प्रेरित 2 - पहाड़ी महासुई

पवित्र आत्मा रौ उतुरणौ

¹ ज़ेबी यहुदी लोगु रौ पिन्तेकुस्त साज़ै रौ दीन आशौ, ता सै सारै एकी ज़ागाह दी कौट्ठै थै।

² एकदम सौरगा कु तेज़ बागुरा ज़िणौ च़गराअ हुऔ, और तेथ कौरी सारौ घौर ज़िऐ सै बोशै औन्दै थै, हिली गौ।

³ और तिउंकै आगी री लपटै दिशी ज़िभा बाशीऐ और सै तिऊं मांझ़िऐ सारेऊ माथै बौसी।

⁴ सै सारै पवित्र आत्मा कौरी भौरुऐ, और ज़िणौ पवित्र आत्मै तिउंकै बोलणै री शक्ति देई, सै अलग-अलग बोली बोलदै लागै।

⁵ और तेबी तिऐ रै परमेश्‍वरा कु डौरणै वाल़ै भौरी थै ज़ुण सण्सारा रै हर देशा कु आशीयौ तेस साज़ै मनाउणा लै यरुशलेम शहरा दी रौआ थै।

⁶ ज़ेबी इऐ बागुरा ज़िणौ च़ौगराव हुऔ ता भीड़ कौठै हुई गोई और लोग घबराई गौऐ, कैलैकि हरेक आदमी कै शुणींया थौ कि इऐ मेरी ई बोली दी बोलदै लागै औन्दै।

⁷ सै सारै हैरान हुऐ और हैरानी कौरी बोलदै लागै, “देखौ, इऐ ज़ो बोलदै ई लागै औन्दै का इऐ सब गलीला रै नाईं?

⁸ तैबै कैलै शुणींया आमुकै आपणी-आपणी ज़नमभुमी री बोली?

⁹ आमै ज़ो पारथी, मेदी, एलानी और मेसोपोटामिया, यहुदिया, कप्पदूकिया, पुनतुस और आसिया,

¹⁰ और फ्रूगिया पंफूलिया, मिस्र और लीबिया देश ज़ो कुरेना रै आस-पास ई, इऊं सभी देशा रै रौइणै वाल़ै और रोमी वासी,

¹¹ यहुदी और यहुदी ज़ाती मानणै वाल़ै, क्रेती और अरबी रै भौरी लोग भी ई, पर आपणी-आपणी बोली दी तिऊंकु परमेश्‍वरा रै बौड़ै-बौड़ै कामा री बुशै शुणी ई।”

¹² सै सारै हैरान हुऐ और घबराइयौ एकी दुजै कु बोलदै लागै, “इयौ का हुंदै लागौ औन्दौ?”

¹³ पर ओरीउऐ मज़ाक कौरीयौ बोलौ, “इऐ ता नौईं सुरी रै नौशै दी मगन ई।”

पतरसा रौ भाषण

¹⁴ तैबै पतरस तिऊं ग्याराह आइलै खौड़ौ हुऔ और हाकै मारीयौ बोलदै लागौ, “ओ यहुदिया और यरुशलेम शहरा रै सारै रौइणै वाल़ेउओ, इणौ ज़ाणौ। और कौन्थु लाइयौ मेरी बुशै शुणौ।

¹⁵ ज़िणौ कि तुमै सौमुझ़देई लागै औन्दै, इऐ लोग नौशै दी नाईं ई, कैलैकि इबी ता दोतकौ बौगत आ।

¹⁶ पर इऐ सेज़ी बूश आ, ज़ो योएल भविष्यवक्तुऐ बोली थी,

¹⁷ परमेश्‍वर बोला आ, कि ‘आखरी दिना दी इणौ हुणौ कि हाऊं आपणी आत्मा सारै लोगु कै दिआऊ और तुमारै छ़ोहरु और छ़ोटुड़ी भविष्यवाणी कौरा ई, और तुमारै ज़वान देखा ई दर्शण, और तुमारै स्याणै देखा ई सुइणै।’

