कौरा ई। और नियम तुमु गुनाहागार चाणा ई। 10 कैलैकि ज़ुण सारै नियम माना ई, और एक बूश बिसरा पोरु, ता सेऊ सारी बुशा दी आरोपी बौणा आ। 11 एथीलै ज़ुणिऐ इणौ बोलौ, “तू गान्दै काम नाईं कौरै” तिणीऐ इणौ भी बोलौ, “कि तू खून नाईं कौरै।” एथीलै अगर तू गान्दै काम नाईं कौरदौ पर खून कौरा ई ता भी तू नियम ना मानणै वाल़ौ बौणौ। 12 तुमै तिऊं लोगु ज़िणै वचन बोलौ और काम भी कौरौ, ज़ासरौ फैसलौ आज़ादी रै नियमा कौरी हुणौ आ। 13 कैलैकि ज़ुणिऐ दया नाईं की, तेसरौ फैसलौ बिण दया रौ हुणौ, दया फैसलै माथै ज़िती ऐन्दी औआ। विश्वास और कौरम 14 ओ मैरै प्यारै साथी विश्वासिउओ, अगर कुण बोलालौ कि मुकै प्रभु यीशु माथै विश्वास आ पर सेऊ दुजेऊ लै आच़्छ़ै काम नाईं कौरालौ तैबै एस कौरी का फाइदौ आ? का इणौ विश्वास केबी भी तेसरौ छ़ुटकारौ कौरी सौका आ? 15 अगर कुण विश्वासी भाई-बौइण इणौ आ ज़ासकै जुड़कै नाईं ई, और तिउंकै हर रोज़ रोटी री ज़ुरत औली, 16 और तुमु मांझ़िया कु कुण तिउंलै बोलालौ, “शान्ति कौरी डैऔ, तुमै न्यातै, और रौज़ै औन्दै रौऔ,” पर ज़ो च़िज़ै शरीरा लै ज़ुरुरी आ तिऊं नाईं लै दिया आ तैबै का फाइदौ आ? 17 तिणी ई विश्वास भी, अगर तेथ आइलै आच़्छ़ै काम नाईं औलै ता विश्वास आपु दी मौरौ औन्दौ आ। 18 अगर कुण इणौ बोला कि, “ताउंकै विश्वास आ और हाऊं कौराऊ आच़्छ़ै काम,” पर हाऊं बोलाऊ तू आपणौ विश्वास मुकै बिण आच़्छ़ै कामै साबित कर। और हाऊं देखाल़ा ऊ आपणौ विश्वास आपणै आच़्छ़ै कामा कौरी ताउंकै। 19 ताउंकै विश्वास आ कि एक ई परमेश्वर आ। तू आच़्छ़ौ कौरा ई। पर बुरी आत्माऐं भी विश्वास छ़ाड़ाई, और काम्बाई। 20 ओ मुर्ख आदमी का तू इणौ भी ना ज़ाणदौ कि आच़्छ़ै कामा रै बिणा विश्वास बेकार आ? 21 ज़ेबी आमारै पुरखा अब्राहमै आपणौ छ़ोहरु इसहाक बेदी माथै च़ड़ाऔ आ, तैबै का सेऊ विश्वासा दी धौर्मी नाईं बौणौ? 22 ता तांइऐ देखी गौ आ कि विश्वासै आपणै कामा आइलै मिलियौ असर टालौ आ और कामा कौरी विश्वास पाकौ हुऔ आ। 23 और पवित्रशास्त्रा रौ इयौ वचन पुरौ हुऔ, “अब्राहमै परमेश्वरा रौ विश्वास कियौ, और इयौ विश्वास तेसलै धौर्मी बौणौ।” एथीलै तेसलै परमेश्वरा रौ गोश्टण बोला थै। 24 एथीलै तुमुऐ देखी गौ आ कि आदमी सिरफ विश्वासा कौरी नाईं, बल्कि भौलाई रै कामा कौरी भी धौर्मी बौणा ई। 25 तिणी ई राहाब नावां री गान्दै काम कौरणै वाल़ी छ़ेउड़ी भी, ज़ेबी तिंआऐ दूत दुश्मन कु बौच़ाउणा लै आपणै घौरा कै छ़ाड़ै और दुजी बाटा बाटीऐ भेज़ै, तैबै का सै कामा कौरी धौर्मी नाईं बौणी? 26 ज़िणौ शरीर बिण सासा रौ मौरौ औन्दौ आ, तिणी विश्वास भी बिण आच़्छ़ै कामै मौरौ औन्दौ। |
This work is licensed under Creative Commons Attribution-ShareAlike 4.0 License.