प्रेरित 16 - पहाड़ी महासुईपौलुसा रौ तीमुथियुस साथाई निणौ 1 तैबै सेऊ दिरबै और लुस्त्रा इलाकै दी भी डैऔ। तिऐ तीमुथियुस नावां रौ एक च़ेलौ थौ, सेऊ कास यहुदी विश्वासी छ़ेउड़ी रौ छ़ोहरु थौ, पर तेसरौ बाब थौ युनानी देशा रौ। 2 सेऊ लुस्त्रा और इकुनियुमा इलाकै रै विश्वासी भाईऊ मांझ़िऐ सारेऊ कु भौलौ और आच़्छ़ौ आदमी थौ। 3 पौलुस तेस आपु आइलै निणौ च़ाहा थौ। और ज़ो यहुदी लोग सेज़ी ज़ागाह दी थै तिंउरी वज़ाह कु पौलुसै तीमुथियुसा रौ खतनौ कियौ, कैलैकि सै सारै ज़ाणा थै कि तेसरौ बाब युनानी देशा रौ थौ। 4 तैबै पौलुस और तेसरै साथी तिदरु इलाकै-इलाकै दी डेइयौ विश्वासिऊ कै तिऊं बिधी शिखाउंदै लागै ज़ो बिधी यरुशलेमा रै च़ेलेउऐ और स्याणेउऐ चाणी थी। 5 इणै कौरीऐ कलिसिया विश्वासा दी बौड़दै लागी और हर दिना दी गिनती दी भी भौरी बौड़ी। त्रोआसा दी: पौलुसा रौ दर्शण 6 सै फ्रूगिया और गलातिया परदेशा बाटीऐ डै, कैलैकि पवित्र आत्मै तिउंलै आसिया रै इलाकै दी वचन शुणाउणा लै नाईं थी कौरी ऐन्दी। 7 ज़ैबै सै मुसिया परदेशा दी पौउंच़ै, ता सै बितूनिया परदेशा लै डेउणौ च़ाहा थै। पर पवित्र आत्मै सै डेउणै नाईं दै। 8 तैबै सै मुसिया कु त्रोआसा दी आशै। 9 तिऐ पौलुसै राची एक दर्शण देखौ, कि एक मकिदुनीया इलाकै रौ आदमी खौड़ौ हुइयौ तेसलै औरज़ कौरीऔ बोलदै लागौ औन्दौ, कि “वारै मकिदुनीया दी आशीयौ आमारी मज़द कर।” 10 तेस दर्शण देखणै बासिऐ तेबी आमुऐ मकिदुनीया इलाकै लै डेउणै रौ फैसलौ कियौ, इणौ ज़ाणियौ कि परमेश्वरै आमै तिउंकै खुशी री खौबरी शुणाउणा लै औटाऐ ई। फिलिप्पी दी: लुदिया रौ ज़िऊ बौबल़िणौ 11 एथीलै त्रोआसा कु आमै पाणी री किश्ती दी सुमात्राके टापु और दुजै दिनै नियापुलिसा इलाकै दी आशै। 12 तिदरु आमै फिलिप्पी दी पौउंच़ै, ज़ो मकिदुनीया परदेशा रौ इलाकौ आ, और रोमियो री बस्ती आ। आमै तेस इलाकै दी कुछ़ दिना झ़ांऊ रौऐ। 13 आरामा रै दिना दी आमै इलाकै कु बाइरै नौईं काऐ इणौ सौमझ़ियौ डेवै थै, कि तिऐ प्राथना कौरणै री ज़ागाह मिला ली, पर तिऐ थी कुछ़ छ़ेउड़ी कौठै हुई ऐन्दी, आमै तिऊं काऐ बोशियौ बुशै लाइंदै लागै। 14 तिऐ एक लुदिया नावां री छ़ेउड़ी थी, ज़ुण परमेश्वरा री भगतण थी, ज़ो थुआतीरा री एक बेंगणी रौंगा रै जुड़कै बेच़णै वाल़ी थी, सै थी तिउंरी बुशु शुणदै लागी ऐन्दी। परमेश्वरै तिंआरौ ज़िऊ खोलौ ताकी सै पौलुसा री बुशै ध्याना कौरी शुणा। 15 ज़ैबै तिंआऐ सित टौबरुऐ बपतिस्मौ निऔं, तैबै तिंआऐ आमुकु औरज़ कौरी कि, “अगर तुमै मुं प्रभु री आच़्छ़ी विश्वासी माना ई ता मेरी भिलै च़ालौ और तिऐ रौएऊ,” और तिंआऐ आमै मौनाइयौ आपणै घौरै निऐं। पौलुस और सिलास कैदा दी 16 तैबै इणौ हुऔ ज़ैबै आमै प्राथना कौरणै री ज़ागाह लै थै लागै औन्दै डेउंदै, तैबै आमुकै एक दासी मिली ज़ासदी भविष्य बोलणै वाल़ी आत्मा थी। सै लोगु रौ भविष्य बोलीयौ आपणै मालिकु लै भौरी कुछ़ कमाइयौ आणा थी। 17 सै आमु और पौलुसा पिछ़ु इणै बोलीयौ आशदै लागी कि, “इऐ आदमी परमपरधान परमेश्वरा रै दास ई, ज़ो आमुकै छ़ुटकारै री खुश खौबरी शुणावा ई।” 18 सै भौरी दिना झ़ांऊ इणौ थाकी कौरदै लागी। इणौ रोज़ शुणी-शुणियौ पौलुस दुखी हुऔ, और पिछ़ाऊं फिरीऔ पौलुसै तिऐं बुरी आत्मा लै बोलौ, “हाऊं ताऊं लै यीशु मसीह रै नावां कौरी हुकम दिआऊ कि इऐं छ़ेउड़ी कु बाइरै निकुल़।” और सै तियांकु तेबी निकल़ी गोई। 