प्रेरित 8 - पहाड़ी महासुई

कलिसिया लै दुःख दैणै

¹ सेज़ै दिनै यरुशलेम शहरा री कलिसिया दी भौरी सताव शुरु हुऔ, प्रेरितु छ़ाड़ियौ ओर सारै यहुदिया और सामरीया परदेशा दी बिखरी गौऐ।

² कुछ़ भौगतुऐ स्तिफनुसा रौ मौड़ौ कब्रा दी छ़ाड़ौ और तेसलै भौरी लेरै।

³ शाऊल कलिसिया रै लोगु सौताउंदै थौ लागौ औन्दौ। और घौरा-घौरा दी डेइऔ विश्वासी छ़ेउड़ी और मौरदु घीशी-घीशियौ ज़ेला दी थौ लागौ औन्दौ पाइंदै।

सामरीया दी फिलिप्पुसा रौ परचार

⁴ ज़ो बिखरै औन्दै विश्वासी लोग थै सै खुशी री खौबरी शुणावा थै।

⁵ और फिलिप्पुस सामरीया परदेशा दी डेइऔ लोगु कै मसीहा रौ परचार कौरदै लागौ।

⁶ ज़ो बुशै फिलिप्पुसै बोली लोगुऐ सै शुणियौ और हैरानी वाल़ै कामा देखीयौ ज़ो सेऊ देखावा थौ एक मन हुइयौ तेथदी ध्यान लाऔ।

⁷ कैलैकि ज़ेबी फिलिप्पुसै हुकम दैऔ ता भौरी लोगु कु बुरी आत्मा राड़ै मारीयौ बाइरै थी लागी ऐन्दी निकुल़दै, और भौरी अधरौंगा रै बिमार और लौंगड़ै भी च़ांगै हुऐ।

⁸ और तेस इलाकै रै भौरी लोग दी बौड़ी खुशी छ़ाई गोई।

ज़ादु कौरणै वाल़ौ शमौन

⁹ सेज़ै इलाकै दी शमौन नावां रौ एक आदमी थौ, ज़ुण ज़ादु-टोणै कौरीऐ सामरीया रै लोगु हैरान कौरा थौ और आपुलै सारेऊ कु बौड़ौ आदमी बोला थौ।

¹⁰ छ़ोटै कु बौड़ै झ़ांऊ सारै तेसरी इज़्ज़त कौरा थै, “कि एऊ आदमी परमेश्‍वरा री सै बौड़ी शक्ति आ।”

¹¹ तिणीऐ भौरी बौगता ओउलै आपणै ज़ादु-टौणै रै कामा कौरीऐ सै लोग हैरान थै किऐ औन्दै, एथीलै सै लोग तेस भौरी बौड़ौ माना थै।

¹² पर ज़ेबी लोगुऐ फिलिप्पुसा री बुशु माथै विश्वास किऔ ज़ुण परमेश्‍वरा रै राज़ और यीशु मसीह रै नावां री खुशी री खौबरी शुणावा थौ। ता सारै लोग छ़ेउड़ी का मौरद बपतिस्मौ निंदै लागै।

¹³ तैबै शमौनै आपु भी विश्वास किऔ और बपतिस्मौ नीईंयौ फिलिप्पुसा आइलै रौउंदै लागौ। सेऊ नोखै-नोखै और बौड़ै-बौड़ै शक्ति वाल़ै कामा देखीयौ हैरान हुआ थौ।

सामरीया दी पतरस और यहुन्ना

¹⁴ ज़ैबै प्रेरितुऐ ज़ुण यरुशलेम शहरा दी थै शुणौ कि, सामरीया रै लोगुऐ परमेश्‍वरा रौ वचन मानी गौ आ तैबै तिंउऐ पतरस और यहुन्ना तिऊं काऐ भेज़ै।

¹⁵ तिंउऐ सामरीया दी डेइऔ तिउंलै प्राथना कौरी कि सै पवित्र आत्मा पा लै।

¹⁶ कैलैकि पवित्र आत्मा इबी झ़ांऊ तिऊं कासी माथै नाईं उतरौ थौ। तिंउऐ ता सिरफ यीशु रै नावां रौ बपतिस्मौ थौ निऔं औन्दौ।

¹⁷ तैबै पतरस और यहुन्नै तिऊं माथै हाथ छ़ाड़ै और तिंउऐ पवित्र आत्मा पाऔ।

¹⁸ तैबै शमौनै देखौ कि च़ेलेऊ रै हाथा छ़ाड़ियौ पवित्र आत्मा मिला सा, ता तिऊं काऐ पैसै नीईंयौ बोलौ,

¹⁹ “एज़ी शक्ति मुकै भी दैऔ कि हाऊं ज़ास माथै भी हाथ छ़ाड़ुलै ता तेसलै पवित्र आत्मा मिला।”

²⁰ पतरसै तेसलै बोलौ, “तैरै रुपाऐ-पैसै ताऊं आइलै च़ांई खातम हुऐ, कैलैकि ताऐं परमेश्‍वरा रौ वरदान पैसेऊ कौरी खरीदणै रै बारै दी सुंच़ौ आ।

²¹ एज़ी सेवा दी ना तैरौ भाग, ना कोई हिस्सौ आ। कैलैकि तैरौ मन परमेश्‍वरा री नौज़रीऐ साफ नाईं आसतौ।

²² एथीलै आबै आपणी इऐं बुराई कु मन बदुल़, और प्रभु कु प्राथना कर, हुई सौका कि प्रभु तैरै ज़िवा री बुराई लै माफी मिला।

²³ कैलैकि हाऊं देखाऊ कि तू पित ज़िणै कड़वाहटा दी और बुराई रै ज़ाल़ा दी फौसौ औन्दौ।”

