2 तीमु 4 - पहाड़ी महासुई1 ज़ेबी प्रभु यीशु मसीह राज़ै ज़िणै राज़ कौरदै आशा लौ, ता सेऊ ज़िउंदै और मौरै औन्देऊ दुइया रौ फैसलौ कौरा सा। हाऊं परमेश्वरा आइलै और मसीह गवाह मानियौ तुमु कु औरज़ कौराऊ, 2 कि तू परमेश्वरा रै वचना रौ परचार कर। बौगतै और बेबौग्तै त्यार रौऊ। तुमुऐ लोगु कै बोलणौ च़ांई कि तिंउऐ का गलत कियौ आ, और तिऊं तिउंरै पापा लै धौमकाऊ। पर तुमै तिउंलै हिम्मत भी दैऔ ज़िणौ तुमै तिऊं सबरा कौरी शिखावा ई। 3 कैलैकि इणौ बौगत आशा सा, कि लोग खौरी शिक्षा सहन नाईं कौरी सौकदै पर ज़ो तिउंकै शुणनौ आच़्छ़ौ लागा सा तेथी रै मुताबिक सै आपुलै भौरी का शिक्षा दैणै वाल़ेऊ कौट्ठै कौरा ई। 4 और सै आपणै कौन्थु सौच़्च़ाई भिला कु बौदल़ियौ बणाउटी और बुज़ुर्गा री कथा-काअणिऊ माथै ला ई। 5 पर तू सारी बुशु दी खौबरदार रौऊ, दु:ख उठाऊ खुश-खौबरी शुणाउणै रौ काम कर, और आपणी सेवकाई पुरी कर। 6 हाऊं तुमुलै एस हुकम एथीलै दियाऊ कि मेरी ज़िन्दगी और मैरौ परमेश्वरा लै काम खातम आ औणै वाल़ौ, कैलैकि हाऊं ज़ाणाऊ कि हाऊं शिगरी मौरा ऊ। 7 मुंइऐ मसीह री सेवा कौरना लै भौरी मैहनत की आ, और आपणी दौड़ पुरी कौरी एरी आ, और हाऊं आखरी झ़ाऊं विश्वासा दी पाक्कौ रौ ऊ 8 प्रभु मुलै एक ताज़ दिया आ ज़ो धार्मिकता रौ ताज़ आ। सेऊ सौच़्च़ौ फैसलौ कौरणै वाल़ौ आपणै वापिस आशणै वाल़ै दिना दी मुलै तेस इनाम दिया सा। सेऊ मुकै नाईं पर तिऊं सौभीऊ कै भी ज़ो तेसरै वापिस आशणै री इन्तज़ारी दी ई। नज़दीक 9 मुकाऐ शिगरी आशणै री कोशिश कर। 10 कैलैकि देमासै इऐं धौतरी री च़िज़ेऊ प्यारी ज़ाणियौ हाऊं छ़ाड़ी ऐरौ ऊ, और थिस्सलुनीका रै इलाकै लै डैऔ आ और क्रेसकेंस गलातिया परदेशा लै और तितुस दलमतिया परदेशा लै डैऔ आ। 11 लुका मुं आइलै आ, तू आशदी बारै मरकुस आपु आइलै ओरु आणै, कैलैकि सेऊ सेवा लै मैरै भौरी कामा रौ आ। 12 तुखिकुस मुंइऐ इफिसुसा इलाकै लै भेज़ौ आ। 13 ज़ेज़ौ कोट मुंइऐ त्रोआसा इलाकै दी करपुसा रै घौरा कै आ छ़ाड़ौ औन्दौ, तेस और किताबी खास कौरीयौ च़ामड़ै रै लिखै औन्दै कागज़ भी आपुकै आणै ज़ेबी तू आशा लौ। 14 सिकन्दर ठठेरै मुं आइलै भौरी बुराई की आ, प्रभु तेसरै बुरै कामा रै मुताबिक तेसलै बौदल़ौ दिया सा 15 तू भी तेसकु बौच़ियौ रौऐ, कैलैकि तिणीऐ आमारै मसीह री शिक्षा रौ भौरी बिरोध कियौ आ। 16 मैरै पैहलै सुनवाई रै बौगतै कोइऐ भी मैरौ साथ नाईं दैऔ, पर सारेऊ ऐ हाऊं छ़ाड़ी ऐरौ थौ, भौलौ च़ांई हुऔ कि एथरौ तिऊं लेखौ ना दैणै पौड़ा। 17 पर प्रभु मुं आइलै साथा दी रौ आ, और मुलै तागत देई आ, ताकी मैरै ज़ौरिऐ पुरौ-पुरौ परचार हुआ, और सारी दुजी ज़ाती शुणाली, और तिणीऐ हाऊं मौउता कु बौच़ाओ ऊ। 18 और प्रभु मुं हर एक बुरै कामा कु छ़ुड़ावा सा, और आपणै सौरगा रै राज़्य दी मुं सही-सलामत पहुंच़ावा सा, और तेसरी महिमा जुगै जुगै च़ांई औन्दै थाकी लागी। आमीन। आखरी ढाल 19 प्रिसका और तियांरै बोउटै अक्विला लै, और उनेसिफुरूसा रै टौबरा लै मेरी तौरफा कु ढाल। 20 इरास्तुस कुरिन्थुस शैहरा दी रौई गौ आ, और त्रुफिमुस मुंइऐ मिलेतुस इलाकै दी छ़ाड़ौ औन्दौ, कैलैकि सेऊ बिमार आ। 21 शेल़ा पौड़णै कु पैहलै आशणा री कोशिश कर, यूबूलुसौर पूदेंस, और लीनुस और क्लौदिया, और सारेऊ साथी विश्वासी भाईऊ री ताउंलै ढाल। 22 हाऊं प्राथना कौराऊ कि प्रभु ताऊं आइलै रौआ, और तेसरी बौड़ी दया भी ताऊं माथै औन्दै थाका लागी। |
This work is licensed under Creative Commons Attribution-ShareAlike 4.0 License.