2 तीमु 3 - पहाड़ी महासुईआखरी दीनु रै बुरै काम 1 तीमुथियुस ज़ो बूश आबै हाऊं ताउंलै बोलु लौ, तिऊं ध्याना कौरी शुण, कि आखरी दीनु दी आमु माथै यीशु मसीह रै वापिस आशणै कु पैहलै भौरी बुरौ बौगत आशणौ आ। 2 कैलैकि लोग मतलबी, धन-ज़यदादा रै लोभी, शेखी मारनै वाल़ै, घमण्डी, बुराई कौरणै वाल़ै, मां-बाबा रौ बोलणौ ना शुणनै वाल़ै, धन्यबाद ना कौरणै वाल़ै, और अपवित्र, 3 दया ना कौरणै वाल़ै, माफ ना कौरणै वाल़ै, आरोप लाइणै वाल़ै, आपु माथै काबु ना कौरणै वाल़ै, काठै, भौलै कौरणै वाल़ेऊ रै दुश्मन, 4 धोखै दैणै वाल़ै, ढीठ, घमण्डी, और परमेश्वरा कु प्यार कौरणै वाल़ै नाईं, पर दुनिया री च़िज़ु कु प्यार कौरणै वाल़ै हुआई। 5 इऐ इणै कौरी इणौ देखाउणै च़ाहा ई कि सै परमेश्वरा री भौक्ती कौरा ई, पर सै परमेश्वरा री शक्ति नाईं मानदै। इणै लोगु आइलै मेल-मिलाप नाईं छ़ाड़ौ। 6 कैलैकि इऊं मांझ़िया कु कुछ़ लोग इणै भी ई ज़ुण लोगु रै घौरा दी चोरुइयौ डियाई और बेअकली छ़ेउड़ीऊ बौशा दी कौरा ई। ज़ासरै ज़िऊ पापा थाल ई दाबुऐ औन्दै और सारै रौंगा री इच़्छ़ा रै बौशा दी ई। 7 और इऐ छ़ेउड़ी सौदा नौईं बुशै शिखाई पर मसीह री सौच़्च़ाई केबी नाईं शिखदी। 8 इऐ झ़ूठ शिखाउणै वाल़ै, मसीह री सौच़्च़ाई रौ बिरोध कौरा ई ज़िणौ यन्नेसै और यम्ब्रेसै मुसा रौ बिरोध कियौ थौ इऐ लोग बेअकलै हुई गौऐ और सौच़्च़ी मसीह माथै विश्वासा नाईं कौरदै। 9 पर तिउंरी मुर्खता तिऊं ज़ादै बौगता झ़ाऊं नाईं बौच़ाई सौकदी, कैलैकि ज़िणौ यन्नेस और यम्ब्रेस रै बारै दी सारै ज़ाणा थै कि सै मुर्ख थै, तिणी इऊं रै बारै दी भी लोगु कै पौतौ लागा की इऐ मुर्ख ई। तीमुथियुसा लै ज़ुरुरी सलाह 10 पर तीमुथियुस ताइंऐ मेरी शिक्षा, च़ाल-च़लण, मकसद, विश्वास, सहनशक्ति, प्यार, सबर, और ज़ुलम औणै रै बौगता दी मैरौ साथ दैऔ। 11 और तुमै ज़ाणाई कि अन्ताकिया, इकुनियुम और लुस्त्रा शैहरा दी मुं माथै लोगुऐ केती ज़ुलम कौरै ई और किणै-किणै ज़ुलम मुंइऐ तिऐ सौहै। पर प्रभुऐ हाऊं इऊं सौभी कु छ़ुड़ाई ऐरौ ऊ। 12 इऐ बूश सौच़्च़ी आ कि ज़ुण यीशु मसीह दी सौच़्च़ाई री ज़िन्दगी ज़िउणै रौ फैसलौ कौरा ई तिऊं सारेऊ माथै ज़ुलम औणै ई। 13 पर दुष्ट, और धोखै दैणै वाल़ै लोगुऐ औज़ौ भी ज़ादै बुरै काम कौरणै ई। सै दुजेऊ लै धोखौ दियाई और तिऊं आपुलै भी ओरीऊ कु धोखै मिलणै ई। 14 पर तीमुथियुस इऊं बुशु माथै ज़ो ताइंऐ शिखी ई, और ज़ेथ माथै ताइंऐ विश्वास कियौ आ तू लगातार विश्वासा कौरी मानदै थाक लागी, कैलैकि तू ज़ाणाई कि इऐ सौच़्च़ाई ताउंकै कुणिऐ शिखाई आ 15 और तू लोल़डी ओउलै पवित्रशास्त्र ज़ाणाई। इऐ ताउंकै तेस छ़ुटकारै रौ ज्ञान देई सौका आ ज़ो ताउंलै यीशु मसीह माथै विश्वास कौरणै रै ज़ौरिऐ मिला सा। 16 पवित्रशास्त्रा दी लिखी ऐन्दी हर बूश परमेश्वरा री तौरफा कु आ, इऐ शिक्षा दैणै दी, सौमझ़ाउणै दी, और सुधारणै दी, और धार्मिकता री शिक्षा दी आमारी मज़द कौरा सा, 17 ताकी परमेश्वरा रौ ज़ौणौ हर एक आच़्छ़ै काम कौरना लै त्यार हुआ। |
This work is licensed under Creative Commons Attribution-ShareAlike 4.0 License.