गलातियों 3 - पहाड़ी महासुई

कानून और विश्वास

¹ ओ बेअकलै गलातियों रै विश्वासिउओ, तुमै कुणिऐ बिश्वाशै ई? मुंइऐ तुमै सारेऊ रै सामनै आच़्छ़ा कौरी सौमझ़ाऐ ई कि यीशु मसीह केज़ै कारणै तुमारी खातिर क्रुसा माथै मौरौ आ!

² हाऊं तुमु कु सिरफ इणौ ज़ाणनौ च़ाहा ऊ कि, का तुमुऐ पवित्र आत्मा मुसा रै नियमा मानणै कु पाऔ आ या विश्वासा री खुशी री खौबरी कु पाऔ आ?

³ का तुमै इणै बेअकले ई कि पवित्र आत्मा री रीती कु शुरु कौरीयौ आबै शरीरा री रीती माथै खातम कौरा ई?

⁴ तुमुऐ विश्वासी बौणनै बासिऐ भौरी दुःख झ़ेलै ई। पर मुकै पुरी आश आ कि सै दु:ख बेकार नाईं डेवै।

⁵ परमेश्‍वर तुमुलै पवित्र आत्मा भौरी दिया सा और तुमु दी हैरानी वाल़ै काम कौरा सा, का इणौ एथीलै हुऔ आ कि तुमुऐ मुसा रौ नियम मानौ आ, या का एथीलै हुआ कि तुमुऐ मसीहा री खुशी री खौबर शुणी और तेथ माथै विश्वास किऔ आ?

⁶ अब्राहमा रै बारै दी सुंच़ौ, “तिणीऐ ता परमेश्‍वरा माथै विश्वास कियौ और सै तेसलै धार्मिकता गौणुऔ।”

⁷ तुमै इणौ सौमझ़ौ कि ज़ो विश्वास कौरणै वाल़ै ई, सेई अब्राहमा री सन्तान ई।

⁸ भौरी पैहलै पवित्रशास्त्रा दी थौ लिखौ औन्दौ कि परमेश्‍वर दुजी ज़ाती वाल़ेऊ विश्वासा रै ज़ौरिऐ धौर्मी चाणा आ, परमेश्‍वरै अब्राहमा कै एज़ी आच़्छ़ी खौबर पैहला कु शुणाई एरी थी कि “तैरै ज़ौरिऐ सारी ज़ाती रै लोग आशीष पा लै।”

⁹ एथीलै ज़ुण परमेश्‍वरा माथै अब्राहमा ज़िणै विश्वास कौरा ई, परमेश्‍वर तिउंलै तिणी ई आशीष दिया सा ज़िणौ अब्राहमा लै देई आ।

¹⁰ एथीलै ज़ेती लोग परमेश्‍वरा आइलै धौर्मी हुणा लै मुसा रै नियमा माथै भरोसौ छ़ाड़ाई, सै सारै श्रापा रै बौशा दी ई, कैलैकि पवित्रशास्त्रा दी आ लिखौ औन्दौ कि, “ज़ुण मुसा रै नियमा दी लिखी ऐन्दी सारी बुशेऊ नाईं मानदौ सै श्रापित आ।”

¹¹ पर इऐ बूश साफ आ कि मुसा रै नियम मानियौ कोई भी आदमी परमेश्‍वरा काऐ धौर्मी नाईं बौणी बौल़दौ, कैलैकि पवित्रशास्त्रा दी इणौ आ लिखौ औन्दौ कि, “ज़ुण परमेश्‍वरा माथै विश्वास कौरा आ सेऊ तेस धौर्मी चाणा आ और तेसलै सौदा री ज़िन्दगी दिया आ।”

¹² पर मुसा रै नियमा रौ, विश्वासा आइलै कोई भी रिश्तौ नाईं आसतौ, कैलैकि पवित्रशास्त्रा दी आ लिखौ औन्दौ कि, “ज़ुण इऊं सारी बुशै माना लौ सेऊ तेथरी वज़ाह कु ज़िउंदौ रौआ सा।”

¹³ मसीहै ज़ो आमुलै शापित बौणौ, आमै मोल निऐं और नियमा रै श्रापा कु छ़ुड़ाऐ ई, कैलैकि पवित्रशास्त्रा दी आ लिखौ औन्दौ आ कि, “ज़ुण-कुण क्रुसा माथै लटकाइआ सेऊ श्रापित आ।”

¹⁴ मसीहीऐ इणौ एथलै कियौ आ कि अब्राहमा री आशीष यीशु मसीह दी दुजी ज़ातीऊ झ़ांऊ पहुंच़ा, और आमै मसीह दी तेस विश्वासा रै ज़ौरिऐ पवित्र आत्मा पाउलै ज़ेथरौ दैणै रौ वायदौ तिणीऐ आमु आइलै कियौ थौ।

