इफिसियों 5 - पहाड़ी महासुईप्याशै रै छ़ोहरु बौणौ 1 तुमै परमेश्वरा री सन्तान ई ज़ास आइलै सेऊ प्यार कौरा आ, ता तेस ज़िणै बौणनै री कोशिश कौरौ, 2 प्यार कौरौ ज़िणौ मसीहै भी तुमु आइलै प्यार कियौ आ। सेऊ आमारी ताइंऐ परमेश्वरा काऐ आपु खुशबुदार भेटा और बौल़ी हुऔ आ. 3 ज़िणौ परमेश्वरा रै लोगु लै ठीक आ, तिणौ तुमु दी बुरै काम और किणी भी रौंगा रै बुरै काम या लाल़च़ा री बुशै झ़ांऊ ना च़ांई हुई। 4 और ना बेशर्मी, और ना मुर्खा वाल़ी बुशु री, और ना मज़ाका री। कैलैकि तुमुकै इऐ बुशै नाईं डौबदी, बल्कि तुमुऐ परमेश्वरा रौ धन्यबाद च़ांई कौरणौ। 5 कैलैकि तुमै इणौ आच़्छ़ा कौरीऐ ज़ाणाई कि केज़ै भी बुरै, या गान्दै आदमी, या लाल़च़ी आदमी लै, ज़ो मूर्ती पुज़ा रै बराबर ई, मसीह और परमेश्वरा रै राज़ा ई कोई ज़ागाह नाईं। 6 कोई तुमुलै बिण मतलबा री बुशु कौरी धोखौ ना च़ांई दैऔ, कैलैकि इणै कामा री वज़ाह कु परमेश्वरा रै रोश पाप कौरणै वाल़ेऊ माथै भौड़का आ। 7 एथीलै तुमै पाप वाल़ी बुशु दी तिंउरै साथी नाईं बौणौ। 8 कैलैकि तुमै ता पैहलै न्यारै दी थै पर ज़ेबी कु प्रभु रै लोग बौणै ई तेबी कु प्याशै दी ई, एथीलै प्याशै रै छ़ोहरु ज़िणै च़ालौ 9 कैलैकि प्याशै रौ फौल़ भौलाई, धार्मिकता और सौच़्च़ाई आ; 10 इणौ लोड़ौ कि प्रभु कै आच़्छ़ौ का लागा। 11 और तुमै पाप वाल़ी बुशु दी तिउंरै साथी नाईं बौणौ बल्कि लोगु कै इणौ देखाऔ कि इऐ काम बुरै ई। 12 कैलैकि अविश्वासिऊ रै छ़ुपै औन्दै कामा री बातच़ीत भी शौरमा री बूश आ। 13 सै सारै काम, ज़ो प्याशै कौरी पौगड़ौ हुआई, सै दिशा ई, ज़ुण सारौ कुछ़ पौगड़ौ कौरा आ सेऊ प्याशौ आ। 14 इणी एक कहावत आ कि, “ओ सुतणैवाल़ेउओ, उठौ मौरै औन्दै मांझ़िया कु ज़िउंदै हुऔ। ता मसीह आपणौ प्याशौ तुमु दी च़ौमकावा आ।” 15 एथीलै ध्याना कौरी देखौ, कि किणी च़ाल च़ाला ई मुर्खा ज़िणै नाईं बल्कि बुध्दिमाना ज़िणै च़ालौ। 16 भौलाई कौरणै रौ हर मौकौ ज़ो तुमुकै आ, तेस किम्मत्ती सौमझ़ौ, कैलैकि दीन बुरै ई। 17 एज़ै कारणै मुर्ख नाईं बौणौ, पर ध्याना कौरी सौमझ़ौ कि प्रभु री इच़्छ़ा का सा। 18 अंगुरा रै रसा पीईयौ माच़ै औन्दै नाईं बौणौ, कैलैकि एथ कौरी बुराई पैदी हुआ आ। पर पवित्र आत्मा कु भौरिंदै थाकौ लागी, 19 और आपु मांझ़िऐ भजन और स्तुति गाऔ और ज़ो गीत आमुकै पवित्र आत्मा दिया सा तेस गाइंदै थाकौ लागी, और आपणै-आपणै मौनाई प्रभु काऐ गाइंदै और भौक्ती कौरदै थाकौ लागी। 20 और सौदा हर बुशा लै आमारै प्रभु यीशु मसीह रै नावां दी परमेश्वर बाबा रौ धन्यबाद थाकौ कौरदै लागी। 21 यीशु मसीह दी इज़्ज़ती री वज़ाह कु एकी-दुजै रै अधीन रौऔ। पत्ति और पत्नि 22 ओ छ़ेउड़िओ, आपणै-आपणै बोउटै रै इणै अधीन रौऔ ज़िणै प्रभु रै अधीना दी रौआ ई। 23 कैलैकि बोउटौ छ़ेउड़ी रौ मूंड आ ज़िणौ कि मसीह कलिसिया रौ मूंड आ और मसीह कलिसिया रौ छ़ुटकारौ दैणै वाल़ौ आ ज़ो तेसरौ आपणौ शरीर आ। 24 ज़िणी कलिसिया मसीह रै अधीन आ, तिणी ई छ़ेउड़ी भी आपणै-आपणै बोउटै रै अधीन च़ांई रौई। 25 ओ बोउटेउओ, आपणी-आपणी छ़ेउड़ी आइलै प्यार कौरौ ज़िणौ मसीहै कलिसिया आइलै प्यार कौरीयौ आपणी ज़िन्दगी कलिसिया लै देई एरी आ 26 ताकी तिऐं आपणै वचना कौरी धोइयौ पापा कु शुद्ध कौरीयौ आपुलै अलग कौरा, 27 और तिऐं एक इणी च़ौमकणै वाल़ी कलिसिया चाणियौ आपु काऐ खौड़ी कौरा, ज़ासदी ना कलंक, ना गुड़ी, और ना केज़ी इणी च़िज़ै हुआ बल्कि पवित्र और बेदाग वाल़ी हुआ। 28 इणी ई कौरी बोउटै आपणी-आपणी छ़ेउड़ी कु आपणै शरीरा ज़िणौ प्यार कौरालौ। ज़ुण आपणी छ़ेउड़ी कु प्यार कौरा आ, सेऊ आपु कु प्यार कौरा आ। 29 कैलैकि कोइऐ केबी भी आपणै शरीरा आइलै दुश्मनी नाईं छ़ाड़ी बल्कि तेसरौ पालन-पोषण ई किऔ, ज़िणौ मसीह भी कलिसिया आइलै कौरा आ। 30 एथीलै कि आमै मसीह रै शरीरा रै आंग ई। 31 ज़िणौ पवित्रशास्त्रा दी आ लिखौ औन्दौ, “एज़ै कारणै आदमी आपणै मां-बाब छ़ाड़िऔ आपणी छ़ेउड़ी कु मिली थाका, और सै दुइया एक शरीर हुआई।” 32 एऊ भेद ता बौड़ौ आ, पर हाऊं इदै मसीह और कलिसिया रै बारै ई बोलाऊ। 33 पर तुमु मांझ़ी हर एक आपणी छ़ेउड़ी आइलै आपु ज़िणौ प्यार कौरा, और छ़ेउड़ी भी आपणै बोउटै री इज़्ज़त कौरा। |
This work is licensed under Creative Commons Attribution-ShareAlike 4.0 License.