प्रेरित 28 - पहाड़ी महासुईमाल्टा द्वीपा दी पौलुस 1 “ज़ैबै आमै सारै डिका काऐ ठीक-ठाक पौउंच़ी गौऐ तैबै आमुकै पौतौ लागौ कि इऐं ज़ागाह लै माल्टा बोलाई। 2 तिदलै लोगुऐ आमारौ भौरी ख्याल छ़ाड़ौ। कैलैकि पाणी लागणै री वज़ाह कु भौरी शेल़ौ थौ, और तिंउऐ आग ज़ाल़ियौ आमारौ स्वागत कियौ। 3 ज़ैबै पौलुसै ज़ुखड़ै कौट्ठै कौरीयौ आगी माथै छ़ाड़ै, ता एक साप तौपीयौ बाइरै निकल़ौ और तेसरै हाथा दी मेशुऔ। 4 ज़ैबै तिदलै लोगुऐ साप पौलुसा रै हाथा दी मेशुऔ औन्दौ देखौ, ता आपु मांझ़िऐ चौपड़िंदै लागै कि, पाकौ एऊ आदमी गुंडौ आ कि समुन्दरा कु बौच़ी गौ पर फैसलै कौरणै वाल़ी देवी नाईं च़ांहादी कि एऊ ज़िउंदौ रौआ।” 5 तैबै तिणीऐ सेऊ साप आगी दी शोटौ, और पौलुसा दी कुछ़ ना हुऔ। 6 पर सै लोग थै ज़ागदै लागै औन्दै कि आबै एऊ उशाआ और एकी घौड़ीऐ धौनी पौड़ीयौ मौरा, पर ज़ैबै सै काफी बौगता झ़ांऊ देखदै थै लागै औन्दै ता तिंउऐ देखौ कि तेसदी कुछ़ भी ना हुऔ, ता आपणै विच़ार बौदल़ियौ बोलदै लागै कि, “एऊ ता कुण दैऔ आ।” 7 तिऐं ज़ागाह रै नज़दीक, तेस टापु रै परधान पुबलियुसा री ज़बीन थी। तिणीऐ आमै आपणै घौरै निऐं और चिया दिना झ़ांऊ आमारी सेवा-पाणी की ई। 8 पुबलियुसा रौ बाब बुखार और पेचिसा कौरी भौरी बिमार थौ। पौलुसै तेस काऐ डेइयौ प्राथना कौरी और तेस माथै हाथा छ़ाड़ियौ सेऊ च़ांगौ कियौ। 9 ज़ैबै इणौ हुऔ ता तिऐं ज़ागाह रै सारै बिमार पौलुसा काऐ आशै और च़ांगै हुइयौ डेवै। 10 तिंउऐ आमारी बौड़ी इज़्ज़त की ई, और ज़ेबी आमै तिदरु डेउंदै लागै ता ज़ो आमुलै ज़ुरुरी थौ, सेऊ समान तिंउऐ आमारी किश्ती छ़ाड़ौ। माल्टा द्वीपा कु रोमा भिलै 11 चिया मिहनै बासिऐ आमै सिकन्दरिया रै एकी किश्ती दी च़ाल पौड़ै, ज़ो तिऐ पुरै शेल़ै रै बौगतै रौऔ ज़ासरौ निशाण, “ज़ुड़ुऐ देऊ” थौ। 12 तैबै सुरकूस शहरा दी आमै चिया दिना झ़ांऊ थाकै। 13 तिदरु आमै घुमी-फीरीयौ रेगीयुमा दी आशै। और एकी दिना बासिऐ तेज़ बागुर च़ाली, तैबै आमै दुजै दिनै पुतियुली शहरा दी आशै। 14 तिऐ आमुकै कुछ़ विश्वासी भाई मिलै ज़ुणिऐ आमुकु औरज़ कौरी कि सात दिना झ़ांऊ आमारै काऐ रौऔ। इणै कौरी आमै रोमा दी पौउंच़ै। 15 ज़ैबै तिदलै विश्वासी भाईउऐ आमारै बारै दी शुणौ ता अप्पियुसा रै बज़ारा दी और चिया सरांय झ़ांऊ सै आमुकु मिलदै आशै, तिऊं देखीयौ पौलुसा कै हिम्मत आशी और तिणीऐ परमेश्वरा रौ धन्यबाद कियौ। 