प्रेरित 9 - पहाड़ी महासुई

शाऊला रौ मन बौदल़िणौ

¹ शाऊल ज़ुण इबी झ़ांऊ प्रभु यीशु रै च़ेलेऊ धमकाउंदै और तिऊं झ़ांगणै री कोशिषा दी थौ लागौ औन्दौ, सेऊ परधान याजका काऐ डैऔ,

² और तेसकु दमिश्क इलाकै दी आराधनालय रै नाऊं और तिऊं सताउणै रै हक्‍का री औरज़ी मांगी, ताकी अगर तेसकै तिऐ कुण यीशु पिछ़ु हांडणै वाल़ौ मिला लौ ता सेऊ च़ाऊ छ़ेउड़ी औली च़ाऊ मौरद तिऊं बानिऔ यरुशलेमा दी आणा।

³ पर ज़ेबी शाऊल और तेसरै लोग हांडदै-हांडदै दमिश्क इलाकै रै नज़दीक पौउंच़ौ ता एकदम सौरगा कु तेस फिदीआलै तेज़ प्याशौ च़ौमकौ,

⁴ ता सेऊ धौनी माटै माथै पौड़ौ और प्रभु री हाक शुणुई, “ओ शाऊल, ओ शाऊल तू मुं कैलै सतावा ई?”

⁵ शाऊलै पुछ़ौ, “ओ प्रभु तू कुण ई?” तिणीऐ बोलौ, “हाऊं यीशु ऊ, ज़ास तू सतावा ई।

⁶ पर आबै तू उठीयौ इलाकै दी डेऊ, और ज़ो कुछ़ ताऐं कौरणौ आ तेस ताउंकै तिऐ बोलाई कि हाऊं का च़ाहा ऊ।”

⁷ ज़ो आदमी तेस आइलै थै सै हौकै-बौकै खौड़ै रौऐ। कैलैकि तिंउऐ हाक ता शुणी, पर देखौ नाईं कोई।

⁸ शाऊल ज़मीना माथै कु उठौ, पर ज़ेबी तिणीऐ आखी खोली ता तेसकै कुछ़ा ना दिशौ, तैबै तिंउऐ सेऊ हाथा पाकड़ियौ दमिश्क इलाकै दी निऔं।

⁹ तेसकै चिया दिना झ़ांऊ कुछ़ ना दिशौ। ना तिणीऐ कुछ़ खाऔ-पिऔ।

¹⁰ दमिश्क इलाकै दी हनन्याह नावां रौ एक च़ेलौ थौ, प्रभु यीशुऐ तेसकै दर्शण देइऔ बोलौ, “ओ हनन्याह!” तिणीऐ बोलौ, “ओ प्रभु।”

¹¹ तैबै प्रभु यीशुऐ तेसलै बोलौ, “उठीयौ तिऐं गल़ी दी डेऊ ज़ेथलै ‘सिधी’ बोलाई। तिऐ यहुदा रै घौरा दी शाऊल नावां रै बारै दी पूछ़ ज़ो तरसुसा रौ रौइणै वाल़ौ आ। कैलैकि देख, सेऊ प्राथना कौरदै आ लागौ औन्दौ।

¹² तिणीऐ दर्शण देखौ आ कि, हनन्याह नावां रौ एक आदमी भितरै आशौ और तेस माथै हाथ छ़ाड़ौ, ताकी सेऊ तौंइऐ देखदै लागा।”

¹³ हनन्याहै ज़वाब दैऔ, “ओ प्रभु मुंइऐ एस आदमी रै बारै दी भौरी लोगु कु शुणौ आ, कि इणीऐ यरुशलेमा दी तैरै पवित्र लोगु माथै भौरी ज़ुलम किऐ ई।

¹⁴ और इदरा लै भी एसकै बौड़ै याजकु कु हक्क आ मिलौ औन्दौ, कि ज़ुण ताऊं माथै विश्वास कौरा आ, तेस बानियौ यरुशलेमा लै निआं।”

¹⁵ पर प्रभु यीशुऐ तेसलै बोलौ, “तू डेऊ। कैलैकि सेऊ ता मुंइऐ दुजी ज़ातीऊ, राज़ेऊ, और इस्राइली लोगु काऐ मैरौ परचार कौरना लै आ छ़ांटौ औन्दौ।

