प्रेरित 15 - पहाड़ी महासुई

यरुशलेमा री आराधनालय

¹ तैबै कुछ़ विश्वासी लोग यहुदिया कु अन्ताकिया इलाकै दी आशीयौ भाईऊ कै शिखाउंदै लागै “कि अगर मुसा रै रिवाज़ा ज़िणौ तुमारौ खतनौ नाईं औलौ ता तुमुलै छ़ुटकारौ नाईं मिलदी।”

² एज़ी बुशा माथै पौलुस और बरनबासा रौ तिऊं आइलै भौरी झ़ौगड़ौ और बैहंसबाज़ी हुई, तैबै तिंउऐ इणौ फैसलौ कियौ कि आमु मांझ़िया कु कुछ़ मुख्यै लोग यरुशलेमा रै प्रेरित स्याणेऊ काऐ डेवा।

³ तैबै कलिसिया रै लोगुऐ सै आधी बाटा झ़ांऊ छ़ाड़ै। तिदरु सै फिनके और सामरीया परदेशा बाटीऐ दुजी ज़ाती रै लोगु कै मन बौदुल़णै रै बारै दी खुश खौबरी शुणाई-शुणाइयौ डेवै, सारै विश्वासी भौरी खुश हुऐ।

⁴ ज़ैबै सै यरुशलेमा दी पौउंच़ै ता तिदलै सारी कलिसिया, च़ेलै और कलिसिया रै मुख्यै लोग तिऊंकु खुशी कौरी मिलै, पौलुस और बरनाबासै तिउंकै बोलौ कि परमेश्‍वरै तिऊं आइलै केती बौड़ै-बौड़ै काम किऐ ई।

⁵ पर फरीसीउ रै गुटा मांझ़िया कु ज़ुणिऐ विश्वास कियौ थौ, तिऊं मांझ़िऐ कु कुछ़ लोगुऐ उठीयौ बोलौ, “दुजी ज़ाती रै लोगु कै खतना कौरणै री और मुसा रै नियम मानणै रौ हुकम दैणौ च़ांई।”

⁶ एज़ी बुशा माथै विच़ार कौरना लै प्रेरित और स्याणै लोग कौट्ठै हुऐ।

⁷ तैबै भौरी बुशु बासिऐ पतरसै खौड़ै हुइयौ तिउंलै बोलौ, “ओ भाईओ तुमै ज़ाणाई कि भौरी बौगत पैहलै ओउलै परमेश्‍वरै हाऊं चुनो ऊ, ताकी दुजी ज़ाती रै लोग मुकु परमेश्‍वरा री खौबर शुणियौ विश्वास कौरा।

⁸ ज़िऊ पौरखणै वाल़ै परमेश्‍वरै तिउंकै भी आमु ज़िणी पवित्र आत्मा देइयौ इणौ देखाऔ कि परमेश्‍वरै तिउंकै आपणै लोगु ज़िणै अपणाई गौऐ।

⁹ और विश्वासा री वज़ाह कु तिंउरै ज़िऊ शुद्ध कौरीयौ आमु और तिऊंदी कोई भी फर्क नाईं छ़ाड़ौ।

¹⁰ आबै तुमै कैलै पौरखा ई परमेश्‍वर, कि च़ेलेऊ रै औट्ठै माथै एती भार छ़ाड़ौ, ज़ास ना आमारै नान-बुड़ै च़ुंगी सौका थै, और ना आमै च़ुंगी सौकदै?

