इब्रानियों 5 - पहाड़ी महासुई1 हर एक परधान याजक लोगु मांझ़िऐ कु छ़ांटिया आ, और लोगु लै तिऊं बुशु रै बारै दी ज़ो परमेश्वरा कु मेल छ़ाड़ा, मानौ औन्दौ कि भेंट और पापा री बौल़ी कौरदै थाका लागी। 2 कैलैकि सेऊ आपु ई कमज़ोरी रै वशा दी आ एथीलै सेऊ बिणा औकली वाल़ै, और भुलै भौटकै औन्दै लोगु आइलै कौंउल़िऐ आच़्छ़ौ बर्ताव कौरी सौका। 3 परधान याजक हुणै रै नातै तेसलै ज़ुरुरी आ कि, ज़िणौ लोगु लै तिणौ ई आपुलै भी पापा री बौल़ी च़ौड़ावा। 4 इऐ इज़्ज़ती री ज़ागाह कोई आपु कु नाईं निंदौ, ज़ेबी झ़ांऊ कि हारुना ज़िणौ परमेश्वरा री तौरफा कु छ़ांटिया नाईं लौ। 5 तिणौ ई मसीहै भी परधान याजक बौणनै री बौड़ाई आपु कु नाईं कौरी, पर तेसलै तिणीऐ देई, ज़ुणिऐ तेसलै बोलौ थौ, “तू मैरौ छ़ोहरु ई, आज़ हाऊं पौगड़ौ कौराऊ कि, हाऊं तैरौ बाब ऊ।” 6 एथीलै इणी ई सेऊ दुजै ज़ागाह दी भी बोला कि, “तू मलिकिसिदका री रीती माथै सौदा लै याजक आ।” 7 यीशुऐ धौतरी दी रौइणै रै बौगता दी ज़ोर-ज़ोरै, औटाई-औटाइयौ और लेरी-लेरीयौ परमेश्वरा कु ज़ो तेस मौउता कु बौच़ाई सौका थौ, प्राथना और औरज़ की, और भौक्ती री वज़ाह कु तेसरी शुणी। 8 हालांकी यीशु परमेश्वरा रौ छ़ोहरु थौ, तैबै भी तिणीऐ दुःख उठाई-उठाइयौ हुकम मानणौ शिखौ, 9 और पाकौ बौणीयौ, आपणै सारै हुकम मानणै वाल़ेऊ लै सौदा छ़ुटकारै री वज़ाह हुई गौ, 10 और तेसलै परमेश्वरा री तौरफा कु मलिकिसिदका री रीती माथै परधान याजका री ज़ागाह मिला। विश्वासा कु भौटकुणै रौ नतीज़ौ 11 एथरै बारै दी आमुऐ भौरी का बुशै लाइणी ई, पर इउंरौ सौमझ़ाउणौ भी कठिण आ, कैलैकि तुमै उंच़ौ शुणदै लागी गौऐ ई। 12 सौच़्च़ी इबी झ़ाऊं ता तुमु गुरु बौणनौ च़ांई थौ। पर तुमुकै ता इबी भी कास इणै आदमी री ज़ुरत आ, ज़ुण तुमुकै दुजी बारै परमेश्वरा री शिक्षा री पैहली बुशै शिखावा। तुमै ता इणै हुई गौऐ आ कि तुमुलै नाज़ा रै बौदल़ै इबी झ़ांऊ दूध ई च़ांई। 13 दूध पिणै वाल़ै लोल़डेऊ लै ता धार्मिकता री शिक्षा री पैहच़ाण नाईं औन्दी, कैलैकि सेऊ ता लोल़डौ आ। 14 पर नाज़ बौड़ेऊ लै आ, ज़ासरी ज्ञाना री सौमझ़ भ्यास कौरदै-कौरदै भौलै-बुरै दी भेद कौरणै दी पाकै हुई गोई आ। |
This work is licensed under Creative Commons Attribution-ShareAlike 4.0 License.