प्रेरित 21 - पहाड़ी महासुईपौलुसा रौ यरुशलेमा लै डेउणौ 1 ज़ैबै आमै तिऊं छ़ाड़ियौ किश्ती दी च़ौड़ै ता, सिधी बाटा दी कोसा टापु दी आशै, और दुजै दिनै रुदुसा टापु दी तिदरु डै पतरा टापु लै। 2 तिऐ एक किश्ती फिनके परदेशा लै डेउणै वाल़ी मिली, और आमै तेथदी च़ौड़ियौ च़ाल पौड़ै। 3 ज़ैबै साइप्रस दिशौ ता, आमुऐ सेऊ उल़टी भिलै छ़ाड़ौ, और सीरिया परदेशा लै डेइयौ सूरा देशा दी डेवै। कैलैकि तिऐ किश्ती कु समान उतारणौ थौ। 4 च़ेलेऊ कु मिलियौ आमै तिऐ सात दिना झ़ांऊ रौऐ, तिंउऐ पवित्र आत्मा कु शिखीयौ पौलुसा कु औरज़ कौरी कि यरुशलेम शहरा लै नाईं डैऔ। 5 सात दिना बासिऐ ज़ेबी तिदरु आमारै डेउणै रौ बौगत आशौ, ता आमै तिदरु डेई गौऐ। और सारेउऐ, छ़ेउड़ी और छ़ोहरुऐ आमै इलाकै कु बाइरै झ़ांऊ पौउंच़ाऐ। और आमुऐ डिका काऐ धौनी झुकियौ प्राथना की। 6 तैबै एकी दुजै कु मिलणै बासिऐ, आमै किश्ती दी च़ौड़ै, और सै डेवे आपणै-आपणै घौरै। 7 तैबै आमै सूर देशा कु किश्ती रौ सफर पुरौ कौरीयौ पतुलिमयिसा इलाकै दी पौउंच़ै और विश्वासी भाईऊ कु मिलियौ तिऊं आइलै एकी दिना दी रौऐ। 8 दुजै दिनै आमै तिदरु डेइयौ कैसरिया परदेशा दी आशै, और फिलिप्पुस परचार कौरणै वाल़ै रै घौरा कै ज़ो प्रेरितुऐ खास कौरी विधवा छ़ेउड़ीऊ री सेवा लै थै छ़ांटै औन्दै तिऊं साता मांझ़िया कु एक थौ डेइयौ तेसरै काऐ रौऐ। 9 तेसरी च़ार बिण ब्याई छ़ोटुड़ी थी, ज़ुण भविष्यवाणी कौरा थी। 10 ज़ैबै आमै भौरी दिना झ़ांऊ तिऐ रौऐ, ता अगबुस नावां रौ एक भविष्यवक्ता यहुदिया परदेशा कु आशौ। 11 तिणीऐ आमु काऐ आशीयौ पौलुसा रौ गाचौ नियौं और आपणै हाथ-बांगणै बानियौ बोलौ, “पवित्र आत्मा इणौ बोला आ, कि ज़ास आदमी रौ इयौ गाचौ आ तेस यरुशलेमा दी यहुदी इणौ बाना ई और दुजी ज़ातीऊ रै हाथा दी सौंभाल़ा ई।” 12 ज़ेबी आमुऐ इऐ बुशै शुणी ता आमै और तिदलै लोगुऐ पौलुसा कु औरज़ कौरी कि यरुशलेमा लै नाईं डेवे। 13 पर पौलुसै ज़वाब दैऔ, तुमै लेरी-लेरीयौ मैरौ ज़िऊ कैलै चोड़ाई? हाऊं ता प्रभु यीशु रै नावां री ताइंऐ यरुशलेमा दी बानिणा लै नाईं बल्कि मौरणा लै भी तयार ऊ। 14 ज़ैबै तिणीऐ नाईं मानौ ता आमै इणै बोलीयौ च़ुटुक थाकी गौऐ कि प्रभु री मौरज़ी पुरी हुआ। 15 कुछ़ दिना बासिऐ आमुऐ तयारी की और यरुशलेमा लै च़ाल पौड़ै। 