¹⁶ और हाऊं तेसलै बोलाऊ कि मेरी ताईं तिणीऐ किणै-किणै दुःख जा ई उठाउणै।”

¹⁷ तैबै हनन्याह उठौ ओर तेस घौरा दी डैऔ ज़िऐ शाऊल थौ रौ औन्दौ। तिऐ तिणीऐ शाऊला माथै आपणै हाथ छ़ाड़ै और बोलौ, “ओ भाई शाऊल, प्रभु यीशु, ज़ो सेज़ी बाटा दी ताउंकै दिशौ थौ, ज़ेथदी तू आशो ई, तिणीऐ ई हाऊं भेज़ौ ऊ, कि तू देखदै लागा और पवित्र आत्मा कौरीऐ भौरी आ।”

¹⁸ और फेटी शाऊला री आखी कु छ़िलकै ज़ेई उतरै और सेऊ देखदै लागौ, और उठीयौ तेबी बपतिस्मौ निऔं।

¹⁹ तैबै रोटी खाइऔ तागत पाई। और सेऊ कई दिना झ़ांऊ तिऊं च़ेलेऊ आइलै रौऔ, ज़ो दमिश्क इलाकै दी रौआ थै।

दमिश्का दी शाऊला रौ परचार

²⁰ शाऊल तेबी ई दमिश्क इलाकै रै आराधनालय दी डेइऔ यीशु रौ परचार कौरदै लागौ कि, यीशु ई परमेश्‍वरा रौ छ़ोहरु आ।

²¹ भौरी सारै शुणनै वाल़ै लोग हैरान हुइयौ बोलदै लागै, “का एऊ सेऊ नाईं ज़ुण यरुशलेमा दी यीशु माथै विश्वास कौरणै वाल़ेऊ, झ़ांगा थौ। और इदै भी थौ एथीलै आशौ औन्दौ कि तिऊं बानिऔ बौड़ै याजकु काऐ निआं?”

²² पर शाऊल औज़ौ भी ज़ादौ परचार कौरदै लागौ और शक्ति वाल़ौ बौणौ, और एज़ी बुशा रौ सबूत देई-देइयौ कि यीशु ई मसीह आ, दमिश्क इलाकै रै यहुदिऊ रै मूंह बन्द किऐ।

²³ ज़ैबै भौरी दीन बिती गौऐ, तैबै यहुदी मिलियौ शाऊला झ़ांगणै रै बारै दी चौपड़िंदै लागै।

²⁴ पर तिऊंरौ चौपड़िणौ शाऊला कै पौतौ लागौ। कि सै तेस झ़ांगणा लै राच दीन बाटा दी ज़ागदै औआ ई लागै औन्दै।

²⁵ पर एकी राचीऐ तेसरै च़ेलेउऐ सेऊ छ़ाबड़ै दी बोशाल़ीऔ रौशेऊ दी लटकाइयौ तेस इलाकै री उंच़ी दवाली बाटीऐ इलाकै कु बाइरै गाड़ौ।

यरुशलेमा दी शाऊल

²⁶ यरुशलेमा दी पौउंच़िऔ शाऊलै च़ेलेऊ आइलै मिलणै री कोशिश की। पर सै सारै तेसकु डौरा थै। तिउंकै विश्वास नाईं औआ थौ, कि एऊ भी यीशु रौ च़ेलौ बौणी गौ आ।

²⁷ पर बरनबासै सेऊ आपु आइलै च़ेलेऊ काऐ निऔं, और तिउंलै बोलौ कि शाऊलै किणै कौरी बाटा दी प्रभु देखौ और प्रभुऐ एस आइलै बुशै लाई आ। तैबै दमिश्क इलाकै दी किणी हिम्मत्ती कौरीऐ यीशु रै नावां रौ परचार किऔ आ।

²⁸ शाऊल तिऊं आइलै यरुशलेमा दी आज़ादी कौरीऐ आशदै-हाण्डदै लागौ।

²⁹ और निडर हुइयौ प्रभु रै नावां रौ परचार कौरा थौ। युनानी बोली बोलणै वाल़ै यहुदिऊ आइलै बुशै और वाद-विवाद कौरा थौ। पर सै कौरा थै तेस झ़ांगणै री कोशिश।

