प्रेरित 24 - पहाड़ी महासुईआफसर फेलिक्सा काऐ पौलुस 1 पांज़ दिना बासिऐ हनन्याह परधान याजकै कई स्याणै और तिरतुल्लुस नावां रौ बकील आपु आइलै कैसरिया इलाकै दी आणै। तिंउऐ आफसरा काऐ पौलुसा माथै आरोप लाऐ। 2 ज़ेबी पौलुस औटाऔ ता तिरतुल्लुस तेस माथै आरोप लाइयौ बोलदै लागौ कि: “ओ महामहिम फेलिक्स, तेरी वज़ाह कु आमारै देशा दी शान्ति औआ आ। और तैरै इन्तज़ाम कौरी एज़ी ज़ाती लै कई बुराई सुधरा ई। 3 एज़ी बूश आमै हर ज़ागाह दी हर तरिकै कौरी धन्यबाद कौरीयौ मानी। 4 एथीलै हाऊं तुमारौ ज़ादौ बौगत नाईं निणौ च़ाहंदौ, हाऊं ताऊं कु औरज़ कौराऊ छ़ौंअटी आमारी एक-दुई बुशै शुण। 5 कैलैकि एऊ दुनिया रै सारै यहुदी मांझ़िऐ हालौ मौच़ावा आ, और नासरीउ रै पंथा रौ मुख्यौ आ। 6 तिणीऐ परमेश्वरा रौ घौर भी अशुद्ध कौरणौ च़ाऔ, पर आमुऐ सेऊ पाकड़ी गौ आमुऐ तेसलै आपणै नियमा कौरी सौज़ा दैणी थी। 7 पर सिपाई रै मुख्यै लूसियासै सेऊ ज़ौबरीयै आमारै हाथा कु छ़ुड़ाऔ, 8 और एस माथै आरोप लाइणै वाल़ेऊ लै ताऊं काऐ आशणै रौ हुकम दैऔ। इऊं सारी बुशै ज़ेथरै बारै दी आमै एस माथै आरोप लाई, तुमुकै आपु एस पौरखियौ सौच़्च़ाई रौ पौतौ लागा।” 9 यहुदिउऐ भी तेसरौ साथ देइयौ बोलौ, ओ इऐ बुशै सौच़्च़ी ई। पौलुसा रौ ज़वाब 10 “ज़ैबै आफसरै पौलुसा लै बोलणै रौ इशारौ कियौ ता पौलुसै बोलौ, ज़ैबै मुकै इणौ पौतौ लागौ कि तुमै भौरी साला ओउलै एज़ी ज़ाती रै लोगु रौ फैसलै कौरदै लागै औन्दै एथीलै आबै हाऊं खुश हुइयौ आपणै ब्यान दिआऊ। 11 तू आपु ज़ाणी सौका ई कि ज़ेबी कु हाऊं यरुशलेमा दी परमेश्वरा रै घौरा दी आराधना कौरदै आशो ऊ ता मुं इदै बाराह दिना कु ज़ादौ बौगत भी ना हुऔ। 12 तिंउऐ हाऊं ना परमेश्वरा रै घौरा दी, ना आराधनालय दी और ना इलाकै दी कासी आइलै बुशेऊ लाइंदै और हालै मच़ाउंदै देखौ। 13 और ना ता इउंकै इऊं बुशु रौ ज़ेथरौ आबै इऐ मुं माथै आरोप ला ई, ना ताऊं काऐ सौच़्च़ साबित कौरी सौकदै। 14 पर हाऊं ताऊं काऐ एज़ी बूश माना ऊ, कि ज़ेज़ै पंथा लै इऐ बेकार पंथ बोलाई, तेथी कौरी हाऊं आपणै नाना-बुड़ु रै परमेश्वरा री आराधना कौराऊ। और ज़ेज़ी बुशै नियम-कानूना दी और भविष्यवक्ताऊ री किताबी दी लिखी ऐन्दी तिऊं सारेऊ माथै विश्वास कौराऊ। 