16 कैसरिया परदेशा कु भी कुछ़ च़ेलै आमु आइलै च़ाल पौड़ै और आमै मनासौन नावां रै साइप्रसा रै पैहलै च़ेलै रै काऐ निऐं और आमै तेसरै काऐ थाकै। पौलुसा री याकुबा आइलै मुलाकात 17 ज़ेबी आमै यरुशलेमा दी पौउंच़ै ता विश्वासी भाई बड़ी खुशी कौरीऐ आमुकु मिलै। 18 दुजै दिनै पौलुसै आमै याकुबा काऐ निऐं, ज़िऐ सारै स्याणै कौट्ठै थै। 19 तैबै तिणीऐ तिउंकै ढाल कौरीयौ ज़ो-ज़ो काम परमेश्वरै तेसरी सेवा कौरीऐ दुजी ज़ाती मांझ़िऐ किऐ थै सै सारै बारी-बारिऐ बोलै। 20 तिंउऐ इणै शुणियौ परमेश्वरा री बौड़ाई की ई, तैबै तेसलै बोलौ, ओ भाई तू ता ज़ाणाई कि यहुदिऊ मांझ़िया कु कई हज़ारुऐ विश्वास कियौ आ, और मुसा रै सारै नियम आच़्छ़ा कौरी माना ई। 21 यहुदी विश्वासिऊ कै तैरै बारै दी बोलौ आ औन्दौ कि तू दुजी ज़ाती दी रौइणै वाल़ै यहुदिऊ कै मुसा रै नियम नाईं मानणै रै बारै दी शिखावा ई और बोलाई कि ना आपणै लोल़डेऊ रौ खतना कौराऔ, और ना यहुदी रिवाज़ मानौ। 22 तैबै का कौरुलै लोग ज़ुरुरी शुणाई कि तू आशौ औन्दौ ई। 23 एथीलै ज़ो आमै ताउंकै बोली ई तेस कर, आमुकै इदै च़ार आदमी ई ज़ुणिऐ परमेश्वरा कु मन्नत मांगी ऐन्दी। 24 तिऊं नीईंयौ तिऊं आइलै आपु भी शुद्ध हुणै री विधी पुरी कर। और तिउंकै खौरच़ौ दै ताकी सै आपणै बाल़ कौटावा, तैबै सारै ज़ाणाई कि ज़ो बुशै तिउंकै तैरै बारै दी बोली ऐन्दी तिऊंदी कोई सौच़्च़ाई नाईं आ पर तू आपु भी कानून मानियौ तिऊं ज़िणौ हाण्डा ई। 25 पर तिऊं दुजी ज़ाती रै बारै दी ज़ुणिऐ विश्वास कियौ आ आमुऐ इणौ फैसलौ कौरीयौ लिखौ आ कि सै मुर्तिऊ काऐ बौल़ी कौरै औन्दै मांस और लोऊ कु, और गौल़ै फैंच़ै औन्दै मांसा कु, और गान्दै कामा कु दूर रौआ। 26 दुजै दिनै पौलुस तिऊं लोगु नीईंयौ और आपु तिऊं आइलै शुद्ध हुइयौ परमेश्वरा रै घौरा दी डैऔ। और तिऐ बोली गौ कि शुद्ध हुणै रै दिना ई मतलब तिऊं मांझ़िया कु हर एकी लै बौल़ी च़ौड़ाउणै रै दीन केबी झ़ांऊ पुरै हुआई। परमेश्वरा रै घौरा दी पौलुस पाकुड़नौ 27 ज़ेबी सै सात दीन पुरै हुणै वाल़ै थै, तैबै आसिया परदेशा रै यहुदिऊ ऐ पौलुस परमेश्वरा रै घौरा दी देखीयौ सारै लोग च़ितल़ाऐ और हाकै देइयौ सेऊ पाकड़ी गौ। 