³⁰ पर ज़ेबी विश्वासी भाईऊ कै पौतौ लागौ, ता तिंउऐ सेऊ कैसरिया इलाकै दी आणौ और तिदरु भेज़ौ तरसुसा गांवा लै।

³¹ तैबै पुरै यहुदा परदेश, गलील परदेश और सामरीया इलाकै री कलिसिया कै च़ैन मिलौ और सै विश्वासा दी बौड़दै लागी। सै विश्वासी लोग प्रभु रै डौरा दी और पवित्र आत्मा हौसलै री वज़ाह कु बौड़दै लागै।

लुद्दा और याफा दी पतरस

³² तैबै इणौ हुऔ कि पतरस एकी ज़ागाह कु दुजी ज़ागाह दी हांडियौ परचार कौरदै-कौरदै तिऊं पवित्र लोगु काऐ भी पौउंच़ौ ज़ुण लुद्दा गांवा दी रौआ थै।

³³ तिऐ पतरसा कै एनियास नावां रौ बिमार आदमी भी मिलौ ज़ेथदी लकवै री बिमारी थी और आठ साला ओउलै बिस्तरै दी थौ पौड़ौ औन्दौ।

³⁴ पतरसै तेसलै बोलौ, “ओ एनियास! यीशु मसीह ताऊं च़ांगौ कौरा आ। ‘उठ आपणौ बिस्तरौ चुंगिऔ ठीक कर।’ तैबै सेऊ फेटी खौड़ौ हुऔ।

³⁵ लुद्दा गांवा और शारोन गांवा रै भौरी सारै रौइणै वाल़ै लोग तेस देखीयौ प्रभु यीशु माथै विश्वास कियौ।”

³⁶ याफा गांवा दी तबीता मतलब दोरकास नावां री एक विश्वासी छ़ेउड़ी रौआ थी। सै भौरी भौलै-भौलै काम कौरा और गरीबु री मज़द कौरा थी।

³⁷ सेज़ै बौगता दी ज़ेबी पतरस लुद्दा गांवा दी थौ, विश्वासी छ़ेउड़ी सै बिमार हुई और पोरु मौरी। तिंउऐ सै धोआइऔ माथलै कौमरै छ़ाड़ी।

³⁸ लुद्दा गांउ याफा रै नज़दीक थौ च़ेलेउऐ शुणौ कि पतरस तिऐ आ, दुई आदमी छ़ाड़ियौ तेसकु औरज़ की, “कि आमु काऐ आशणा लै बेर नाईं पा।”

³⁹ तैबै पतरस उठीयौ तिऊं आइलै च़ाल पौड़ौ, ज़ेबी सेऊ पौउंच़ौ ता तिंउऐ सेऊ तिऐ माथलै कौमरै दी निऔं। तैबै विधवा छ़ेउड़ी लेरीयौ पतरसा काऐ आशीयौ खौड़ी हुई और ज़ो जुड़कै दोरकासै तिऊं आइलै रौइऔ चाणै थै, तिऊं देखाउंदै लागी।

⁴⁰ तैबै पतरसै सारै तिदरु बाइरै गाड़ै, और घुंडै टेकीऔ प्राथना कौरी, और मौड़ै भिलै देखीयौ बोलौ, “ओ तबीता उठ।” तैबै तिंआऐ आपणी आखी खोली। और पतरसा देखीयौ उठीयौ बोशी।

⁴¹ पतरसै हाथा पाकड़ीऔ सै उठाई, और पवित्र लोग और विधवा छ़ेउड़ीऊ औटाइयौ तिउंकै ज़िउंदी हुइयौ सौंभाल़ी।

⁴² इऐ बूश सारै याफा गांवा दी फौइली गोई। और भौरी लोगुऐ प्रभु यीशु माथै विश्वास किऔ।

⁴³ और पतरस याफा गांवा दी च़ामड़ै रै कामा कौरणै वाल़ै शमौना रै घौरा दी भौरी दिना झ़ांऊ रौऔ।