16 ज़ैबै आमै रोमी शहरा दी पौउंच़ै, ता पौलुसा लै एक सिपाई आइलै ज़ो तेसरी रखवाल़ी कौरा थौ, एखुलै दी रौइणै रौ हुकम मिली गौ। रोमा दी पौलुस 17 चिया दिना बासिऐ पौलुसै यहुदिऊ रै मुख्यै लोग औटाऐ, और ज़ैबै सै कौट्ठै हुऐ ता तिउंलै बोलौ, “ओ भाईओ, मुंइऐ आपणै लोगु और आपणै नान-बुड़ु रीती-रिवाज़ा रै विरोधा दी कुछ़ भी ना कियौ, तैबै भी यरुशलेमा दी हाऊं कैदा दी पाइयौ रोमी मुख्यै रै हाथा दी सौंभाल़ौ। 18 तिंउऐ हाऊं पौरखियौ छ़ाड़णौ च़ाऔ, कैलैकि मुंदी मौउता रै लायक कोई गलती नाईं थी। 19 पर ज़ैबै यहुदी मुख्यै एथरै विरोधा दी बोलदै लागै, ता मुं कैसरा री औरज़ कौरणी पौड़ी एथलै नाईं कि मुंइऐ आपणै लोगु माथै आरोप लाइणौ थौ। 20 एथीलै मुंइऐ तुमै औटाऐ ई कि तुमु कु मिलु और बुशै-धाशै लाऊ। कैलैकि इस्राइला री आश छ़ाड़ना लै ऊ हाऊं इऐं शांगल़ी दी बानौ औन्दौ।” 21 तै यहुदी मुख्येउऐ पौलुसा लै बोलौ, “ना आमुकै तैरै बारै दी यहुदिऊ कु चिट्ठी मिली, ना विश्वासी भाईऊ मांझ़िया कु कुणिऐ आशीयौ आमु काऐ तैरै बारै दी कुछ़ बोलौ, और ना बुरौ बोलौ। 22 पर तैरौ विच़ार का सा? तिऊं आमै ताऊं कु शुणनौ च़ांई, कैलैकि आमै ज़ाणी कि हर ज़ागाह दी लोग एथरै बारै दी बुशै ला ई।” 23 तैबै तिंउऐ तेसलै एक दीन छ़ांटौ, और भौरी लोग तिऐ कौट्ठै हुऐ तैबै पौलुसै परमेश्वरा रै राज़ा री गवाही देई, और मुसा रै नियमा और भविष्यवक्ता री किताबी कु यीशु रै बारै दी सौमझ़ाई-सौमझ़ाइयौ दोअती कु ब्याल़ी झ़ांऊ थाकौ शिखाउंदै लागी। 24 तैबै कुछ़ लोगुऐ ता इऊं बुशु माथै विश्वास कियौ, और कुछ़ लोगुऐ नाईं विश्वासा कियौ। 25 ज़ैबै सै एकी-दुजै कु राज़ी नाईं हुऐ ता पौलुसा री, इऊं बुशु छ़ाड़ियौ तिदरु डेई गौऐ “पवित्र आत्मै यशायाह भविष्यवक्ता रै ज़ौरिऐ आमारै नान-बुड़ु आइलै ठीक ई बोलौ आ, 26 ‘डेइयौ इऊं लोगु लै बोल, शुणदै ता थाका ई लागी, पर सौमझ़दै नाईं, देखदै ता थाका ई लागी, पर दिशदौ नाईं।’ 27 कैलैकि इऊं लोगु रौ ज़िऊ मोटौ और इउंरै कौन्थु भौरुई गौऐ, और इउंऐ आपणी आखी बन्द की ऐन्दी, ताकी इणौ ना हुआ कि सै आखी कौरी देखा, कौन्थु कौरी शुणा और ज़िवा कौरी सौमझ़ा, और बौदल़िया, और हाऊं इऊं च़ांगौ कौरु।” 28 “एथीलै तुमै ज़ाणौ कि परमेश्वरा रै छ़ुटकारै इऐ खुशी री खौबर दुजी ज़ातीऊ काऐ भेज़ी गोई आ, और सै अपणावा ई।” 29 ज़ेबी तिणीऐ इणौ बोलौ ता यहुदी आपु मांझ़िऐ चौपड़िंदै लागै और तिदरु पोरु भागै। 30 सेऊ पुरै दुई साला झ़ांऊ तिऐ आपणै किराय रै घौरा दी रौऔ, 31 और ज़ो भी तेस काऐ आशा थै, तिऊं सौभी कु मिला थौ और बिण रुकै निडर हुइयौ परमेश्वरा रै राज़ा रौ परचार कौरा थौ और प्रभु यीशु मसीह री बुशै शिखाउंदै थाकौ लागी। |
This work is licensed under Creative Commons Attribution-ShareAlike 4.0 License.