28 ओ इस्राइलिऊ ओ आमारी मज़द कौरौ एऊ सेज़ौ आदमी आ ज़ो लोगु और नियमा रै और इऐं ज़ागाह रै विरोधा ई सारी ज़ागाह दी सारै लोगु कै शिखावा आ, इदरा झ़ांऊ कि दुजी ज़ाती भी परमेश्वरा रै घौरा दी आणियौ तिणीऐ इऐ पवित्र ज़ागाह गांदी कौरी आ। 29 तिंउऐ इणौ एथीलै बोलौ थौ कैलैकि एथकु पैहलै इफिसुसा रै लोग त्रुफिमुस पौलुसा आइलै इलाकै दी देखौ थौ, और सै सौमझ़ै कि पौलुसै सेऊ परमेश्वरा रै घौरा दी आणौ आ। 30 तैबै सारै इलाकै दी हालौ पोड़ी गौ और लोग फेटा मारीयौ कौट्ठै हुऐ और पौलुस पाकड़ियौ परमेश्वरा रै घौरा कु बाइरै घीशियौ आणौ, आपु किऐ फेटी दार बन्द। 31 ज़ैबै सै तेस झ़ांगणौ च़ाहा थै ता तिंउरै मुख्यै कै खौबर पौउंच़ी कि सारै यरुशलेमा दी हालौ पौड़ी गौ आ। 32 तैबै सेऊ फेटी सिपाईउ और सुबेदार नीईंयौ तिऊं काऐ तौल़ै फेटै मारीयौ आशौ, और भीड़ा रै लोगुऐ सिपाईउ रौ मुख्यौ और सिपाईउ देखीयौ पौलुस पिटणौ छ़ाड़ी गौ। 33 तैबै मुख्यै पौलुसा काऐ आशीयौ सेऊ पाकड़ौ और दुई शांगल़ी कौरी बानणै रौ हुकम देइयौ पुछ़दै लागौ कि इयौ कुण आ और इणीऐ का कियौ आ? 34 पर भीड़ा मांझ़िया कु कुण कुछ़ बोलदै लागै और कुण कुछ़, ज़ैबै हालै री वज़ाह कु तेसकै सौच़्च़ाई पौतौ नाईं लागी, तैबै तिणीऐ एखुलै दी निणै रौ हुकम दैऔ। 35 ज़ैबै सेऊ पैड़ीऊ दी पौउंच़ौ ता इणौ हुऔ कि भीड़ा रै दबाव री वज़ाह कु फौज़ीउऐ सेऊ च़ुंगियौ पा निणौ पौड़ौ। 36 कैलैकि लोगु री भीड़ हालौ पाइंदै लागी कि एस पोरु झ़ांगौ। 37 ज़ैबै सै पौलुस एखुलै दी निणै वाल़ै थै ता तिणीऐ पलटना रै मुख्यै लै बोलौ कि का मुलै इज़ाज़त आसती आ कि हाऊं तुमुकै कुछ़ बोलु, तिणीऐ बोलौ, का तू युनानी बोली ज़ाणाई? 38 का तू सेज़ौ मिस्र देशा रौ नाईं ज़ुणिऐ पैहलै बानिऔ हथियार वाल़ै च़ार हज़ार लोग ज़ांगल़ा दी निऐं? 39 पौलुसै बोलौ, नाईं हाऊं ता यहुदी लोगु किलकिया परदेशा रै ज़ानै-मानै तरसूस इलाकै रौ रौइणै वाल़ौ ऊ। हाऊं ताऊं कु औरज़ कौराऊ कि मुं लोगु आइलै बुशै लाइणै दै। 40 ज़ैबै तिणीऐ हुकम दैऔ ता पौलुसै पैड़ीऊ दी खौड़ी हुइयौ लोगु कै हाथा कौरी च़ुटुक रौइणै रौ इशारौ कियौ ज़ैबै सै च़ुटुक रौई गौऐ ता सेऊ इब्रानी बोली दी बुशै लाइंदै लागौ। |
This work is licensed under Creative Commons Attribution-ShareAlike 4.0 License.