कानून और वाच़ा

¹⁵ ओ मैरै प्यारै साथी विश्वासिउओ, हाऊं रोज़की ज़िन्दगी रौ औनैणै देइयौ तुमुलै बोलाऊ। ज़ेबी दुई आदमी आपु माझ़िऐ कुछ़ भी करारनामौ पाक्कौ कौरा ई, ता इणौ कोई ना ज़ुण तेस करारनामौ पोरु बौदल़ा और खारिज कौरा।

¹⁶ परमेश्‍वरै आपणै वायदै अब्राहम और तेसरै वंशा आइलै किऐ थै पवित्रशास्त्रा दी इणौ नाईं आ लिखौ औन्दौ कि, “तुमारै वंशा लै” ज़िणौ भौरीऊ रै बारै दी बोलौ। पर ज़िणौ एकी आदमी रै बारै दी बोलौ कि, “तैरै वंशा लै” और सेऊ आदमी मसीह आ।

¹⁷ पर मैरै बोलणै रौ मतलब इणौ आ कि, परमेश्‍वरै अब्राहमा आइलै एक वायदौ कियौ आ। ता परमेश्‍वरै मुसा कै च़ार शौ तीस साला बासिऐ नियम दैऔ थौ बासिऐ सेऊ नियम तेस वायदौ खारिज नाईं कौरी सौकदी, कि वायदौ बेकार बौणा।

¹⁸ परमेश्‍वर तुमुकै आपणी आशीष नाईं दैंदौ कैलैकि तुमुऐ मुसा रै नियम मानै ई, पर तैबै भी सेऊ दिया सा कैलैकि तिणीऐ वायदौ कियौ आ। परमेश्‍वरै अब्राहमा कै तिणी ई आशीष देई कैलैकि परमेश्‍वरै तेस आइलै वायदौ थौ कियौ औन्दौ।

¹⁹ तैबै नियम दैणै रौ का मतलब आ? सै ता पापा री वज़ाह कु बासिऐ देई आ कि तेस वंशा आशणै झ़ांऊ रौआ, ज़ासकै वायदौ दैऔ थौ। और नियम सौरगदूता रै ज़ौरिऐ एक बिशटु रै हाथा दी सांबी गोई

²⁰ परमेश्‍वरै आपु अब्राहमा आइलै वायदौ कियौ। एथीलै तेसकै कासी भी बिशटु री ज़ुरत नाईं पौड़ी।

नियमा रौ मकसद

²¹ तैबै का नियम परमेश्‍वरा रै वायदै रै बिरोधा दी आ? नाईं केबी नाईं! कैलैकि अगर इणौ नियम दिआ थै, ज़ो ज़िन्दगी दिआ थी ता सौच़्च़ी ई धार्मिकता नियमा कौरीऐ हुआ थी।

²² पर पवित्रशास्त्र ता इणौ देखावा कि आमै सारै पापी ई, ताकी सेऊ वायदौ ज़ेथरौ आधार यीशु मसीह माथै विश्वास कौरणौ आ, विश्वास कौरणै वाल़ेऊ लै पुरी हुआ।

²³ पर विश्वासा रै आशणै कु पैहलै नियमा दी रौइयौ आमारी च़ोकसी हुआ थी, और तेस विश्वास आशणै झ़ांऊ ज़ो पौगड़ौ हुणै वाल़ौ थौ आमै तेसी रै बन्धना दी रौऐ।

²⁴ एथीलै नियम आमुकै दैऔ थौ कि मसीह रै आशणै झ़ाऊं सेऊ आमारी अगुवाई और ध्यान छ़ाड़ा कि आमै मसीह माथै विश्वास कौरणै री वज़ाह कु परमेश्‍वरा काऐ धौर्मी बौणा।

²⁵ आबै आमुऐ आपणौ विश्वास मसीह माथै छ़ाड़ी गौ आ, ता आमुकै आबै आमारै अगुवाई लै नियमा री कोई ज़ुरत नाईं।

²⁶ कैलैकि तुमै सारै मसीह माथै विश्वासा रै ज़ौरिऐ परमेश्‍वरा री सन्तान बौणी गौऐ ई।

²⁷ और तुमु मांझ़िया कु ज़ेतिउऐ मसीह दी बपतिस्मौ निऔं आ तिंउऐ मसीह रौ च़ाल-च़लण अपणाई ऐरौ आ।

²⁸ आबै ना कोई यहुदी रौ और ना दुजी ज़ाती रौ, ना कोई नुकुर ना आज़ाद, ना कोई मौरद ना छ़ेउड़ी, कैलैकि तुमै सारै मसीह दी एका ई।

²⁹ और अगर तुमै मसीह रै ई ता अब्राहमा रै वंश और वायदा रै मुताबिक वारीस भी ई।