कुलुस्सियों 3 - पहाड़ी महासुई1 तुमै मसीह आइलै मौरै औन्दै मांझ़िया कु ज़िउंदै हुऐ, ता ज़ो परमेश्वरै तुमुलै सौरगा दी आ छ़ाड़ौ औन्दौ तिउंरी आश छ़ाड़ौ, ज़िऐ मसीह आज़ भी आ और परमेश्वरा री सुल़टी बियै बोशौ औन्दौ आ। 2 धौतरी माथै री नाईं पर सौरगा री च़िज़ेऊ माथै आश छ़ाड़ौ, 3 कैलैकि तुमै ता आपणै पाप वाल़ै च़ाल-च़लणा लै मौरी गौऐ, और तुमारी ज़िन्दगी मसीह आइलै परमेश्वर दी छ़िपी गोई आ। 4 मसीह ज़ुण आमुलै नौईं ज़िन्दगी दिया आ, ज़ेबी सेऊ धौतरी माथै वापिस आशा आ, तैबै तुमै भी तेस आइलै दिशणै ई और तेसरी महिमा रै हिस्सेदार हुणै ई। पुराणी ज़िन्दगी और नौईं ज़िन्दगी 5 एथीलै तुमै तिऊं बुरै काम कौरणै पोरु छ़ाड़ौ ज़ो तुमारै पाप वाल़ै च़ाल-च़लणा दी ज़ुड़ै औन्दै, ज़ो धौतरी माथै ई, मतलब गान्दै काम, अशुद्धता, दुष्टवाल़ै काम, बुरी लालसा। और लाल़च़ी ना बौणौ ज़ो मूर्ती पुज़णै रै बराबर आ। 6 कैलैकि लोग इणै बुरै काम कौरा ई, एथीलै परमेश्वर तिउलै कठिण सौज़ा दिया आ। 7 और तुमै भी, ज़ैबै इऊं बुराई दी ज़िन्दगी बितावा थै, ता इणौ कौरा थै। 8 पर आबै तुमै भी इऊं सौभी रै मतलब, रोश, भौरी रोश, बैर भाव, बुराई, और गाल़ी भौकणौ इऐ सौभी बुशै पोरु छ़ाड़ौ। 9 एकी दुजै आइलै झ़ूठ नाईं बोलौ कैलैकि तुमुऐ आपणौ पुराणौ पाप वाल़ौ च़ाल-च़लण और सारै बुरै काम पोरु छ़ाड़ी गौऐ, 10 और आबै तुमुऐ नौंवौ बरताव अपणाई गौ आ इयौ आपणै चाणनै वाल़ै ज़िणौ बौणदै रौआ और तेस आच़्छ़ै कौरी सौमझ़ा आ। 11 एज़ी ताइंऐ तिऊंदी ना ता युनानी रौऔ, ना यहुदी, ना खतना, ना बिण खतना रौ, ना परदेशी, ना स्कूती, ना गुलाम और ना आज़ाद आदमी सिरफ मसीह सारेऊ कु महान आ और सेऊ आमु सौभी दी ज़िवा आ। 12 एथीलै परमेश्वरै तुमै तेसरै पवित्र लोग हुणा लै च़ुनै ई और सेऊ तुमु कु प्यार कौरा आ, तुमै बौड़ी दया, और भौलाई, और निउल़ौपन, और कौउंल़ौपन, और सहनकौरनौ धारण कौरौ। 13 और अगर कासी रौ कासी माथै आरोप लाइणा रौ कोई कारण, ता एकी दुजै सैहन कौरौ, और एकी दुजै रै गुनाह माफ कौरौ: ज़िणौ प्रभुऐ तुमारै गुनाह माफ कियै ई, तिणी ई तुमै भी कौरौ। 14 और सौभी कु ज़ुरुरी आ कि तुमु दी एकी दुजै लै प्यार हुणौ च़ांई इणै कौरी तुमै आच़्छ़ा कौरी एकजुट रौआ ई। 15 ज़ो शान्ति मसीह दिया आ तिऐं आपणै ज़िवा दी राज़ कौरणै दैऔ कैलैकि तुमै सारै एकी शरीरा रै आंग ई और तुमै सारै एकी दुजै आइलै शान्ति दी रौइणा लै ई औटाऐ औन्दै। 16 मसीहा रै वचन आपणै ज़िवा दी आच़्छ़ा कौरी बौसणै दैऔ। और आच़्छ़ै ज्ञाना आइलै एकी दुजै कै शिखाऔ, और खौबरदार कौरौ, और आपणै-आपणै ज़िवा दी दया आइलै परमेश्वरा कालै भजन और स्तुति रै गीत और आत्मा रै गीत गाऔ। 17 और बुशा कौरीऐ कामा कौरी ज़ो कुछ़ भी कौरौ सारौ कुछ़ प्रभु यीशु रै नावां कु कौरौ, और प्रभु यीशु रै ज़ौरिऐ परमेश्वर बाबा रौ धन्यबाद कौरौ नौईं ज़िन्दगी रै परिवारा रै नियम 18 ओ बोउटीउओ, ज़िणौ प्रभु दी ठीक आ, तिणी ई आपणै-आपणै बोउटै री शुणौ। 19 ओ बोउटेउओ, आपणी-आपणी छ़ेउड़ी कु प्यार छ़ाड़ौ, और तिऊं आइलै निउलै कौरी रौ। 20 ओ लोल़ड़ेऊ ओ, सौभी बुशै दी आपणै-आपणै मां-बाबा रौ हुकमा रौ पालन कौरौ, कैलैकि प्रभु एथकु खुश औआ ई, 21 ओ लोल़डै वाल़ेऊ ओ, आपणै-आपणै लोल़डेऊ तंग नाईं कौरौ, इणौ नाईं च़ांई हुऔ कि तिउंरी हिम्मत चुटा। 22 ओ नुकरुओ, ज़ो धौतरी माथै तुमारै मालिक ई सौभी बुशु दी तिऊंरौ हुकम मानौ, लोगु खुश कौरना लै नाईं, पर सौच़्च़ाई और परमेश्वरा रै डौरा कु। 23 और ज़ो कुछ़ तुमै कौरा ई, पुरै ज़िवा कौरी कौरौ, इणौ ज़ाणियौ कि लोगु लै नाईं पर प्रभु कालै कौरा ई। 24 कैलैकि तुमै ज़ाणाई कि तुमुलै एथरै बौदल़ै प्रभु कु इनाम मिला आ। तुमै प्रभु मसीहा री सेवा कौरा ई। 25 कैलैकि परमेश्वर तिउंलै सौज़ा दिया आ ज़ो बुरौ कौरा आ। परमेश्वर कासी रौ भेद-भाव नाईं कौरदौ। |
This work is licensed under Creative Commons Attribution-ShareAlike 4.0 License.