इफिसियों 3 - पहाड़ी महासुईओरी ज़ातीऊ मांझ़िऐ पौलुसा री सेवा 1 एथीलै हाऊं पौलुस तुमुलै प्राथना कौराऊ। हाऊं एज़ी वज़ाह कु ज़ेला दी ऊ कैलैकि हाऊं तुमु दुज़ी ज़ाती रै लोगु कै मसीह री खुशी-खौबरी शुणावा ऊ। 2 तुमुऐ इणौ पाक्कौ शुणौ औलौ कि एऊ काम परमेश्वरै मुकै आपणी तिऐं बौड़ी दया रै ज़ौरिऐ तुमारी मज़द कौरना लै दैऔ आ। 3 ज़िणौ मुंइऐ पैहलै तुमुलै थोड़ौ लिखौ थौ, कि परमेश्वरै आपु मुं माथै आपणै भेद वाल़ी बुशै पौगड़ी की ई। 4 और ज़िणौ तुमै तिऐं चिट्ठी पौड़ालै ता इणौ भी ज़ाणी सौका ई कि हाऊं केती आच़्छ़ै कौरीऐ मसीह रै भेदा रै बारै दी सौमझ़ा ऊ। 5 पिछ़लै बौगता दी परमेश्वरै एऊ भेद लोगु माथै पौगड़ौ नाईं कियौ थौ, पर आबै पवित्र आत्मै सेऊ भेद आपणै पवित्र प्रेरितु और भविष्यवक्तु माथै पौगड़ौ कौरी गौ आ। 6 एऊ परमेश्वरा रौ भेद आ कि यीशु मसीह दी खुशी री खौबरा रै ज़ौरिऐ दुजी ज़ाती रै लोग विरासता दी भागी, एक ई शरीरा रै और वायदै रै भागी ई। 7 हाऊं परमेश्वरा री बौड़ी दया रै तेस दाणा रै मुताबिक, ज़ो तेसरी शक्ति रै असरा रै मुताबिक मुकै दैऔ औन्दौ, तेस खुशी री खौबरा रौ सेवक बौणौ। 8 हाऊं ज़ुण परमेश्वरा रै सारै लोगु मांझ़िऐ सारेऊ कु छ़ोटौ ऊ, मुं माथै इऐ बौड़ी दया हुई कि हाऊं दुजी ज़ातीऊ लै खुशी री खौबर शुणाई सौकु, कि मसीह केबी ना खातम हुणै वाल़ी आशीषा रौ ज़ौरियौ आ, 9 और हाऊं सारै लोगु कै एस भेद सौमझ़ाऊ कि परमेश्वर ज़ुण सारी च़िज़ु चाणनै वाल़ौ आ तिणीऐ शुरुवाता कु एऊ भेद च़ोरौ औन्दौ थौ। 10 आबै कलिसिया रै ज़ौरिऐ परमेश्वरा रौ अलग-अलग रौंगा रौ ज्ञान आसमाना रै परधान और आफसरु माथै पौगड़ौ कौरीया लौ। 11 परमेश्वरै एऊ आपणी सौदा री योजना रै मुताबिक कियौ आ, ज़ो तिणीऐ आमारै प्रभु यीशु मसीह रै ज़ौरिऐ पुरौ कियौ आ। 12 ज़ासदी आमुलै तेस माथै विश्वास कौरणै कु हिम्मत और भरोसै आइलै परमेश्वरा रै नज़दीक आशणै रौ हक्क आ। 13 हाऊं औरज़ कौराऊ कि ज़ेज़ै दु:ख तुमुलै मुकै हुआई, सेज़ी वज़ाह कु हिम्मत ना छ़ाड़ौ, कैलैकि इयौ सारौ तुमारै फाइदै लै आ। मसीह रौ प्यार 14 हाऊं एज़ै वज़ाह कु परमेश्वर बाबा काऐ घुंडै टेकाइयौ प्राथना कौराऊ, 15 सेऊ एका सा ज़ुण सौरगा रौ और धौतरी माथै रौइणै वाल़ै सारै विश्वासिऊ रौ बाब आ। 16 हाऊं प्राथना कौराऊ कि सेऊ आपणी महिमा री धन-ज़ायदादा रै मुताबिक तुमुलै इणौ दाण दिया कि तेसरी आत्मा कौरी शक्ति मिला ताकी तुमारै ज़िऊ मज़बूत बौणा, 17 और विश्वासा रै ज़ौरिऐ मसीह तुमारै ज़िवा दी बौसा। कि प्यारा दी मज़बूत और अटल रौइयौ, 18 तुमै सारै परमेश्वरा रै लोग, मसीह रै प्यारा री लम्बाई, च़ौड़ाई, उंच़ाई, और गहराई सौमझ़ी सौका। 19 हाऊं प्राथना कौराऊ कि तुमै मसीह रौ सेज़ौ प्यार ज़ाणी सौका ज़ो ज्ञाना कु बौड़ौ आ ताकी परमेश्वर तुमु आपणै सवभाव कौरी भौरा। 20 आबै परमेश्वर ज़ुण इणौ शक्तिशाल़ी आ कि आमारी औरज़ और सौमझ़ा कु कई भौरी काम कौरी सौका आ, सेज़ी शक्ति कौरी ज़ो आमुदी काम कौरा आ, 21 कलिसिया दी और मसीह यीशु दी तेसरी महिमा पीड़ी कु पीड़ी झ़ांऊ जुगा जुगा झ़ांऊ औन्दै थाकाली लागी। आमीन। |
This work is licensed under Creative Commons Attribution-ShareAlike 4.0 License.