15 और परमेश्वरा कु आश छ़ाड़ाऊ ज़ो सै आपु भी छ़ाड़ाई, कि परमेश्वर धौर्मी और अधर्मी दुइया ज़िउंदै कौरा आ। 16 एथीलै हाऊं भी परमेश्वर और आदमी काऐ आपणौ मन साफ बेकसूर छ़ाड़णै री कोशिश कौराऊ। 17 भौरी साला बासिऐ हाऊं आपणै लोगु कै दाण पौउंच़ाउंदौ, और भैंटा च़ौड़ाउंदै यरुशलेमा दी आशौ थौ। 18 तेबी ई तिंउऐ हाऊं परमेश्वरा रै घौरा दी, शुद्ध हुइयौ, एखुली और बिण हालै मच़ाइयौ, भैंटा च़ड़ाउंदै देखौ, पर तिऐ आसिया रै कुछ़ यहुदी थै। पर इणौ ठीक थौ कि, 19 अगर तिउंकै मैरै विरोधा दी कुछ़ बूश थी ता इदै तुमु काऐ आशीयौ मुं माथै आरोप ला थै। 20 या सै आपु बोलालै, कि ज़ेबी हाऊं बौड़ी खुंबल़ी मांझ़िऐ खौड़ौ थौ ता तिंउऐ मुंदी केज़ी गलती देखी आ? 21 इऐं एकी बुशा छ़ाड़ियौ ज़ो मुंइऐ तिऊं मांझ़िऐ खौड़ै हुइयौ हाकै देइयौ बोलौ थी, मौरै औन्दै रै ज़िउंदै हुणै रै बारै दी आज़ मैरौ तुमु आइलै केस हुंदै लागौ औन्दौ।” 22 फेलिक्सै ज़ो एज़ै पंथा री बुशु आच़्छ़ा कौरी ज़ाणा थौ, सै इणै बोलीयौ टाल़ी गोई, “ज़ेबी सिपाईउ रौ मुख्यै लूसियास आशा लौ, ता तुमारी बुशु रौ फैसलौ कौराऊ।” 23 और सिपाई लै हुकम दैऔ कि पौलुसा लै थोड़ी छ़ूट देइयौ तेसरी रखवाल़ी कौरेऊ, पर तेसरै गोश्टणा मांझ़िया कु कासी भी तेसरी सेवा कौरणै कु नाईं रोकेऊ। फेलिक्स और द्रुसिल्ला काऐ पौलुस 24 “कुछ़ दिना बासिऐ फेलिक्स आफसरै आपणी छ़ेउड़ी द्रुसिल्ला, ज़ो यहुदी थी, साथा दी कैसरिया इलाकै दी आणी और पौलुस औटाइयौ तेस विश्वासा रै बारै दी ज़ो मसीह यीशु माथै आ, तेसकु शुणौ। 25 ज़ेबी सेऊ धार्मिक, सौबर और आशणे वाल़ै फैसलै रै बारै बुशै लाइंदै थौ लागौ औन्दौ, ता फेलिक्सै डौरी-डौरीयौ ज़वाब दैऔ, इबी तू डेऊ ज़ेबी मुकै बौगत औलौ तेबी ताऊं हाऊं औज़ौ औटावा ऊ।” 26 तेसकै पौलुसा कु कुछ़ पैसै निणै री आश थी, एथीलै सेऊ घौड़ी-घौड़ीऐ तेस औटाइयौ तेस आइलै बुशै ला थौ। 27 पर ज़ेबी दुई सालै बिती गोई ता पुरकियुस फेस्तुस, फेलिक्सा री ज़ागाह दी आफसर बौणौ। और फेलिक्सै यहुदिऊ खुश कौरना लै पौलुस कैदा दी छ़ाड़ौ। |
This work is licensed under Creative Commons Attribution-ShareAlike 4.0 License.