प्रेरित 11 - पहाड़ी महासुईपतरसा रौ आपणै कामा रै बारै दी साफ बोलणौ 1 तैबै विश्वासी भाईउऐ और च़ेलेउऐ शुणौ ज़ुण यहुदिया परदेशा दी थै, कि दुजी ज़ाती रै लोगुऐ भी परमेश्वरा रौ वचन मानी गौ आ। 2 और पतरस ज़ेबी यरुशलेमा दी आशौ, ता यहुदी विश्वासी लोग तेसकु सवाल-ज़वाब कौरदै लागै, 3 कि “ताऐं दुजी ज़ाती रै लोगु आइलै ज़ुण बिणा खतना किऐ औन्दै ई कैलै खाऔ-पिऔ?” 4 तैबै पतरसै तिउंकै सारी बुशै ज़ो कुरनिलियुसा रै घौरा दी हुई थी शुरु कु शुणाई 5 कि हाऊं याफा इलाकै दी प्राथना कौरदै थौ लागौ औन्दौ, और मुंइऐ एक दर्शण देखौ कि सौरग खुली गौ। और एक बौड़ी च़ादर च़ारिया कुणै कु लटकाइयौ तौल़ै आशदै लागी ऐन्दी। 6 ज़ैबै मुंइऐ देखौ ता तिऐं च़ादरी दी सारै जानवर और किड़ै-मकौड़ै, और च़िड़ु-च़िटकोरु थै। 7 और मुंइऐ एक हाक भी शुणी, “ओ पतरस उठ, झ़ांग और खा।” 8 मुंइऐ बोलौ, “नाईं प्रभु, नाईं। कैलैकि कोई भी अशुद्ध और गान्दी च़ीज़ इबी झ़ांऊ नाईं खाई।” 9 दुजी बारै सौरगा कु हाक शुणुई कि, “ज़ो कुछ़ परमेश्वरै शुद्ध कौरी गौ आ तेसलै तू अशुद्ध नाईं बोल।” 10 चिआ बारै इणौ हुऔ। तैबै सै च़ादर तिदरु तेबी सौरगा भिलै वापिस डेई। 11 और देखौ, चीन आदमी तेबी मुकाऐ आशै ज़ो कैसरिया इलाकै कुरनेलियुसै मुकाऐ थै भेज़ै औन्दै। 12 तैबै पवित्र आत्मै मुलै तिऊं आइलै निडर हुइयौ डेउणा लै बोलौ, और सै छ़ौ भाई भी मुं आइलै च़ाल पौड़ै। और आमै तेस आदमी रै काऐ डेवे। 13 तिणीऐ आमुलै बोलौ, “कि एक दूत मुकाऐ आशौ और तिणीऐ मुलै बोलौ, कि याफा लै आपणै आदमी भेज़ीयौ शमौन ज़ासलै पतरस बोलाई तेस इदै आपणै घौरै औटाऊ। 14 सेऊ ताउंकै इणी बुशै बोला आ, ज़ेथ कौरी तू और तैरौ सारौ घौर छ़ुटकारौ पा आ।” 15 ज़ेबी हाऊं तिऊं आइलै बुशै लाइंदै लागौ, ता पवित्र आत्मा तिऊं माथै इणौ आशौ ज़िणौ शुरु दी आमु माथै आशौ आ। 16 तैबै मुकै परमेश्वरा री एज़ी बूश याद आशी। ज़ो तिणीऐ बोली थी, कि, “यहुन्नै ता पाणी रौ बपतिस्मौ दैऔ पर तुमुलै पवित्र आत्मा रौ बपतिस्मौ मिला आ।” 17 “एथीलै ज़ैबै परमेश्वरै तिउंलै भी सेज़ौ दाण दैऔ आ ज़ो आमुकै प्रभु यीशु मसीह माथै विश्वास कौरीयौ मिलौ थौ। ता हाऊं कुण थौ ज़ुण परमेश्वर रोकी सौका थौ?” 