कुलुस्सियों 4 - पहाड़ी महासुई1 ओ मालिकुओ, आपणै-आपणै नुकरु आइलै फैसलौ और तिऊं आइलै ठीक रौऔ, इणौ सौमझ़ियौ कि सौरगा दी तुमारौ भी एक मालिक आ। कुछ़ च़ाल-च़ालणा री सलाह 2 लगातार प्राथना कौरदै थाकौ लागी, और धन्यबादा आइलै तेसदी खौबरदार रौऔ। 3 और एथीई आइलै आमुलै भी प्राथना कौरदै थाकौ लागी, कि परमेश्वर आमुलै वचन शुणाउंणा लै मौकौ दिया, कि आमै मसीहा रै तेस भेदा रै बारै दी सौमझ़ाई बौल़ु ज़ेथरी वज़ाह कु हाऊं ज़ेला दी ऊ, 4 और प्राथना कौरौ कि हाऊं मसीह रौ परचार साफ-साफ और खुलैआम कौरी बौल़ु। 5 ताकी तुमै बौगत किमती सौमझ़ियौ इणौ देखाऔ कि तुमै विश्वासी ई। 6 तुमारी बुशै-धाशै सौदा निउलै कौरी और भौलाई री हुणी च़ांई, कि तुमुकै हर आदमी लै आपणै विश्वासा रै बारै दी ठीक-ठीक ज़वाब दैणौ आशा। आखरी ढाल 7 प्यारै विश्वासी भाई और विश्वास वाल़ौ सेवक, तुखिकुस, ज़ो प्रभु दी मुं आइलै साथी आ, मेरी सारी बुशै तुमुलै बोलाई। 8 सेऊ मुंइऐ एथीलै तुमु काऐ भेज़ौ आ, कि तुमुकै आमारी हालती रौ पौतौ च़ांई लागौ और सेऊ तुमारौ विश्वास मज़बूत कौरा। 9 और तेस आइलै उनेसिमुसा लै भी भेज़ौ आ ज़ो विश्वास वाल़ौ आ और आच़्छ़ौ विश्वासी भाई और सेऊ तुमारै गांवा रौ आ, इऐ तुमुकै इदरा री सारी बुशै बोलाई। 10 अरिस्तर्खुस, ज़ो मुं आइलै ज़ेला दी आ, और मरकुस ज़ो बरनबासा रौ भाई लागा आ (हाऊं ज़ाणाऊ कु मरकुसा रै बारै दी तुमुकै पैहलै ओउलै बोली गौ आ अगर सेऊ तुमु काऐ आशा लौ, ता तेस आइलै आच़्छ़ा कौरी रौइयौ), 11 और यीशु ज़ासलै लोग यूस्तुस बोलाई, तुमुलै ढाल कौरा आ। यहुदी विश्वासिऊ मांझ़िया कु सिरफ इऐ चीन आदमी परमेश्वरा रै राज़ा कालै मैरै साथी ई ज़ुण मुलै हिम्मत दियाई। 12 इपफ्रास ज़ो तुमारै गांवा रौ आ और मसीह यीशु रौ सेवक आ, तुमुलै ढाल कौरा आ। और सेऊ सौदा तुमुलै ज़िवा लाइयौ प्राथना कौरा आ, ताकी तुमै पाक्कै हुइयौ पुरै विश्वासा आइलै परमेश्वरा री इच़्छ़ा माथै टेकी रौआ। 13 हाऊं तेसरौ गवाह ऊ कि सेऊ तुमु कालै और लौदीकिया और हियरापुलिसवाल़ैऊ लोगु लै ज़िवा लाइयौ प्राथना कौरा आ। 14 आच़्छ़ौ वैध लुका और देमास तुमुलै ढाल कौरा ई। 15 लौदीकिया शैहरा रै विश्वासी भाईऊ और बौइणिऊ लै और नुमफास और तिऊं रै घौरा री कलिसिया लै ढाल बोलीयौ। 16 और ज़ेबी इऐ चिट्ठी तुमारै काऐ पौड़िया ली, ता इणौ कौरीयौ कि लौदीकिया शैहरा री कलिसिया दी भी च़ांई पौड़ी, और सै चिट्ठी ज़ो लौदीकिया कु आ आशै औन्दी तिऐं तुमै भी पौड़ीयौ। 17 तैबै अरखिप्पुस कु बोलीयौ कि ज़ो सेवा प्रभु दी ताउंलै देई औन्दी आ, तिऐं सेवा आच़्छ़ै कौरी पुरी कौरीयौ। 18 हाऊं पौलुस आपणै हाथा कौरी इऐं चिट्ठी दी तुमुलै ढाल लिखाऊ। याद छ़ाड़ेऊ कि हाऊं ज़ेला दी ऊ और मुलै प्राथना कौरौ। तुमु माथै परमेश्वरा री बौड़ी दया थाका औन्दै लागी। आमीन। |
This work is licensed under Creative Commons Attribution-ShareAlike 4.0 License.