प्रेरित 18 - पहाड़ी महासुईकुरिन्थुस इलाकै दी 1 तेथ बासिऐ पौलुस एथेंस शहरा छ़ाड़ियौ कुरिन्थुस शहरा दी आशौ। 2 तिऐ तेसकै अक्विला नावां रौ एक यहुदी मिलौ, ज़ासरौ जनम पुन्तुसा इलाकै दी हुऔ थौ। सेऊ आपणी छ़ेउड़ी प्रिस्किला आइलै इटली देशा कु कुछ़ भौगत पैहलै ई आशौ थौ, कैलैकि क्लौदियुस रोमी आफसरै सारै यहुदिऊ लै रोम देश छ़ाड़णै रौ हुकम देई गौ थौ, एथीलै पौलुस तिंउरै काऐ डैऔ। 3 कैलैकि पौलुस और अक्विला रौ एक ज़िणौ काम थौ, एथीलै सेऊ इऊं आइलै रौऔ, और सै कामा कौरदै लागै। तिऊंरौ काम ताम्बु चाणनै रौ थौ। 4 पौलुस हर आरामा वाल़ै दिना दी आराधनालय दी डेइयौ सवाल-ज़वाब कौरीयौ यहुदिऊ और दुजी ज़ातीऊ भी प्रभु यीशु माथै विश्वास कौरना लै सौमझ़ावा थौ। 5 ज़ेबी सिलास और तीमुथियुस मकिदुनीया इलाकै कु वापिस आशै, ता पौलुसै ताम्बु चाणनै रौ काम पोरु छ़ाड़ौ, और पौलुस वचन शुणाउंदै और यहुदिऊ कै गवाही दैंदै थाकौ लागी कि यीशु ई मसीह आ। 6 पर ज़ैबै यहुदी लोग पौलुसा रौ विरोध और बेइज़्ज़ती कौरदै लागै, ता पौलुसै आपणै जुड़कै झाड़ै और तिउंलै बोलौ, “तुमारौ लोऊ तुमारै औट्ठै माथै च़ांई पौड़ौ! हाऊं निर्दोष ऊ। आबै हाऊं दुजी ज़ाती रै लोगु काऐ डियाऊ और परमेश्वरा री खौबर तिउंकै शुणावा ऊ।” 7 आराधनालय कु सेऊ तितुस यूस्तुस नावां रै परमेश्वरा रै एकी भौगता रै घौरै आशौ दुजी ज़ाती रै लोगु शिक्षा दैंदै आशौ, ज़ासरौ घौर आराधनालय काऐ थौ। 8 तैबै आराधनालय रौ मुख्यै क्रिसपुसै आपणै सारै टौबरु आइलै प्रभु माथै विश्वास कियौ। और भौरी कुरिन्थिऊ रै लोगुऐ शुणियौ विश्वास कियौ और बपतिस्मौ नियौं। 9 प्रभुऐ एकी राचीऐ पौलुसा कै दर्शण देइयौ बोलौ, “डौरै नाईं बोलदै थाक लागी च़ुटुक ना थाक। 10 कैलैकि हाऊं ताऊं आइलै ऊ, और कोई ताऊं माथै हामलै कौरीयौ ताउंलै नुकसान नाईं पौउंच़ाउंदौ कैलैकि एज़ै इलाकै रै भौरी लोग मुं माथै विश्वास कौरा ई।” 11 एथीलै पौलुस तिऊं मांझ़िऐ तिउंकै परमेश्वरा रौ वचन शिखाउंदै देउड़ी साला झ़ांऊ रौऔ। 12 ज़ेबी गल्लियो अखाया परदेशा रौ आफसर थौ, ता यहुदी लोगुऐ कौट्ठै हुइयौ पौलुसा माथै हामलौ कियौ, और तेस फैसलै कौरणै री ज़ागाह दी आणियौ बोलदै लागै, 13 “एऊ लोगु कै सौमझ़ावा की परमेश्वरा री आराधना इणी च़ांई कौरणी, ज़ो नियमा रै खिलाफ आ।” 14 ज़ेबी पौलुस बोलणै वाल़ौ थौ, ता गल्लियो आफसरै यहुदिऊ लै बोलौ, “ओ यहुदिउओ, अगर इऐ बुरी और गलत बूश हुआ थी, ता हाऊं ज़ुरुर तुमारी शुणा थौ। 