इब्रानियों 8 - पहाड़ी महासुईयीशु आमारौ परधान याजक 1 इऊं बुशु रौ निचोड़ इणौ आ, कि आमुकै एक इणौ परधान याजक आ ज़ुण सौरगा दी परमेश्वरा री बौड़ी राज़गादी री सुल़टी भिलै आ बोशौ औन्दौ। 2 आमारौ परधान याजक सारेऊ कु बौड़ी पवित्र ज़ागाह दी और तेस सौच़्च़ै ताम्बु रौ सेवक आ। ज़ो केज़ै भी आदमीऐ नाईं बल्कि परमेश्वरै आ चाणौ औन्दौ। 3 हर एक परधान याजक पापा री माफी लै भैंटा और बौल़ी च़ौड़ाउणा लै छ़ांटिया आ, एथीलै इणौ ज़ुरुरी आ कि आमारै परधान याजक यीशु कै भी च़ौड़ाउणा लै हुणौ च़ांई। 4 अगर यीशु मसीह धौतरी माथै हुआ थौ ता सेऊ केबी भी याजक नाईं हुआ थौ, कैलैकि इदै मुसा रै नियमा रै ज़ौरिऐ भैंटा च़ौड़ाउणै वाल़ै याजक ई। 5 इऐ सेज़ै याजक ई ज़ुण सिरफ सौरगा री च़िज़ु री शकल और छ़ाईं री आराधना कौरा ई। कैलैकि ज़ेबी मुसा ताम्बु चाणनै वाल़ौ थौ ता तेसकै इणी च़ेताउनी मिली, “देख, ज़ो नौक्शौ ताउंकै सीन्नै पहाड़ी माथै देखाऔ थौ, तेसी ज़िणौ सारौ कुछ़ चाणै।” 6 पर आबै ज़ो याजका रौ काम यीशु मसीह कै आ दैऔ औन्दौ सेऊ दुजै याजकु कै दैऔ औन्दै याजकु रै कामा कु भौरी बौड़ियौ आ। कैलैकि सेऊ औज़ौ भी बौड़ै वायदै रौ बिशटु बौणौ, ज़ो ओर दुजै वायदै रै सहारै बानी ऐन्दी। 7 अगर सेऊ पैहलौ वायदौ बेकसूर हुआ थौ, ता दुजै वायदै री ज़ुरत नाईं हुआ थी। 8 पर परमेश्वर लोगु माथै आरोप लाइयौ बोला, “प्रभु बोला, देखौ, सै दीन आशणै कि हाऊं इस्राइला रै लोगु आइलै नौंवौ वायदौ बानुलौ। 9 एऊ तेस वायदै ज़िणौ नाईं हुआ लौ, ज़ो मुंइऐ तिंउरै स्याणेऊ आइलै सेज़ै बौगतै कियौ थौ, ज़ेबी मुंइऐ सै हाथा पाकड़ियौ मिस्र देशा कु गाड़ीयौ आणै। कैलैकि सै मैरै वायदा माथै टेकी नाईं रौऐ, और मुंइऐ तिउंरी देखभाल़ नाईं की। प्रभु इणौ ई बोला सा। 10 तौंइऐ प्रभु बोला, कि ज़ो नौंवौ वायदौ मुंइऐ तिऊं दुसा बासिऐ इस्राइला रै लोगु आइलै कौरुलौ, सेऊ वायदौ एऊ आ कि हाऊं आपणै नियम तिंउरै ज़िवा दी पाऊलौ, और तिऊं, तिंउरै ज़िवा दी लिखाऊ, और हाऊं तिऊंरौ परमेश्वर बौणुलौ और सै मैरै लोग बौणनै ई। 11 हर एक आपणै देश वाल़ेऊ लै और आपणै भाईऊ लै इणी शिक्षा नाईं दिआ लौ कि, ‘तू प्रभु रवाऊ।’ कैलैकि छ़ोटै कु बौड़ै झ़ांऊ सारै मुं रवावा लै। 12 कैलैकि हाऊं तिंउरै बुरै कामु माफ कौराऊ, और तिंउरै पाप तौंइऐ याद नाईं कौरदौ।” 13 नौंवौ वायदौ चाणियौ तिणीऐ पैहलौ वायदौ पुराणौ चाणौ। और ज़ो च़ीज़ पुराणी और केज़ै कामा री नाईं रौआ ली, तिंया च़िज़ा रौ मिटणौ ज़ुरुरी आ। |
This work is licensed under Creative Commons Attribution-ShareAlike 4.0 License.