प्रेरित 17 - पहाड़ी महासुई

थिस्सलुनीका इलाकै दी

¹ तैबै पौलुस और सिलास अम्फिपुलिस और अपुल्लोनिया रै इलाकै बाटीऐ थिस्सलुनीके गांवा दी आशै ज़िऐ यहुदिऊ री एक आराधनालय थी।

² पौलुस आपणी रीती ज़िणौ तिऊं काऐ डैऔ और, तिऊं आइलै चीन आरामा वाल़ै दिना दी पवित्रशास्त्रा कु वाद-विवाद कौरदै थाकौ लागी।

³ और तेथरौ मतलब तिऊं काऐ साफ-साफ सौमझ़ावा थौ, कि मसीह रौ दु:ख उठाउणौ, और मौरै औन्दै मांझ़िया कु ज़िउंदौ हुणौ, ज़ुरुरी थौ। “और एऊ यीशु ज़ासरी हाऊं तुमु काऐ बुशै शुणावा ऊ, मसीह आ।”

⁴ तिऊं मांझ़िया कु केतरै यहुदिऊ, और भौगत दुजी ज़ातीऊ मांझिया कु कई लोगुऐ, और भौरी मुख्यै छ़ेउड़ीउऐ, विश्वास कौरी गौ और पौलुस और सिलासा आइलै मिली गौऐ।

⁵ पर यहुदी गौऐ तिऊंकु च़िड़ी, तिंउऐ बज़ारा कु कुछ़ बुरै लोग कौट्ठै किऐ और भीड़ कौट्ठै कौरीयौ इलाकै दी तिंउरै खिलाफ शोर-शराबौ मच़ाउंदै लागै, और यासोना रै घौरा दी हामलै कौरीयौ पौलुस और सिलास बाइरै गाड़दै लागै।

⁶ पर ज़ैबै तिउंकै पौलुस और सिलास तिऐ नाईं मिलै, ता तिंउऐ यासोन और कुछ़ विश्वासी भाई इलाकै रै मुख्यै लोगु काऐ झिड़ियौ निऐं, और हाकै मारीयौ बोलदै लागै कि “इऐ लोग ज़ुणिऐ सण्सारा रै हर ज़ागाह दी उल़टौ-पुल़टौ कौरी गौ आ, इदै भी आशी गौऐ ई।

⁷ यासोनै सै आपणै घौरा कै थै छ़ाड़ै औन्दै। इऐ सारै इणौ बोलाई कि यीशु राज़ौ आ, और कैसर राज़ै रै हुकमा रौ विरोध कौरा ई।”

⁸ तिंउऐ लोग और इलाकै रै मुख्यै लोग इणै बोलीयौ तिंउरै खिलाफ भड़काऐ।

⁹ एथीलै तिंउऐ यासोन और बाकी लोगु री ज़मानत नीईंयौ सै तिदरु डेउणै दै।

बिरीया इलाकै दी

¹⁰ विश्वासी भाईउऐ तेबी राची-राच पौलुस और सिलास बिरीया गांव लै भेज़ै, तिऐ पौउंच़ियौ सै यहुदिऊ री आराधनालय दी डेवै।

¹¹ इऐ लोग ज़ो थिस्सलुनीके शहरा रै यहुदी लोगु कु भौलै थै, और इउंऐ बड़ी खुशी कौरीऐ प्रभु रौ वचन अपणाऔ, और हर दिना दी पवित्रशास्त्रा दी देखा थै कि इऐ बुशै इणी आसती कि नाईं।

¹² एथीलै तिऊं मांझ़िया कु भौरी लोगुऐ, और दुजी ज़ाती री मुख्यै छ़ेउड़ीऊ मांझ़िया कु और मौरदु मांझ़िया कु भौरी लोगुऐ विश्वास कियौ।

¹³ पर ज़ैबै थिस्सलुनीके रै यहुदिऊ कै पौतौ लागौ कि पौलुस बिरीया गांवा दी भी परमेश्‍वरा रौ वचन शुणाउंदै आ लागौ औन्दौ ता सै तिऐ आशीयौ भी लोगु भड़काउंदै और विरोध कौरदै लागै।

¹⁴ तैबै विश्वासी भाईउऐ तेबी पौलुस तिदरु समुन्दरा रै डिका झ़ांऊ भेज़ौ। सिलास और तीमुथियुस छ़ाड़ै तिऐ आपु काऐ।

¹⁵ ज़ुण पौलुसा रै साथी थै तिंउऐ सेऊ एथेंस शहरा झ़ांऊ निऔं। तिऐ पौलुसै तिउंलै हुकम दैऔ कि सिलास और तीमुथियुसा लै बोलेऊ कि सै मुकाऐ ज़ल्दी कु ज़ल्दी आशा, इणै शुणियौ सै तिदरु वापस आशै।

एथेंस इलाकै दी

¹⁶ ज़ेबी पौलुस एथेंस शहरा दी सिलास और तीमुथियुसा ज़ागदै थौ लागौ औन्दौ, तिऐ तेस इलाकै दी भौरी मूर्ती देखीयौ पौलुसा आत्मा दी भौरी दुखी हुऔ।

¹⁷ एथीलै पौलुस आराधनालय दी यहुदिऊ और भौगत लोगु आइलै, और बाटा दी ज़ुण भी लोग पौलुसा कै मिला थै तिऊं आइलै रोज़ वाद-विवाद कौरा थौ।

¹⁸ तैबै इपीकूरी और स्तोईकी ज्ञानी लोग भी तेसकु स्वाल-ज़वाब कौरदै लागै। कुछ़ लोग लागै बोलदै “एऊ बुशुवारौ का शुणाउणौ च़ाहा सा?” पर कुछ़ लोगुऐ बोलौ, “एऊ दुजै देवा रौ परचार कौरणै वाल़ौ ज़ाणिया आ”, कैलैकि पौलुस यीशु रौ और यीशु रै ज़िउंदै हुणै रौ परचार कौरा थौ।

¹⁹ तिंउऐ पौलुस आपु आइलै अरियुपगुसा नावां रै आराधनालय दी नियौं। और तिऐ तेसकु पुछ़ौ, “कि आमुकै बोल ज़ो तू नौईं शिक्षा दियाई इऐ कासरै बारै दी आ?