²⁴ शमौनै बोलौ, “तुमै मुलै प्राथना कौरौ कि ज़ो बुशै तुमुऐ मुलै बोली आ, तिऊं मांझ़िआ कु कोई भी मुसीबत मुं माथै ना आशा।”

²⁵ तैबै पतरस और यहुन्ना प्रभु यीशु री गवाही देइऔ और वचन शुणाइयौ यरुशलेम शहरा लै वापस आशै। और सामरिउ रै भौरी गांवा दी खुशी री खौबरी शुणाई।

फिलिप्पुस और कूश देशा रौ अधिकारी

²⁶ तैबै प्रभु रै एकी दूतै फिलिप्पुसा लै बोलौ, “उठ और दक्षिण दिशा री भिलै सेज़ी बाटा दी डेऊ, ज़ो बाट यरुशलेमा शहरा कु गाज़ा शहरा लै डिआ।” सै शुनशान बाट आ।

²⁷ फिलिप्पुस उठीयौ च़ाल पौड़ौ, और बाटा दी सेऊ एक खोजै कु मिलौ ज़ुण कूश देशा रौ थौ सेऊ यरुशलेमा कु थौ आशदै लागौ औन्दौ, कैलैकि सेऊ तिऐ परमेश्‍वरा री आराधना कौरना लै थौ आशौ औन्दौ। सेऊ कूश देशा री राणी कन्दाकै रौ मन्त्री और खज़ान्च़ी थौ।

²⁸ सेऊ वापस आपणै घौरै डेउंदी बारै आपणै रौथा माथै बोशियौ, यशायाह भविष्यवक्ता री किताब ज़ोर-ज़ोरै पौड़दै थौ लागौ औन्दौ।

²⁹ तैबै पवित्र आत्मै फिलिप्पुसा लै बोलौ, “नज़दीक डेइऔ एस रौथा आइलै आण्ड।”

³⁰ फिलिप्पुस तेस भिलै फेटी मारीयौ डैऔ और सेऊ यशायाह भविष्यवक्ता री किताबी पौड़दै शुणौ, और तेसकु पुछ़ौ कि, “ज़ो तू पौड़दै ई लागौ औन्दौ का तू तेस सौमझ़ा भी ई?”

³¹ तिणीऐ फिलिप्पुसा लै बोलौ, “ज़ेबी झ़ांऊ कुण मुं सौमझ़ावा नाईं लौ तेबी झ़ांऊ हाऊं किणौ सौमझ़ा ऊ?” “तिणीऐ फिलिप्पुसा कु औरज़ कौरी कि मुं काऐ आशीयौ बोश”

³² पवित्रशास्त्रा रौ ज़ो पाठ सेऊ पौड़दै थौ लागौ औन्दौ सेऊ एज़ौ थौ, “सेऊ भेरी बाशीऐ बौल़ी हुणा लै निऔं, और ज़िणौ गाबड़ु ऊन लौइणै वाल़ेऊ काऐ च़ुटुकच़ार थाका आ, तिणी ई, तिणीऐ भी आपणौ मूंह नाईं खोलौ।

³³ तेसरै निउलै दी तेसरौ फैसलौ नाईं हुऔ। तेसरै बौगता रै लोगु रै बारै दी कुण बोला आ? कैलैकि धौतरी माथा कु ता तेसरै प्राण नींई गौऐ थै।”

³⁴ एथ माथै खोजैऐ फिलिप्पुसा कु बोलौ, “हाऊं ताऊं कु औरज़ कौराऊ, इणौ बोल कि भविष्यवक्ता इणौ कासरै बारै दी बोला आ? आपणै या कास ओरी रै बारै दी?”

³⁵ तैबै फिलिप्पुस बोलदै लागौ, और एसी पवित्रशास्त्रा कु शुरु कौरीऔ तेसकै यीशु रै बारै दी खुशी री खौबरी शुणाई। तैबै तिणी खोजै इऐ बुशै सौमझ़ी और यीशु माथै विश्वास कियौ।

³⁶ बाटा दी हांडदै-हांडदै सै एकी ज़ागाह दी पौउंच़ै ज़िऐ पाणी रौ ताल थौ। तैबै खोजैऐ बोलौ, “देख इदै पाणी रौ ताल आ, आबै मुलै बपतिस्मौ निणा लै का कामी आ?”

³⁷ फिलिप्पुसै बोलौ, “अगर तू पुरै ज़िवा कौरी विश्वास कौरा ई ता नींई सौका ई।” तिणीऐ बोलौ, “हाऊं विश्वास कौराऊ कि यीशु मसीह ई परमेश्‍वरा रौ छ़ोहरु आ।”

³⁸ तैबै तिणीऐ रथ रोकणै रौ हुकम दैऔ, और फिलिप्पुस और खोजा दुइया पाणी दी डेवै तैबै तिणीऐ खोजा लै बपतिस्मौ दैऔ।

³⁹ ज़ेबी सै पाणी कु बाइरै आशै, ता परमेश्‍वरा री आत्मै फिलिप्पुस तिदरु चुंगिऔ निऔं, और खोजैऐ सेऊ तौंइऐ नाईं देखौ। खोजौ खुशी मौनाई कि, “परमेश्‍वरै हाऊं बौच़ाई गो ऊ” और सेऊ आपणै घौरै च़ाली पौड़ौ।

⁴⁰ फिलिप्पुस पौउंच़ौ आशदोश इलाकै दी पा। और ज़ेबी झ़ांऊ कैसरिया इलाकै दी ना पौउंच़ौ तेबी झ़ांऊ सेऊ इलाकै-इलाकै दी यीशु री खुशी री खौबरी शुणाउंदै थाकौ लागी।