19 ज़ैबै तियांरै मालिकुऐ देखौ कि आमारौ कौमाई री आश खातम हुई गोई तैबै तिंउऐ पौलुस और सिलास पाकड़ै और झ़ीड़ी-झ़ीड़ीयौ परधानु और अधिकारिऊ काऐ आणै। 20 तिंउऐ सै सौज़ा देणै वाल़ै आफसरा काऐ आणै, और बोलौ, “इऐ यहुदी ई और आमारै इलाकै दी आशीयौ गड़बड़ी फैलाउंदै ई लागै औन्दै। 21 इऐ इणै रिवाज़ा और बुशै ई लागै औन्दै शिखाउंदै ज़ो आमु रोमी लोगु लै मानणी और अपणाउणी ठीक नाईं आसती।” 22 तैबै भीड़ा रै लोग भी पौलुस और सिलासा रै खिलाफा दी खौड़ै हुऐ, और आफसरुऐ तिंउरै जुड़कै च़िरै और तिऊंदी बैंत लाइणै रौ हुकम दैऔ। 23 भौरी बैंत लौआइयौ सै ज़ेला दी पाऐ और ज़ेलरा लै हुकम दैऔ कि तिउंरी च़ोउकीदारी कौरा। 24 ज़ेलरै हुकम मानियौ सै ज़ेला रै भितलै कौमरै दी निऐं और तिंउरै बांगणै काठा दी शांगल़ी दी बानै। पौलुस और सिलासा री कैदा कु छ़ुटकारौ 25 आधी राचीऐ पौलुस और सिलास प्राथना कौरदै और परमेश्वरा रै भजन गाइंदै थै लागै औन्दै, ओर कैदी थै लागै औन्दै तिउंरी शुणदै। 26 तेबी एकदम एक बौड़ौ भूइंच़ल़ आशौ और ज़ेला री पौई हिली गोई। तेबी ज़ेला रै सारै दार खुली गौऐ, और कैदीऊ री बेड़ी (शांगल़ी) भी खुली गोई। 27 ज़ेलर उठौ, और ज़ेला रै सारै दार खुलै देखीयौ सुंच़ौ कि सारै कैदी भागी गौऐ, ता तिणीऐ आपणी तलवार झ़ीड़ी और आपु दी लाइयौ मौरणौ च़ाहा थौ। 28 पर पौलुसै ज़ोरै हाका देइयौ बोलौ, “(नाईं डौर) आपणौ नुकसान नाईं कर कैलैकि आमै सारै इदै ई।” 29 तैबै ज़ेलरै दिवौ औणाऔ और भितरै डैऔ, तैबै कांबी-कांबीयौ पौलुस और सिलासा रै बांगणै माथै पौड़ौ। 30 और तिऊं बाइरै नीईंयौ तिउंलै बोलौ, “ओ महान गुरुओ, छ़ुटकारै पाइणा लै हाऊं का कौरुलै?” 31 तिंउऐ बोलौ, “प्रभु यीशु मसीह माथै विश्वास कर तैबै तू और तैरौ घौर छ़ुटकारौ पा ई।” 32 तैबै पौलुस और सिलासै तेसकै और तेसरै टौबरा कै प्रभु रौ वचन शुणाऔ। 33 राची तेबी ई ज़ेलरै सै तिदरु निऐं तिंउरै ज़खम धोऐ, तिणीऐ आपणै पुरै टौबरा आइलै तेबी ई बपतिस्मौ निऔं। 34 और ज़ेलरै सै आपणै घौरै निऐं, तिउंलै रोटी देई, तैबै सारै टौबरुऐ परमेश्वरा माथै विश्वास कौरीयौ खुशी मौनाई। 35 आगली दोउती आफसरुऐ ज़ेलरै कै चिट्ठी भेज़ी कि तिऊं आदमी ज़ेला कु ओरु छ़ाड़ौ। 36 सिपाइऐ इऐ बुशै पौलुसा कै बोली, कि “आफसरै तुमु ज़ेला कु छ़ाड़णै रौ हुकम देई गौ आ। एथीलै आबै निकल़ियौ शान्ति कौरीऐ डैऔ।” 37 पर पौलुसै बोलौ, “तिऊं आदमीउऐ आमै बिण गौलती रै लोगु मांझ़िऐ पिटे ई और ज़ेला दी पाऐ ई हालांकी आमै रोमी ई। आबै का आमु इदरु च़ुटुकच़ार गाड़ाई? इणौ नाईं पर आबै सै आपु आशीयौ आमु इदरु बाइरै निआं लै।” 38 सिपाइउऐ इऐ बुशै आफसरु काऐ बोली, और सै इणौ शुणियौ कि पौलुस और सिलास रोमी ई ता सै भौरी डौरै, 39 और आशीयौ तिऊंकु माफी मांगी, और बाइरै नीईंयौ तिऊंकु औरज़ कौरी कि एस इलाकै कु पोरु डैऔ। 40 तैबै पौलुस और सिलास ज़ेला कु निकल़ियौ लुदिया रै घौरै डेवै, और विश्वासी भाईऊ कु मिलियौ तिउंकै शान्ति मिली, और सै तिदरु डेवै। |
This work is licensed under Creative Commons Attribution-ShareAlike 4.0 License.