¹⁸ बल्कि हाऊं आपणै नुकुर और आपणी नुकराणी माथै भी, सेज़ै दीनु दी आपणी आत्मा मांझ़िऐ कु आत्मा दिआऊ, और सै भविष्यवाणी कौरा ई।

¹⁹ और हाऊं माथै सौरगा दी नोखै काम और धौतरी माथै निशाण, मतलब लोऊ, आग और धुंऐ रै बादल़ देखाउआ ऊ।

²⁰ प्रभु रै फैसलै वाल़ै दिना रै आशणै कु पैहलै सुरज न्यारौ और ज़ून लोऊ। ज़िणी हुणी आ।

²¹ और ज़ुण कुण प्रभु रौ नाऊं निंआ लौ सेऊ छ़ुटकारौ पा आ।”

²² “ओ इस्राइली लोगुओ, इऊं बुशै शुणौ, यीशु नासरी एक आदमी थौ। ज़ासरौ परमेश्‍वरा री तौरफा कु हुणै रौ सबूत तिऊं शक्ति वाल़ै काम, हैरानी वाल़ै कामा और निशाणा कु पौगड़ौ ई।

²³ सेज़ौ यीशु ज़ुण परमेश्‍वरा री मौरज़ी और पुराणै ज्ञाना कौरीऐ पाकड़ुऔ। तुमुऐ बुरै लोगु रै हाथा कौरी क्रुसा माथै च़ौड़ाइयौ पोरु झ़ांगौ।

²⁴ पर सेऊ परमेश्‍वरै मौउता रै बन्धना कु छ़ुड़ाइयौ ज़िउंदौ कियौ। कैलैकि एऊ हुणौ मुश्कल़ थौ कि सेऊ तेथरै वंशा दी रौआ।

²⁵ कैलैकि दाऊद यीशु मसीहा रै बारै दी बोला कि, ‘हाऊं प्रभु रोज़ आपु काऐ थाका थौ देखदै लागी कैलैकि सेऊ मुं आइलै आ, ताकी हाऊं लोटु नाईं।’

²⁶ एथीलै मैरौ मन खुश हुऔ, और मेरी ज़ीभ मगन हुई। बल्कि मैरौ शरीर भी आशी दी रौआ।

²⁷ कैलैकि तू मैरै प्राण पौइताल़ा दी नाईं छ़ाड़दौ। और ना आपणौ पवित्र ज़ौणै रौ मौड़ौ शौड़णै दैंदौ।

²⁸ ताऐं मुकै ज़िन्दगी री बाट देखाल़ी आ। तू मुं दर्शण देखाल़ीऔ खुशी कौरी भौराई।”

²⁹ “ओ भाईउओ, हाऊं आमारै स्याणै दाऊदा रै बारै दी तुमुकै हिम्मत्ती कौरीऐ बोली सौका ऊ कि सेऊ ता मौरी गौ और दबाऔ भी आ और तेसरी कब्र आज़ झ़ांऊ इदै आमु मांझ़िऐ ज़िउंदमान आ।

³⁰ सेऊ भविष्यवक्ता थौ, सेऊ ज़ाणा थौ कि परमेश्‍वरै मुं आइलै कसम खाइयौ वायदौ कियौ आ कि हाऊं तैरै वंशा कु एक आदमी तेरी राज़गादी माथै बोशाल़ा ऊ।

³¹ तिणीऐ भविष्यवाणी कौरीयौ पैहलै कु देखीयौ मसीहा रै ज़िउंदै हुणै रै बारै दी भविष्यवाणी की, कि ना ता तेसरै प्राण अधोलोका दी छ़ाड़ै और ना तेसरौ शरीर शौड़ौ।

