गलातियों 5 - पहाड़ी महासुईआज़ादी सौंभाल़िऔ छ़ाड़ौ 1 मसीह ऐ आमै आज़ाद किएई ताकी आमै मुसा रै नियम मानणै कु आज़ाद रौई सौकी। एथीलै आज़ादी दी अटल रौऔ और कासी कै हक्क नाईं दैऔ कि सेऊ तुमु मुसा रै नियम मानणा लै तुमु गुलाम चाणा। 2 ध्याना कौरी शुणौ, ज़ो हाऊं तुमुलै बोलणै वाल़ौ ऊ, कि अगर परमेश्वरा आइलै धौर्मी बौणना लै खतनौ कौरावा लै, ता ज़ो मसीह ऐ तुमुलै कियौ आ तेथकु तुमुलै कुछ़ भी लाभ नाईं हुंदौ। 3 हाऊं तुमुलै तौंइऐ काट्ठै कौरीऐ बोलाऊ कि हर एक आदमी ज़ुण आपणौ खतना कौराउआ तिणीऐ यहुदिऊ रै सारै नियम मानणै जा ई। 4 तुमै ज़ुण मुसा रै नियम मानणै रै ज़ौरिऐ धौर्मी बौणनौ च़ाहा ई, मसीह कु अलग और बौड़ी दया कु लोटी गौऐ ई। 5 कैलैकि पवित्र आत्मा री वज़ाह कु आमै विश्वासा कु, आश की ऐन्दी धार्मिकता री बाट लोड़ी ई। 6 मसीह यीशु दी ना खतना, और ना बिण खतनै वाल़ै कुछ़ कामा रै ई, पर सिरफ विश्वास, ज़ो प्यारा रै ज़ौरिऐ असर पा ई। 7 तुमै ता मसीह रै रिश्तै दी आच़्छ़ा कौरी थै बौड़दै लागै औन्दै, आबै कुणिऐ रोकै ई कि तुमै सौच़्च़ाई नाईं मानौ। 8 इणी शिक्षा परमेश्वरा री तौरफा कु नाईं आसती ज़ुण तुमु आपणै लोल़डै हुणा लै चुना आ। 9 इऐ एक कहावत आ! थोड़ौ ज़ेई सौंज़ेड़ौ सारौ मुछ़ौ औन्दौ पिठौ ओसारा सा। 10 हाऊं प्रभु माथै तुमारै बारै दी भरोसौ छ़ाड़ाऊ कि तुमारौ केज़ौ भी दुजौ बिच़ार नाईं औलौ। पर ज़ो तुमु घबरावा सा, सेऊ च़ाऊ केज़ौ भी औलौ परमेश्वरा कु सौज़ा पा सा। 11 ओ मैरै प्यारै साथी विश्वासिउओ, अगर हाऊं इबी झ़ांऊ खतना रौ परचार कौराऊ, ता इबी झ़ाऊं कैलै सतावा ई? तैबै ता क्रुसा रौ विरोध भी खातम हुणौ थौ। 12 भौलौ ता इणौ हुआ थौ कि ज़ुण तुमु घबरावा ई, सै आपणौ आंग ई पोरु काटा थै। 13 ओ मैरै प्यारै साथी विश्वासिउओ परमेश्वरै तुमै आज़ाद हुणा लै ई औटाऐ औन्दै। एथीलै आबै तुमै मुसा रै नियम बिल्कुल नाईं मानौ और ना इऐं आज़ादी आपणै शरीरा री इच़्छ़ा पुरी कौरणै ज़ौरियौ चाणौ, बल्कि एकी दुजै आइलै प्यार और सेवा कौरौ। 14 कैलैकि सारै नियम इऐं एक ई बुशा दी पुरी हुआ सा, “तू आपणै पड़ोसी आइलै आपु ज़िणौ प्यार छ़ाड़।” 15 पर अगर तुमै एकी दुजेऊ जानवरा ज़िणै दांदा कौरी चाकाई और च़िराई ता च़ोकसिऐ रौ! कि एकी दुजै रौ सत्यनाश ना कौरौ। पवित्र-आत्मा कौरी च़ौलाईणौ 16 पर हाऊं बोलाऊ पवित्र आत्मा रै मुताबिक च़ालौ ता तुमै शरीरा री इच़्छ़ा केज़ै भी तरिकै कौरी पुरी ना कौरालै। 17 कैलैकि शरीर आत्मा रै विरोधा दी और आत्मा शरीरा रै विरोधा दी इच़्छ़ा कौरा सा, और इऐ एकी दुजै रै विरोधी ई, एथीलै कि ज़ो तुमै कौरणौ च़ाहा ई तेस नाईं कौरी सौका। 18 और अगर तुमै पवित्र आत्मा रै मुताबिक च़ालालै ता नियमा री गुलामी दी नाईं रौ। 19 शरीरा रै काम ता पौगड़ै ई यानी कि गान्दै काम, बुरै काम, लुचपन, 20 मुर्तिपूज़ा, टूणौ, दुश्मनी, झ़ौगड़ौ, ईर्ष्या, रोश, विरोध, फूट, विधर्म, 21 डाह, च़ाखणौ-माच़णौ, लीलाक्रीड़ा और इऊं ज़िणै ओर भी काम ई एथरै बारै दी हाऊं तुमुकै पैहलै छ़ाड़ाऊ बोली, ज़िणौ पैहलै भी बोलौ औन्दौ, कि इणै-इणै काम कौरणै वाल़ै परमेश्वरा रै राज़्य रै वारीस नाईं औन्दै। 22 पर आत्मा रौ फल़ “प्यार, आनन्द, शान्ति, धीरज, 23 कृपा, भौलाई, विश्वास, नम्रता, और संयम ई।” इणै-इणै कामा रै विरोधा ई केज़ौ भी नियम नाईं आसतौ। 24 और ज़ुण यीशु मसीह रै ई, तिंउऐ शरीर लालसा और इच़्छ़ा समेत क्रुसा माथै च़ौड़ाई गौऐ। 25 अगर आमै आत्मा कौरी ज़िउंदै ई, ता आत्मा कौरीऐ च़ालणै भी च़ांई। 26 आमै घमण्डी हुइयौ एकी-दुजै नाईं च़ांई छ़ेड़नै, और ना एकी-दुजै कु ज़ौल़नौ च़ांई। |
This work is licensed under Creative Commons Attribution-ShareAlike 4.0 License.