इब्रानियों 7 - पहाड़ी महासुईमलिकिसिदक याजक 1 मलिकिसिदक शालेम इलाकै रौ राज़ौ, और परमपरधान परमेश्वरा रौ याजक थौ। ज़ेबी अब्राहम राज़ेऊ युद्धा दी हौराइयौ वापिस थौ आशदै लागौ औन्दौ, ता मलिकिसिदिक तिऊंकु मिलौ और तेसलै आशीष देई। 2 अब्राहमै मलिकिसिदिका कै युद्धा कु ज़ीतीयौ आणी ऐन्दी सारी च़िज़ेऊ रौ दौसूवौ हिस्सौ भी दैऔ। मलिकिसिदिका रै नाऊं रौ मतलब “धार्मिकता रौ राज़ौ आ।” पर ज़ैबै कि शालेमा रै नावां रौ मतलब “शान्ति” आ ता सेऊ “शान्ति रौ राज़ौ” भी आ। 3 ज़ासरौ ना बाब, ना मां, ना वंश आ, ज़ासरै दिनै रौ ना ता शुरुआत आ और ना ज़िन्दगी रौ अन्त आ। पर परमेश्वरा रौ छ़ोहरु रौ रूप बौणीयौ सेऊ सौदा लै याजक बौणी रौआ सा। 4 आबै एथ माथै ध्यान कौरौ कि मलिकिसिदक केती महान थौ, ज़ासलै आमारै स्याणै अब्राहमै युद्धा दी ज़िती ऐन्दी सारी च़िज़ेऊ रौ दौसूवौ हिस्सौ भी दैऔ। 5 मुसा रै नियम लेवी रै वंशा कै इणौ शिखावा ई कि ज़ुण याजक बौणा लौ तिणीऐ इस्राइली लोगु, मतलब ज़ो तिउंरै आपणै लोग ई तिऊं सारेऊ कु दौसूवौ हिस्सौ निणौ च़ांई। पर सै याजक और दुजै लोग भाईऊ ज़िणै ई कैलैकि सै अब्राहमा रै वंशा रै ई। 6 पर एऊ आदमी मलिकिसिदिक ज़ुण लेवी रै वंशा कु नाईं थौ, अब्राहमा कु दौसूवौ हिस्सौ नियौं, हालांकी अब्राहमा कै परमेश्वरा कु वायदै थै मिलै औन्दै तेसरै बावज़ूद भी मलिकिसिदिकै तेसलै आशीष देई। 7 आमै आच़्छ़ा कौरी ज़ाणी ई कि आशीष देणै वाल़ौ आशीष निणै वाल़ै कु बौड़ौ आ। 8 और इदै ता मौरणै वाल़ै आदमी दौसूवौ हिस्सौ नियां आ, पर मलिकिसिदिक ज़ासकै अब्राहमै दौसवौ हिस्सौ दैऔ थौ पवित्रशास्त्र बोला आ कि सेऊ इबी झ़ाऊं ज़िउंदौ आ। 9 ता आमै इणौ भी बोली बौल़ी ई, कि लेवी भी, ज़ो दौसूवौ भाग नियां सा, अब्राहमा रै ज़ौरिऐ दौसूवौ हिस्सौ दैऔ। 10 ज़ेबी मलिकिसिदक अब्राहमा कु मिलौ तेबी ता लेवीऊ रौ ज़नम भी नाईं हुऔ थौ। कैलैकि लेवी ता सेज़ै बौगतै आपणै बाब अब्राहमा रै शरीरा दी थौ। मलिकिसिदका रै ज़िणै वाल़ै दुजौ याजक 11 हालांकी मुसा रै नियमा दी इणौ आ बोलौ औन्दौ कि याजक सिरफ लेवी रै खानदाना कु हुणौ च़ांई, कैलैकि याजक कासी भी पाक्कै नाईं चाणी सौकदै। एथीलै हारुन याजका रै टौबरा रै बौदल़ै ज़ुण लेवी रै वंशा रौ थौ, मलिकिसिदका ज़िणै एक याजका री ज़ुरत आ। 12 कैलैकि ज़ेबी याजका रौ पद बौदल़ा ई, ता नियमा रौ भी बौदुल़णौ भी ज़ुरुरी आ। 13 आमै इऐ बुशै मसीह रै बारै दी बोली ई ज़ुण दुजै खानदानी कु थौ। कोइऐ भी तेस खानदाना मांझ़िऐ कु याजका ज़िणी तिऐं बेदी री सेवा नाईं की। 