15 पर अगर इयौ झ़ौगड़ौ सिरफ बोलीयौ, नावां रौ, और तुमारै नियमा रै बारै दी आ ता, तुमै ज़ाणौ। कैलैकि हाऊं इऊं बुशु रौ फैसलै कौरणै वाल़ौ नाईं बौणनौ च़ाहंदौ।” 16 और तिणीऐ सै तिदरु पोरु गाड़ाई गौऐ। 17 तैबै भीड़ा रै लोगुऐ आराधनालय रौ मुख्यै सोस्थिनेस फैसलै कौरणै री ज़ागाह दी पिटौ। पर गल्लियो आफसरै इऊं बुशु री कोई फिकर नाईं की। अन्ताकिया लै वापिस डेउणौ 18 पौलुस भौरी दिना झ़ांऊ कुरिन्थुस शहरा दी रौऔ, तैबै विश्वासी भाईऊ कु मिलियौ किंख्रिया दी एथीलै मूंड कुंडाऔ, कैलैकि तिणीऐ मन्नत थी मांगी ऐन्दी, और किश्ती दी सीरिया इलाकै लै डैऔ तेस आइलै साथा दी प्रिस्किला और अक्विला थै। 19 तिणीऐ इफिसुस शहरा दी पौउंच़िऔ सै छ़ाड़ै तिऐ, आपु लागौ आराधनालय दी डेइयौ यहुदिऊ आइलै सवाल ज़वाब कौरदै। 20 ज़ैबै लोगुऐ तिंउऐ तेसकु औरज़ कौरी कि, “आमु आइलै कुछ़ दिना दी औज़ौ रौऊ।” ता तिणीऐ नाईं मानौ। 21 पर इणै बोलीयौ तिदरु डैऔ कि, “अगर परमेश्वर च़ाहा लौ ता हाऊं तुमु काऐ दुबारौ आशाऊ।” तैबै सेऊ इफिसुसा कु किश्ती दी बोशियौ डैऔ। 22 और कैसरिया इलाकै दी पौउंच़ियौ (यरुशलेम शहरा लै डैऔ) और कलिसिया रै लोगु कु मिलियौ अन्ताकिया इलाकै लै डैऔ। पौलुसा रौ चीजी बारै परचारा दी डेउणौ 23 तैबै कुछ़ दिना दी तिऐ रौइयौ तिदरु निकल़ियौ गलातिया और फ्रूगिया परदेशा दी सारै च़ेलै विश्वासा दी पाकै कौरदै थाकौ लागी। इफिसुस इलाकै दी अपुल्लोस 24 अपुल्लोस नावां रौ एक यहुदी ज़ासरौ जनम सिकन्दरिया शहरा दी हुऔ थौ, ज़ो ज्ञानी आदमी थौ और पवित्रशास्त्र आच़्छ़ा कौरी ज़ाणा थौ, सेऊ इफिसुसा दी आशौ। 25 तिणीऐ प्रभु री बाटा री शिक्षा थी पाई ऐन्दी, और ज़िवा लाइयौ यीशु रै बारै दी ठीक-ठीक शुणावा और शिखावा थौ, पर सेऊ सिरफ यहुन्ना रै बपतिस्मौ री बूश ज़ाणा थौ। 26 अपुल्लोस आराधनालय दी निडर हुइयौ बोलदै लागौ। पर ज़ेबी प्रिस्किल्लै और अक्विलै तेसरी बुशै शुणी ता तिंउऐ सेऊ आपणी भिलै नियौं और परमेश्वरा री बाट तेसकै औज़ौ भी ठीक-ठीक सौमझ़ा ई। 27 ज़ेबी तिणीऐ सुंच़ी गौ कि पारभिलै डेइयौ अखाया इलाकै लै डेउणौ, ता विश्वासी भाईउऐ तेसकै हिम्मत देइयौ च़ेलेऊ लै लिखौ कि सै तेसकु आच़्छ़ा कौरी मिला। और तिणीऐ तिऐ डेइयौ तिऊं लोगु री भौरी मज़द की ज़ुणिऐ बौड़ी दया री वज़ाह कु विश्वास कियौ थौ। 28 कैलैकि सेऊ पवित्रशास्त्रा कु गवाही देई देइयौ कि यीशु ई मसीहा आ, बड़ी हिम्मत्ती कौरी यहुदिऊ कै सारेऊ रै सामनै थौ लागौ औन्दौ ज़वाब दैंदै। |
This work is licensed under Creative Commons Attribution-ShareAlike 4.0 License.