18 इणौ शुणियौ यहुदी विश्वासी च़ुटुक थाकै, और परमेश्वरा री बौड़ाई कौरदै लागै, “तैबै ता परमेश्वर दुजी ज़ातीऊ लै भी सौदा री ज़िन्दगी दिया ज़ैबै सै पापा री माफी मांगियौ यीशु माथै विश्वास कौरालै।” अन्ताकिया री कलिसिया 19 भौरी लोग तेस सताव री वज़ाह कु ज़ो स्तिफनुसा री वज़ाह कु पौड़ै थै, वारै-पारै बिखरी गौऐ थै, सै परचार कौरदै-कौरदै फिनिकै परदेश, साइप्रस टापु और अन्ताकिया रै इलाकै दी पौउंच़ै। पर सै यहुदी लोगु रै अलावा ओरी कासी कै परमेश्वरा रै वचन नाईं शुणावा थै। 20 पर तिऊं मांझ़िऐ कुछ़ विश्वासी साइप्रस टापु और कुछ़ कुरेनी रै रौइणै वाल़ै थै, ज़ुण अन्ताकिया दी आशीयौ दुजी ज़ातीऊ कै भी प्रभु रौ वचना शुणाउंदै लागै। 21 प्रभु री शक्ति तिऊं माथै थी, भौरी दुजी ज़ाती रै लोग विश्वास कौरीयौ प्रभु भिलै मुड़ै। 22 ज़ैबै तिंउरै बारै दी यरुशलेमा शैहरा री कलिसिया दी पौतौ लागौ, ता तिंउऐ बरनबास अन्ताकिया इलाकै लै भेज़ौ। 23 बरनबास तिऐ पौउंच़िऔ, और परमेश्वरा री बौड़ी दया देखीयौ खुश हुऔ, और तिंउरै विश्वास बौड़ाउणा लै बोलौ, “कि तना-मौना कौरी प्रभु कु च़िपकै रौऔ।” 24 बरनबास एक भौलौ आदमी थौ, सेऊ पवित्र आत्मा और विश्वासा कौरी भरपूर थौ। ओर भौरी लोगुऐ प्रभु यीशु माथै विश्वास कियौ। 25 तैबै बरनबासै अन्ताकिया इलाकै छ़ाड़ियौ शाऊला लोड़दै तरसुसा गांवा लै च़ाल पौड़ौ। 26 ज़ैबै सेऊ तेसकु मिलौ ता तिणीऐ सेऊ आपु आइलै अन्ताकिया इलाकै लै आणौ। तैबै पौलुस ओर बरनाबास एकी साला झ़ांऊ कलिसिया रै लोगु आइलै मिलदै और भौरी लोगु कै प्रभु यीशु री खुश-खौबरी शुणाउंदै थाकै लागी। और च़ेलै सौभी कु पैहलै अन्ताकिया इलाकै दी “मसीह” बौणै। 27 सेज़ै बौगतै कुछ़ विश्वासी ज़ुण भविष्यवक्ता थै यरुशलेम शहरा कु अन्ताकिया इलाकै दी आशै। 28 तिऊं मांझ़िया कु अगबुस नावां एकी भविष्यवक्तै खौड़ी हुइयौ पवित्र आत्मा रै ज़ौरिऐ बोलौ, “कि सारी धौतरी दी काल़ पौड़ा। और सेऊ काल़ क्लौदियुस राज़ै रै बौगता दी पौड़ौ। 29 तैबै च़ेलेउऐ फैसलौ कियौ कि आमै आपणी-आपणी कौमाई कु कुछ़ पैसै कौठै कौरीयौ यहुदिया परदेशा दी रौइणै वाल़ै विश्वासी भाईऊ लै कुछ़ मज़द भेज़ु लै। 30 तिंउऐ तिणी कियौ। बरनबास और शाऊला रै हाथा दी यहुदी स्याणेऊ लै कुछ़ पैसै भेज़ै।” |
This work is licensed under Creative Commons Attribution-ShareAlike 4.0 License.