इब्रानियों 10 - पहाड़ी महासुईपाक्की बौल़ी 1 मुसा रै नियम, सिरफ आशणै वाल़ी आच़्छ़ी च़िज़ेऊ री छ़ांई आ, तिंउदी असली च़िज़ै नाईं आ। हर बौरशै एक ज़िणी बौल़ी च़ौड़ाउणै रै ज़ौरिऐ, सै नियम भौक्ती कौरणै वाल़ेऊ केबी भी सिद्ध नाईं कौरी बौल़ै। 2 अगर लोगु रौ परमेश्वरा री भौक्ती कौरणी तिऊं तिउंरै पापा कु सौच़्च़ी शुद्ध कौरा थौ, ता तिउंकै आपणै पाप कौरणै रौ कोई पश्ताव नाईं हुआ थौ, और तिंउऐ आपणै पापा लै बौल़ी च़ौड़ाउणी बन्द कौरणी थी। 3 पर हर बौरशै बौल़ी च़ौड़ाउणौ लोगु कु तिउंरै पाप याद कौरावा थौ। 4 कैलैकि इणौ हुणौ ता मुश्कल़ आ कि जानवरा रौ लोऊ पाप दूर कौरा सा। 5 एथीलै ज़ेबी मसीह दुनिया दी आशा आ और परमेश्वरा लै बोला आ, “बौल़ी और भेंट ताइंऐ नाईं च़ाई, पर ताइंऐ मुकै बौल़ी च़ौड़णा लै एक शरीर तयार कियौ आ। 6 होम-बौल़ी और पाप-बौल़ी कु तू खुश नाईं हुऔ। 7 तैबै मुइंऐ बोलौ, ‘ओ परमेश्वर, देख हाऊं तेरी मौरज़ी पुरी कौरना लै, आशी ऐरौ ऊ, ज़िणौ कि पवित्रशास्त्रा दी मैरै बारै दी लिखौ औन्दौ आ।’ ” 8 पैहलै मसीह ऐ इणौ बोलौ, “ना ताइंऐ बौल़ी और भैंटा और होम बौल़ीऊ और पाप बौल़ी च़ाई, और ना तू तिऊंकु खुश हुऔ,” कैलैकि इऐ बौल़ी ता मुसा रै नियमा रै मुताबिक च़ड़ावा ई। 9 और इणौ भी बोलाई, “ओ परमेश्वर, देख हाऊं तेरी मौरज़ी पुरी कौरना लै आशी गो ऊ।” एथीलै सेऊ बौल़ी कौरणै रौ पैहलौ तरिकौ पोरु कौरीयौ, तेथरी ज़ागाह दी नौंवौ तरिकौ आणा सा। 10 परमेश्वरा री इच़्छ़ा कु आमै यीशु मसीह रै शरीरा रै एकी बारै बौल़ी च़ौड़ाउणा रै ज़ौरिऐ सौदा लै पवित्र किऐ औन्दै ई। 11 हर एक याजक ता खौड़ै हुइयौ हर रोज़ सेवा कौरा सा, और एकी तरिकै कौरी घौड़ौ-घौड़ीयै बौल़ी च़ड़ावा आ, ज़ो पापु केबी भी दूर नाईं कौरी बौल़दै। 12 पर आमारौ परधान याजक मसीह आपु ई पापा री ताइंऐ एकी बारै बौल़ी च़ौड़ी गौ, ज़ो बौल़ी सौदा लै आ। और आबै परमेश्वरा री सुल़टी भिलै बोशी ऐरौ आ। 13 और मसीह तेबी कु इणौ लागौ औन्दौ ज़ागदै कि परमेश्वर तेसरै सारै दुश्मनु तेसरै वशा दी कौरा। 14 कैलैकि तिणीऐ एकी बौल़ी कौरीऐ सै सौदा लै पाक्कै कौरी गौऐ, ज़ुण तेसलै अलग ई किऐ औन्दै। 15 और पवित्र आत्मा भी आमुलै इणी ई गवाही दिआ। कैलैकि तिणीऐ पैहलै बोलौ थौ, 16 “प्रभु बोला आ कि ज़ो वायदौ हाऊं तिऊं दीनु बासिऐ तिऊं आइलै कौरुलै, सै एज़ै ई, कि हाऊं आपणै नियम तिंउरै ज़िवा दी लिखाऊ, और तिंउरै ज़िवा दी पा ऊ।” 17 तैबै सेऊ इणौ भी बोला आ, “हाऊं तिंउरै पाप माफ कौराऊ, और तिंउरै बुरै काम केबी भी याद नाईं कौरदौ।” 18 और ज़ेबी परमेश्वरै तिउंरै पाप माफ कौरी गौऐ, ता तौंइऐ पापा लै बौल़ी री कोई ज़ुरत नाईं रौई। परमेश्वरा रै नज़दीक डैऔ 19 एथीलै ओ विश्वासी भाईओ, आबै आमै यीशु रै लोऊ रै ज़ौरिऐ पुरै विश्वासा आइलै सौरगा रै भौरी पवित्र ज़ागाह दी डेई बौल़ी ई। 20 यीशु मसीह री मौउतै एक पौरदै रै ज़ौरिऐ भौरी पवित्र ज़ागाह दी एक नौईं और ज़िन्दगी दैणै वाल़ी बाट खोली। 