²⁰ कैलैकि तू आमुकै नोखी बुशै शुणावा ई एथीलै आमै ज़ाणनौ च़ांई कि एथरौ मतलब का सा”।

²¹ (कैलैकि भौरी एथेंसा रै लोग और परदेशी ज़ो इदै रौआ ई सै नौईं-नौईं बुशै बोलणै और शुणनै दी आपणौ भौगत नाईं बितावा थै)

अरियुपगुसा री खुंबल़ी दी पौलुसा रौ भाषण

²² तैबै पौलुसै अरियुपगुस नावां रै आराधनालय रै बिच़ा दी खौड़ै हुइयौ बोलौ, “ओ एथेंसा रै लोगुओ, हाऊं देखाऊ कि हर बुशा दी तुमै दैऔ बौड़ै मानणै वाल़ै ई।

²³ कैलैकि मुंइऐ आण्डदी बारै तुमारै पुज़णै री ज़ागाह देखी, ता मुंइऐ एक इणी बेदी भी देखी ज़ेथदी इणौ थौ लिखौ औन्दौ कि, ‘अणज़ाणै ईश्वरा लै।’ एथीलै ज़ासरी तुमै बिण ज़ाणै आराधना कौरा ई हाऊं तुमुकै तेसरै बारै दी खुशी री खौबरी शुणावा ऊ।

²⁴ ज़ुणी परमेश्‍वरै धौतरी और धौतरी री सारी च़िज़ै चाणी ई, सेऊ सौरगा रौ मालिक हुइयौ, हाथा रै चाणै औन्दै परमेश्‍वरा रै घौरा दी नाईं रौइंदौ।

²⁵ ना केज़ी च़िज़ा री ज़ुरता री वज़ाह कु आदमी री मज़दा री ज़ुरत, कैलैकि सेऊ आपु सारेऊ कै ज़िन्दगी और सांस और सब कुछ़ दिया आ।

²⁶ तिणीऐ एकी आदमी कु सारी ज़ाती धौतरी माथै रौइणा लै चाणी आ। और तिणीऐ तिऊंरौ भौगत फिक्स, और रौइणै री ज़ागाह री भी मेंड लाई ऐन्दी,

²⁷ ताकी सै परमेश्‍वर लोड़ा, और सेऊ तिउंकै लोड़ीयौ मिला, तैबै भी सेऊ आमु मांझ़िया कु कासी कु भी दूर नाईं आसतौ।

²⁸ कैलैकि आमै तेसी दी ज़िउंदै, च़ालदै-फिरदै और खौड़ै रौई ई। ज़िणौ कि तुमारै कुछ़ आपणै कवीउऐ भी बोलौ आ कि, ‘आमै ता आपु भी तेसी री सन्तान ई।’

²⁹ एथीलै परमेश्‍वरा री सन्तान हुइयौ आमुऐ इणौ नाईं सौमझ़णौ च़ांई कि परमेश्‍वर सुनै, रुपै और पात्थरा ज़िणौ नाईं आ, ज़ो लोगु रै सोच़ा कौरी और कारीगरी कौरीऐ हुआई चाणै औन्दै।

³⁰ एथीलै परमेश्‍वरै लोगु री ना सौमझ़ा रै भौगता माथै ध्यान नाईं दैऔ, पर आबै हर ज़ागाह दी सारै लोगु लै मन बौदुल़णै रौ हुकम दिया आ।

³¹ कैलैकि तिणीऐ एक भौगत आ पाकौ कियौ औन्दौ, ज़ेथदी सेऊ एक आदमी कौरीऐ धौर्मा कौरी धौतरी रौ फैसलौ कौरा आ, ज़ो तिणीऐ पाकौ कियौ औन्दौ, और तिणीऐ सेऊ मौरै औन्दै मांझिया कु ज़िउंदौ कौरीयौ एज़ी बूश सारेऊ काऐ साबित कौरी गोई।”

³² मौरै औन्दै कु ज़िउंदै हुणै री बुशै शुणियौ कुछ़ लोग ता मज़ाक कौरदै लागै, और कुछ़ लोगुऐ बोलौ, कि “एज़ी बुशै आमै ताऊं कु दुजी बारै शुणी ई।”

³³ एथ माथै पौलुस तिऊं मांझिया कु उठीयौ निकल़ी गौ।

³⁴ पर तिऊं मांझ़िया कु कुछ़ लोग तेस आइलै मिली गौऐ, और प्रभु यीशु माथै विश्वास कियौ। ज़ेथ मांझ़िऐ दियुनुसियुस अरियुपगुसा रै गुटा रौ थौ, और दमरिस नावां री एक छ़ेउड़ी थी, और तिऊं आइलै ओर भी कुछ़ लोग थै।