इब्रानियों 2 - पहाड़ी महासुई

महान छ़ुटकारौ

¹ एथीलै आमुकै ज़ो खुशी री खौबर मिली आ तेथ माथै भौरी ध्यान दैणौ च़ांई, कैलैकि इणौ ना च़ांई थौ हुऔ कि आमै सौच़्च़ाई री बाटा कु पोरु भौटका।

² कैलैकि यहुदी लोगुऐ तिऊं नियमा माथै विश्वास कियौ ज़ो परमेश्‍वरै सौरगदूतु रै ज़ौरिऐ मुसा लै दै थै। ज़ेबी सै सौच़्च़ै साबित हुऐ ता हर गुनाह और हुकम नाईं मानणै वाल़ेऊ लै परमेश्‍वरै सौज़ा देई,

³ ता आमै पा किणै बौच़ी सौकी अगर आमै एस महान छ़ुटकारै री बेइज़्ज़ती कौरुलै? एस महान छ़ुटकारै रै बारै दी आमुकै प्रभु यीशु रै ज़ौरिऐ पौतौ लागौ आ। और च़ेलै ज़ुणिऐ सारेऊ कु पैहलै सेऊ शुणौ आमु माथै पौगड़ौ कियौ कि एऊ सौच़्च़ौ आ

⁴ और साथाई परमेश्‍वरै भी आपणी इच़्छ़ा रै मुताबिक निशाण, और नोखै काम, और कई रौंगा रै शक्ति वाल़ै काम, और पवित्र आत्मा रै वरदान बाण्डणा रै ज़ौरिऐ एथरी गवाही दैंदै थाकौ लागी।

आमारौ छ़ुटकारौ दैणै वाल़ौ

⁵ परमेश्‍वरै तिंया आशणै वाल़ी धौतरी रौ हक्क सौरगदूतु कै नाईं बल्कि प्रभु यीशु कै दैऔ आ। इऐ सेई धौतरी आ ज़ासरी आमै बुशै लाइंदै ई लागै औन्दै।

⁶ पवित्रशास्त्र एकी ज़ागाह दी इणी गवाही दिया आ कि, “आदमी का सा, कि तू तेस याद कौरा? या आदमी री सन्तान का सा, ज़ासरौ तू ध्यान छ़ाड़ा?

⁷ ताइंऐ सै शक्ति दी सौरगदूतु कु थोड़ौ कम कियौ। ताइंऐ तिउंलै राज़ै ज़िणी बौड़ाई और इज़्ज़त देई, और तेसलै आपणै हाथा रै कामा माथै हक्क दैऔ।

⁸ परमेश्‍वरै सारौ कुछ़ आदमी रै वशा दी कौरी ऐरौ आ।” एथीलै ज़ैबै तिणीऐ सारौ कुछ़ तिउंरै वशा दी कौरी ऐरौ, ता तिंउऐ कुछ़ भी नाईं छ़ाड़ौ, ज़ो तिउंरै वशा दी नाईं हुऔ, पर सौच़्च़ाई इऐ आ कि आमै आज़ भी सब कुछ़ लोगु रै वशा दी नाईं देखदै।

⁹ पर आमै यीशु ज़ो सौरगदूता कु थोड़ै बौगता लै कुछ़ ई कम की ऐरौ थौ, मौउता रै दु:ख उठाउणै री वज़ाह कु बौड़ाई और इज़्ज़ता रौ ताज़ भिड़ौ औन्दौ देखी ई। ताकी परमेश्‍वरा री बौड़ी दया कौरी सेऊ हर एक आदमी लै मौरा।

¹⁰ कैलैकि परमेश्‍वरै सारौ कुछ़ चाणौ और सारौ कुछ़ तेसी रौ आ, तेसकै इणौ ई आच़्छ़ौ लागौ कि ज़ेबी सेऊ भौरी लोगु बौड़ाई दी पौउंच़ावा, ता तिंउरै छ़ुटकारै लै बाट त्यार कौरीयौ तेथी दी तिउंरी अगुवाई कौरा।

¹¹ कैलैकि ज़ुण लोगु तिउंरै पापा कु शुद्ध कौरा आ और ज़ो लोग पापा कु शुद्ध कौरीया ई, तिऊं सारेऊ रौ बाब एका सा, एथीलै यीशु तिउंलै आपणै भाई-बौइणी बोलणा लै नाईं शौरमिंदौ।

¹² और यीशु परमेश्‍वरा लै बोला आ, “हाऊं आपणै लोगु कै बोलाऊ कि ताऐं मुलै केतरै भौलै काम किऐ ई, आराधना री खुंबल़ी मांझ़िऐ हाऊं तेरी महिमा कौराऊ।”

¹³ और तौंइऐ सेऊ बोला आ, “हाऊं तेस माथै भरोसौ छ़ाड़ाऊ।” और तौंइऐ इणौ बोला आ, “इदै हाऊं तिऊं लोगु आइलै ऊ ज़ो परमेश्‍वरै ई मुकै दैऔ औन्दै।”

¹⁴ कैलैकि ज़ासलै परमेश्‍वर आपणै लोग बोला आ, सै इन्सान ई, यीशु मसीह हर तरिकै दी आमु ज़िणौ बौणौ और दुनिया दी आशौ, ताकी तेसरी मौउता रै ज़ौरिऐ शैतान ज़ासकै मौउता माथै हक्क आ नाश हुआ।

¹⁵ और ज़ेती मौउता रै डौरा कु ज़िन्दगी भर गुलामी दी थै फौसै औन्दै, यीशु तिऊं पोरु छ़ुड़ावा।

¹⁶ कैलैकि यीशु ता सौरगदूतु नाईं पर अब्राहम रौ वंश सौंभाल़ा सा।

¹⁷ एज़ी वज़ाह कु तेसलै च़ांई थौ, कि सारी बुशु दी दुजै लोगु ज़िणै बौणा। ज़ासकु सेऊ तिऊं बुशु दी ज़ो परमेश्‍वरा आइलै मेल छ़ाड़ा सा, एक दया कौरणै वाल़ौ और विश्वासा रै लायक परधान याजक बौणा ताकी लोगु रै पापा लै माफी मांगा।

¹⁸ कैलैकि ज़ेबी यीशुऐ परिक्षा री हालता दी दुःख उठाऔ, ता सेऊ तिउंरी भी मज़द कौरी बौल़ा सा, ज़ासरी परिक्षा हुआ सा।