21 और एथीलै कि आमारौ इणौ परधान याजक आ ज़ुण परमेश्वरा रै घौरा रौ हक्कदार आ, 22 ता आशौ आमै सौच़्च़ै ज़िऊ और पुरै विश्वासा कौरी परमेश्वरा काऐ डेउलै, कैलैकि आमारै ज़िवा रै गुनाह माथै मसीह रौ लोऊ छ़िड़कौ आ, और शरीर शुद्ध पाणी कौरी धोई गौऐ ई, कि आमै शुद्ध बौणु। 23 आबै आमै बिण शका कौरीयौ आपणी तिऐं आशा दी पाक्कै रौऊ, ज़ो आमुऐ अपणाऔ आ, कैलैकि ज़ुणिऐ वायदौ कियौ आ, सेऊ विश्वास वाल़ौ आ। 24 आमै प्यार, और भौलै कामा बौड़ाउणा लै एकी दुजै री फिकर थाकी कौरदै लागी। 25 और एकी दुजै आइलै आराधना कौरना लै कौठै हुणौ नाईं छ़ाड़ौ, ज़िणौ कि कुछ़ लोग कौरा ई, पर एकी दुजै कै हौसलै दैंदै थाकौ लागी। और ज़िणौ-ज़िणौ तुमै प्रभु रै वापिस आशणै रौ दीन नज़दीक आशदै देखा लै, ता तिणौ-तिणौ तुमै एकी दुजेऊ रौ हौसलौ औज़ौ भी बौड़ाउंदै थाकौ लागी। 26 कैलैकि सौच़्च़ाई रै ज्ञान पाइणै बासिऐ अगर आमै ज़ाणी बुज़ियौ पाप कौरदै रौईलै, ता पापा लै तैबै कोई बौल़ी बाकी नाईं आसती। 27 ओ, सौज़ा रौ एक भयानक दीन और आगी री लुपी इबी रौई औन्दी आ ज़ो परमेश्वरा रै बिरोधिऊ रौ नाश कौरा सा। 28 ज़ैबै की मुसा रै नियम नाईं मानणै वाल़ौ, दुई या चीन ज़ौणेऊ री गवाही माथै, बिणा दया कौरी पोरु झ़ांगा थै, 29 ता सुंच़ौ कि सेऊ केती बौड़ी सौज़ा रै लायक बौणा, ज़ुणिऐ परमेश्वरा रौ छ़ोहरु बांगणै कौरी फेंच़ौ और वायदा रै लोऊ रौ, ज़ेथारै ज़ौरिऐ सेऊ पवित्र थौ बौणौ औन्दौ, अपवित्र ज़ाणौ आ, और बौड़ी दया री आत्मा बेइज़्ज़त की ई। 30 कैलैकि आमै तेस ज़ाणी आ, ज़ुणिऐ बोलौ, “बौदल़ौ निणौ मैरौ काम ई, हाऊं ई बौदल़ौ दियाऊ।” और तैबै इणौ, कि “प्रभु आपणै लोगु रौ फैसलौ कौरा सा।” 31 ज़िउंदै परमेश्वरा रै हाथा दी पौड़नौ डराऊंदी बूश आ। 32 तुमै तिऊं पिछ़लै दीनु याद कौरौ, ज़ेबी तुमुऐ मसीह रै वचना रौ प्याशौ पाऔ आ ता तुमै दु:खा रै बौड़ै कौष्टा दी मज़बूत रौऐ। 33 कई बारै ता इणौ हुऔ कि तुमारी सारेऊ रै सामनै बेइज़्ज़ती हुई और तुमुऐ भौरी दु:ख सहन कियौ। और कई बारै तुमुऐ तिंउलै भौरी फिकर की ज़ास आइलै इणौ हुऔ थौ। 34 कैलैकि तुमै कैदीऊ रै दुखा दी भी दुखी हुऐ, और आपणी ज़यदाद भी खुशी कौरी लुटणै देई, इणौ ज़ाणियौ कि तुमुकै सौरगा दी एक औज़ौ भी खास और सौदा लै रौइणै वाल़ी ज़यदाद आ। 35 एथीलै ज़ेबी तुमु सौतावा ई ता तुमै हिम्मत कौरणी ई, कैलैकि तेथरौ इनाम बौड़ौ आ। 36 इणै बौगता दी तुमुलै ज़ुरत आ सौबरा री, कि ज़ेबी तुमै परमेश्वरा री इच़्छ़ा पुरी कौरीयौ ज़ो तुमुलै वायदौ आ कियौ औन्दौ सेऊ मिला। 37 कैलैकि ज़िणौ पवित्रशास्त्रा दी आ लिखौ औन्दौ कि, “आबै भौरी ई थोड़ौ बौगत रौई ऐरौ आ, ज़ैबै कि आशणौ वाल़ौ आशा सा और बेर नाईं पांइदौ। 38 पर मैरौ धौर्मी ज़ौणौ विश्वासा कौरी ज़िउंदौ रौआ आ। ज़ुण डौरीयौ विश्वास पोरु छ़ाड़ा आ ता हाऊं तेसकु खुश नाईं हुंदौ।” 39 पर आमै तिऊं बाशीऐ नाईं ज़ुण डौरीयौ परमेश्वरा कु दूर हुआई कि नाश हुआ लै, पर आमै तिऊं बाशीऐ ई ज़ुण विश्वासा रै ज़ौरिऐ ज़िन्दगी पा ई। |
This work is licensed under Creative Commons Attribution-ShareAlike 4.0 License.