³² एज़ौ यीशु परमेश्‍वरै ज़िउंदौ कियौ, ज़ेथरै आमै सारै शाजत ई।

³³ इणै कौरी परमेश्‍वरा रै सुल़टै हाथा कु सारेऊ कु आच़्छ़ौ इनाम पाइयौ, और बाबा कु सै पवित्र आत्मा पाइयौ ज़ेथरौ परमेश्‍वरै वायदौ कियौ थौ, तिणीऐ सेऊ देई गौ ज़ो आज़ तुमै देखा और शुणाई।

³⁴ कैलैकि दाऊद ता सौरगा दी नाईं च़ौड़ौ। पर सेऊ आपु बोला आ, ‘प्रभु परमेश्‍वरै मैरै प्रभु कै बोलौ, मेरी सुल़टी भिलै बोश,

³⁵ ज़ेबी झ़ांऊ हाऊं तैरै दुश्मनु तैरै सामनै धौनी ना कौरुलै।’ ”

³⁶ और आबै इस्राइला रै सारै लोगु कै पौतौ लागा लौ कि परमेश्‍वरै एज़ौ यीशु ज़ेज़ौ यीशु तुमुऐ क्रुसा माथै च़ड़ाऔ, “प्रभु भी और मसीहा भी चाणौ।”

³⁷ तैबै एज़ी बूश शुणनै वाल़ै लोगु रै ज़िवा दी च़ुबी गोई, तैबै सै पतरस और ओरी च़ेलेऊ कु पुछ़दै लागै, “ओ भाईओ, आमै का कौरुलै?”

³⁸ पतरसै तिउंलै बोलौ, “मन बौदल़ौ, और तुमु मांझ़िया कु हरेक आपणै-आपणै पापा री माफी पाइणा लै यीशु मसीह रै नावां दी बपतिस्मौ निऔं, तैबै तुमै पवित्र आत्मा रौ दाण पा ई।

³⁹ कैलैकि एऊ वायदौ तुमु, तुमारी सन्ताना, और तिऊं सारै दूर-दुरा रै लोगु लै भी आ ज़ास प्रभु आमारौ परमेश्‍वर आपु काऐ औटावा।”

⁴⁰ पतरसै भौरी ओर बुशु कौरी भी गवाही देई-देइयौ सौमझ़ाऔ कि तुमै आपु इऊं दारखी ज़ाती कु बौच़ौ।

⁴¹ ज़ुणी लोगुऐ भी पतरसा रै वचन शुणियौ अपणाऐ तिंउऐ बपतिस्मौ निऔं। और सेज़ै दिनै चीन हज़ार लोगु रै लगभग तिऊं विश्वासिऊ आइलै मिली गौऐ।

⁴² और सै सारै प्रेरितु कु शिक्षा पाइणा लै, खुम्बल़ी छ़ाड़ना लै, रोटी चोड़दै, और प्राथना कौरणै दी मगन हुई गौऐ।

विश्वासिऊ री संगती

⁴³ यरुशलेमा रै सारै लोग घौबरा ई गौऐ, और भौरी नोखै काम और निशाण प्रेरितु कौरी पौगड़ौ हुआ थै।

⁴⁴ सारै विश्वासी कौठै रौआ थै, और तिउंरी सारी च़िज़ै साज़ै री हुआ थी।

⁴⁵ सै आपणी-आपणी ज़यदाद और समाना बेच़ी-बेच़ीयौ ज़िणी ज़ासकै ज़ुरत हुआ थी बांटीऔ कौरा थै।

⁴⁶ सै रोज़ एक मन हुइयौ परमेश्‍वरा रै घौरा दी कौठै हुआ थै, घौरा-घौरा कै रोटी चोड़ीऔ खुशी कौरीऐ निउलै हुइयौ रोटी खा थै,

⁴⁷ और परमेश्‍वरा री बड़ाई कौरा थै, सारै लोग तिऊंकु खुश थै: और ज़ुण छ़ुटकारौ पा थौ, तिऊं प्रभु रोज़ तिऊं मांझ़िऐ मिलावा थौ।