¹¹ बल्कि आमारौ ता इणौ विश्वास आ कि ज़िणौ, प्रभु यीशु री बौड़ी दया कौरीऐ आमारौ छ़ुटकारौ हुआ आ, तिणी तिऊंरौ भी छ़ुटकारौ हुआ आ। मुसा रै नियमा कौरी नाईं।”

¹² तैबै सारी खुंबल़ी रै लोग च़ुटुकच़ार पौलुस और बरनबासा री शुणदै लागै, कि परमेश्‍वरै दुजी ज़ातीऊ मांझ़िऐ तिंउरै ज़ौरिऐ किणै बौड़ै-बौड़ै और नोखै-नोखै काम किऐ ई।

¹³ ज़ैबै सै च़ुटुक थाकै ता याकुबै बोलौ, “ओ भाईओ मेरी शुणौ।

¹⁴ शमौन पतरसै सौमझ़ाऐ, कि सारेऊ कु पैहलै परमेश्‍वरै दुजी ज़ाती रै लोगु माथै किणी दया की आ कि तिऊं मांझ़िया कु कई लोग आपु कालै चुने ई।”

¹⁵ इऐ बुशै तिणी सी, ज़िणौ भौरी पैहलै भविष्यवक्ता री किताबी दी आ लिखौ औन्दौ,

¹⁶ “एथ बासिऐ हाऊं तौंइऐ आशीयौ दाऊदा रौ डेरौ ज़ो तेसरै दुष्मनुऐ खातम कौरी गौ थौ, तेस दुबारौ चाणाऊ,

¹⁷ एथीलै ताकी बौच़ै औन्दै सारै लोग मतलब दुजी ज़ाती रै लोग ज़ो मैरै ई सै प्रभु लोड़ा,

¹⁸ एऊ सेज़ौ प्रभु बोला आ ज़ुण धौतरी रै पैहला कु इऊं बुशु री खुशी री खौबर पौउंच़ावा आ।”

¹⁹ एथीलै मैरौ विच़ार इणौ आ कि दुजी ज़ाती मांझ़िया कु ज़ुण लोग परमेश्‍वरा भिलै मुड़ा ई, आमुऐ सै यहुदी नियम और रीती-रिवाज़ मानणा लै मज़बूर नाईं च़ांई कौरणै।

²⁰ बल्कि तिऊं लै इणौ च़ांई लिखीयौ भेज़णौ कि, सै मूर्ती लै च़ड़ाऔ औन्दौ खाणौ नाईं खा, और गान्दै काम ना कौरा, ना गौल़ै कौरी फैंच़ै औन्दै पशु रौ मांस और ना पौल़ाच़ खा।

²¹ कैलैकि पुराणै बौगता कु मुसा रै नियमा रौ परचार कौरणै वाल़ै भौरी इलाकै दी हुआ थै। और हर आरामा वाल़ै दिना दी आराधनालय दी भी परचार हुआ थौ।

दुजी ज़ाती रै विश्वासिऊ लै चिट्ठी

²² एज़ी बूश यरुशलेम शहरा री सारी कलिसिया रै लोगु कै, च़ेलेऊ और स्याणेऊ कै आच़्छ़ी लागी कि आपु मांझ़िया कु कुछ़ लोगु छ़ांटा, तिंउऐ यहुदा ज़ासलै बरसब्बा बोला थै, और सिलास ज़ुण भाईऊ मांझ़िऐ सारेऊ कु इज़्ज़तमान थौ, छ़ांटै और पौलुस, बरनबासा आइलै अन्ताकिया री कलिसिया लै भेज़ै।

²³ तिंउऐ तिउंकै लिखीयौ एक चिट्ठी भेज़ी ज़ेथदी इणौ थौ लिखौ औन्दौ कि। “अन्ताकिया, सीरिया और किलकिया दी रौइणै वाल़ै भाईऊ लै ज़ुण दुजी ज़ाती कु ई, प्रेरित और स्याणेऊ रौ तुमुलै ढाल।

²⁴ आमुऐ शुणौ कि आमु मांझ़िया कु कुछ़ लोगुऐ तुमु काऐ आशीयौ, तुमै आपणी बुशु कौरी डौराई गौऐ। और तुमारै ज़िऊ विश्वासा दी कमज़ोर हुई गौऐ, पर आमुऐ तिउंलै हुकम नाईं दैऔ थौ।”

²⁵ एथीलै आमुऐ एक मन हुइयौ ठीक सौमझ़ौ कि आपणै चुनै औन्दै आदमी प्यारै पौलुस और बरनबासा आइलै तुमु काऐ भेज़ु।

