इब्रानियों 13 - पहाड़ी महासुईमसीह ज़िन्दगी ज़िउणै री सलाह 1 आपु मांझ़िऐ भाई-बौइणी ज़िणौ प्यार कौरौ। 2 तिऊं ज़ुरत वाल़ै बौटैणु री सेवा कौरौ ज़ास तुमै नाईं ज़ाणदै, कैलैकि एथरै ज़ौरिऐ कुछ़ लोगुऐ बिणा ज़ाणियौ सौरगदूता री सेवा की आ। 3 कैदीऊ रौ भी इणै ढौंगा कौरी हाल-च़ाल पुछ़दै थाकौ लागी, इणौ सौमझ़ौ कि तुमै भी तिऊं आइलै कैदी आ। और ज़ेज़ै लोगु आइलै बुरौ बरताव हुआ आ, तिऊंरौ भी इणै सौमझ़ियौ हाल-च़ाल पुछ़ौ ज़िणौ कि तुमै भी तिंउरै दु:खा दी साज़ी ई। 4 शादी सारै लोगु मांझ़िऐ इज़्ज़ता री बूश च़ांई सौमझ़णी, और एज़ै रिश्तै दी दुइया आपु मांझ़िऐ बफादार रौऔ, कैलैकि परमेश्वर गान्दै काम और बुरै काम कौरणै वाल़ेऊ रौ फैसलौ कौरा ई। 5 तुमै आपणी ज़िन्दगी धन-ज़यदादा रै लाल़च़ा कु दूर छ़ाड़ौ, और ज़ो कुछ़ तुमुकै आसा तेसी दी खुश रौऔ। कैलैकि परमेश्वरै आपु ई बोलौ आ कि, “हाऊं ताऊं केबी नाईं बिसुरदौ, और केबी ना छ़ाड़दौ।” 6 एथीलै आमै भरोसौ कौरीयौ बोली ई, “प्रभु मेरी मज़द कौरणै वाल़ौ आ, हाऊं नाईं डौरदौ। आदमी मैरौ कुछ़ नाईं कौरी सौकदौ।” 7 ज़ो तुमारै अगुवै थै, और ज़ुणिऐ तुमुकै परमेश्वरा रौ वचन शुणाऔ आ, तिऊं याद छ़ाड़ौ। और ध्याना कौरी तिउंरी ज़िन्दगी देखौ कि तिंउऐ आपणी ज़िन्दगी जीई आ, और सै मौरणै झ़ाऊं परमेश्वरा रै विश्वासा दी पाक्कै बौणी रौऐ। एथीलै आमुऐ भी तिणी विश्वास कौरणौ च़ांई ज़िणौ तिंउऐ कियौ थौ। 8 प्रभु यीशु मसीह ईज़ और आज़ जुगा-जुगा झ़ाऊं केबी ना बौदलिंदौ। 9 इऊं सारी नौईं और रौंगा-रौंगा री शिक्षा नाईं मानौ ज़ो तुमु बुरी बाटा दी निंया ई। कैलैकि तुमारै ज़िवा लै आच़्छ़ौ आ कि परमेश्वरा री बौड़ी दया रै ज़ौरिऐ मज़बूत बौणौ ना कि तिऊं नियम मानणै रै ज़ौरिऐ ज़ो खाणै रै बारै दी ई, ज़ेथकु रिश्तै छ़ाड़णै वाल़ै रौ कोई फाइदौ नाईं औन्दौ। 10 आमारी एक बेदी आ ज़ास माथा कु खाणै रौ हक्क तिऊं लोगु रौ नाईं, ज़ो ताम्बु री सेवा कौरा ई। 11 पुराणै वायदै रै मुताबिक हर साल परधान याजक जानवरा रौ लोऊ पापा री बौल़ी लै बौड़ी पवित्र ज़ागाह दी तिउंरै पापा री माफी लै निआं आ, और जानवरा रौ बौल़ी कौरौ औन्दौ शरीर लोगु रै ताम्बु कु दूर नीईंयौ ज़ाल़ा ई। 12 एथीई री वज़ाह कु, यीशुऐ भी लोगु लै आपणै ई लोऊ रै ज़ौरिऐ पवित्र कौरना लै यरुशलेमा कु बाइरै दुःख सहन किऔ और मौरी गौ। 