14 सारै ज़ाणाई कि आमारौ प्रभु यीशु यहुदा रै खानदाना कु पैदौ हुऔ आ, और मुसै यहुदा रै खानदाना कु याजक हुणै रै बारै दी केबी कोई बुशै नाईं लाई। 15 आबै आमै औज़ौ भी आच़्छ़ा कौरी सौमझ़ी बौल़ी, कैलैकि मुसा रौ नियम पैहलै कु बौदल़ुई गौ आ आबै एक नौंवौ याजक आ ज़ुण मलिकिसिदका ज़िणौ आ। 16 यीशु याजक एथलै नाईं बौणौ कि नियम-कानून एक खास आदमी री तौरफा कु आशा। पर ज़िन्दगी री शक्ति कु ज़ो केबी भी नाश नाईं कौरींदी। 17 कैलैकि परमेश्वर पवित्रशास्त्रा दी तेसरै बारै दी इणी गवाही दिया सा कि, “तू मलिकिसिदका री रीती दी सौदा लै मुख्य याजक बौणी गौ आ।” 18 इणै कौरी, पैहलै मुसा रै नियम बेकार और नाकाम हुणै री वज़ाह कु बौदल़ुई गोई। 19 कैलैकि मुसा रै नियमै केज़ी भी बूश पाक्की नाईं की, और इणी ज़ागाह दी आमुकै एक बौड़ी आश आ ज़ो यीशु मसीह दी आ, ज़ासरै ज़ौरिऐ आमै परमेश्वरा रै नज़दीक डेई बौल़ी। 20 और परमेश्वरै एक कसम खाई, ज़ेबी तिणीऐ यीशु मसीह याजक चाणौ आ, 21 कैलैकि लेवी रै वंशा रै लोग ता बिणा कसमा कौरी याजक बौणै पर यीशु मसीह कसमा आइलै परमेश्वरा री तौरफा कु याजक चाणौ। ज़ुणिऐ तेसरै बारै दी इणौ बोलौ कि, “हाऊं परमेश्वर ज़ुण कसम खाआ आ, और हाऊं तेस फैसलै कु केबी नाईं पश्ताउंदौ, ‘तू सौदा लै याजक ई।’ ” 22 एथीलै यीशु सेऊ आ ज़ुण आमुलै भौरी महान वायदै री ज़िम्मेदारी नियां आ। 23 एक बूश औज़ौ आ, भौरी याजक बौणै कैलैकि हर एकी याजका री मौउता आइलै तेसरी सेवा खातम हुई थी। 24 पर यीशु जुगै-जुगै रौआ सा, एज़ी वज़ाह तेस बासिऐ कोई भी याजक नाईं बौणौ। 25 एथीलै ज़ो यीशु रै ज़ौरिऐ परमेश्वरा काऐ आशा ई, सेऊ तेसरौ पुरौ-पुरौ छ़ुटकारौ कौरी बौल़ा आ, कैलैकि सेऊ तिउंलै औरज़ कौरणै लै सौदा ज़िउंदौ आ। 26 ता इणौ परधान याजक आमारी ज़ुरत पुरी कौरी सौका आ, ज़ो पवित्र आ, और निष्कपट, और शुद्ध आ, और पापीऊ कु अलग रौआ, और सौरगा कु भी ज़ो उंच़ौ कियौ औन्दौ आ। 27 यीशु तिऊं परधान याजकु ज़िणै नाईं आ ज़ुण हारुना रै वंशा रै ई तेसलै ज़ुरुरी नाईं कि रोज़ पैहलै आपणै पापा और तैबै आपणै लोगु रै पापा कालै बौल़ी च़ड़ावा। कैलैकि यीशु एकी बारै लोगु रै पापा री खातिर आपु ई बौल़ी च़ौड़ौ। 28 कैलैकि मुसा रै नियम ता कमज़ोर लोगु परधान याजक चाणा आ, पर ज़ो कसम परमेश्वरै नियमा बासिऐ खाई आ, सै परमेश्वरा रौ छ़ोहरु परधान याजक चाणा आ। और सेऊ आमुलै सौदा लै पाकौ परधान याजक बौणी गौ आ। |
This work is licensed under Creative Commons Attribution-ShareAlike 4.0 License.