²⁶ इऐ इणै आदमी ई ज़ुणिऐ आपणी ज़ान प्रभु यीशु मसीह री ताइंऐ मुश्कल़ा दी पाई आ।

²⁷ एथीलै आमुऐ यहुदा और सिलास तुमु काऐ भेज़ै ई, ज़ुण आपु ई तुमु काऐ इऊं बुशु शुणावा ई।

²⁸ पवित्र आत्मा और आमुकै एज़ी बूश ठीक लागी कि, ज़ुरुरी बुशा रै अलावा ओर कोई बुशा रौ भार तुमु माथै ना पाऊ।

²⁹ कि तुमै मूर्ती लै भैंट च़ड़ाऔ औन्दौ खाणौ नाईं खाएऊ, और गान्दै काम ना कौरेऊ, ना गौल़ै कौरी फैंच़ै औन्दै पशु रौ मांस और ना पौल़ाच़ खाएऊ। इऊं च़िज़ा कु दूर रौआ लै ता तुमारौ भौलौ हुआ आ। आच़्छ़ा तैबै।

³⁰ तैबै सै तिदरु डेइयौ अन्ताकिया इलाकै दी पौउंच़ै, और खुंबल़ी कौट्ठै कौरीयौ सै चिट्ठी तिउंकै देई।

³¹ सै तिऐं चिट्ठी पौड़ीयौ तिऐं शिक्षा री बुशै कु भौरी खुश हुऐ।

³² यहुदै और सिलासै भी ज़ो आपु भविष्यवक्ता थै, भौरी बुशु कौरीऐ विश्वासी भाईऊ लै शिक्षा देइयौ तिऊंरौ ज़िऊ मज़बूत कियौ।

³³ सै कुछ़ दिना झ़ांऊ तिऐ रौइयौ, विश्वासी भाईऊ कु शान्ति री आशीषा कौरीऐ तिदरु आपणी ज़ागाह लै डेवै ज़िदरु सै भेज़ै औन्दै थै।

³⁴ पर सिलासा कै तिऐ रौउणौ आच़्छ़ौ लागौ

³⁵ पर पौलुस और बरनबास रौऐ अन्ताकिया दी, और ओरी भौरी लोगु आइलै प्रभु यीशु रै वचना री शिक्षा दैंदै और खुश खौबरी शुणाउंदै थाकै लागी।

पौलुसा रौ दुजी बारै परचारा दी डेउणौ, पौलुस और बरनबासा री आपु मांझ़िऐ अणबण

³⁶ कुछ़ दिना बासिऐ पौलुसै बरनबासा लै बोलौ, “ज़ेज़ै-ज़ेज़ै इलाकै आमुऐ प्रभु यीशु रौ वचन शुणाऔ थौ, च़ाल, तौंइऐ तिऊं काऐ डेइयौ तिऊं देखुलै कि विश्वासी भाई किणे ई?”

³⁷ तैबै बरनबासै यहुन्ना ज़ासलै मरकुस भी बोलाई आपु आइलै निणै रै बारै दी सुंच़ौ।

³⁸ पर पौलुसै सेऊ साथा दी निणौ ठीक नाईं सौमझ़ौ, कैलैकि मरकुस पंफूलिया इलाकै दी तिऊंकु अलग हुई गौ थौ, और कामा दी तिऊं आइलै नाईं डैऔ।

³⁹ और लोग इणौ लागै बोलदै कि इऐ दुई गौऐ अलग हुई। और बरनबासै मरकुस नींई औ किश्ती दी साइप्रस टापु लै डैऔ।

⁴⁰ और पौलुसै च़ुनौ सिलास आपु आइलै, विश्वासी भाईउऐ सेऊ प्रभु री बौड़ी दया दी सौंभाल़ौ तैबै सै अन्ताकिया लै डेई गौऐ।

⁴¹ और सै कलिसिया रै लोगु विश्वासा दी मज़बूत कौरीयौ सीरिया और किलकिया बाटीऐ डेवै।