13 एथीलै आशौ, आबै आमै यहुदी लोगु रै नियम छ़ाड़ियौ यीशु मसीह माथै विश्वास कौरीयौ ठीक तिणी ई तेस आइलै बेइज़्ज़ती वाल़ै दु:ख सहन कौरी। 14 कैलैकि इऐं दुनिया दी आमारौ सौदा लै रौइणै वाल़ौ कोई घौर नाईं आ। पर आमै तेस सौरगा रै घौरा लोड़दै ई लागै औन्दै ज़ो सौदा लै। 15 एथीलै आमै यीशु रै ज़ौरिऐ आपणै मुंआ कौरी परमेश्वरा री स्तुति और आराधना कौरदै थाकी लागी। ज़ो परमेश्वरा लै बौल़ी आ। 16 और भौलाई कौरना लै और एकी-दुजै री मज़द कौरना लै त्यार रौऔ, कैलैकि परमेश्वर इणी बौल़ी कु खुश औआ सा। 17 आपणै अगुवौ रौ हुकम मानौ और तिंउरै हक्का दी रौऔ, कैलैकि सै तुमु देखा ई कि तुमै आपणी बाटा कु भौटका नाईं। तिंउऐ आपणी सेवा रौ लेखौ जा दैणौ। तुमै तिउंरै हुकम मानौ ताकी सै इऊं कामा कौरी खुश हुआ, ना कि निराश, इऐ तुमुलै भी फाइदै वाल़ै ई। 18 आमुलै प्राथना कौरदै रौएऊ। आमुकै भरोसौ आ कि आमारौ मन साफ आ। और आमै सौभी बुशु दी ज़ो आमै कौरी ई परमेश्वरा री महिमा कौरणौ च़ाई। 19 प्राथना कौरना लै हाऊं तुमुलै औज़ौ भी हौसलौ दियाऊ, कि हाऊं शिगरी तुमु काऐ औज़ौ आशी बौल़ु। 20 आबै शान्ति दैणै वाल़ौ परमेश्वर तुमुलै तागत दिया आ। तिणीऐ आमारौ प्रभु यीशु सौदा रै वायदै रै लोऊ रै ज़ौरिऐ मौरै औन्दै मांझ़िऐ कु ज़िउंदौ कियौ आ। यीशु भेरीऊ रौ बौड़ौ रखवाल़ौ आ। 21 परमेश्वर तुमु हर एक भौली बुशु दी पाक्कै कौरा, ज़ासकु तुमै तेसरी इच़्छ़ा पुरी कौरौ, और ज़ो कुछ़ तेसकै आच़्छ़ौ लागा सा तेस यीशु मसीह रै ज़ौरिऐ आमुदी पुरौ कौरा। तेसी री महिमा जुगा-जुगा दी थाका औन्दै लागी। आमीन। 22 ओ मैरै प्यारै साथी विश्वासिउओ, हाऊं तुमुकै औरज़ कौराऊ कि इऐं चिट्ठी री बुशै सौबरा आइलै शुणौ, कैलैकि ज़ो मुंइऐ तुमुलै हिम्मत दैणा लै ई लिखी ऐन्दी। मुइंऐ तुमुलै इऐं चिट्ठी दी भौरी बुशै नाईं लिखी ऐन्दी। 23 तुमुकै इणौ याद आ कि तीमुथियुस आमारौ भाई ज़ेला कु छ़ुटी गौ आ, अगर सेऊ शिगरी आशा लौ ता हाऊं तेस आइलै तुमु कु मिलदै आशाऊ। 24 आपणै सारै अगुवै और सारै परमेश्वरा रै लोगु लै ढाल बोलौ। इटली देशा रै विश्वासी तुमुलै ढाल बोलाई। 25 तुमु सौभी माथै परमेश्वरा री बौड़ी दया थाकाली औन्दै लागी। आमीन। |
This work is licensed under Creative Commons Attribution-ShareAlike 4.0 License.