2 तीमु 2 - पहाड़ी महासुईमसीह यीशु रौ स्वामी भौगत सैनिक 1 एथीलै ओ मैरै छ़ोहरु तीमुथिय्युस तू तिऐं बौड़ी दया दी ज़ो यीशु मसीह दिया सा मज़बूत औऊ 2 और तांइऐ यीशु मसीह रै बारै दी ज़ो शिक्षा भौरी लोगु रै सामनै शुणी आ। ता आबै हाऊं इणौ च़ाहा ऊ कि सेज़ी शिक्षा तिऊं कै भी शिखाऊ ज़ास माथै तू भरोसौ छ़ाड़ाई, ताकी सै विश्वासी भी तिऊं शिक्षा ओरी लोगु कै शिखाउणै वाल़ै बौणा। 3 यीशु मसीह रै आच़्छ़ै सिपाई ज़िणौ मुं आइलै दुःख उठाऊ। 4 एक सिपाई आपणै कामा छ़ाड़ियौ कोई दुजौ काम नाईं कौरदौ, कैलैकि सेऊ आपणै बौड़ै आफसरु खुश कौरणौ च़ाहा सा, और सेऊ आपु दुनिया रै कामा दी नाईं फौसदौ। 5 ज़ेबी अखाड़ै दी लौड़णै वाल़ौ पहलवान भी अगर विधी रै मुताबिक नाईं लौड़ालौ ता तेसलै इनाम नाईं मिलदौ। 6 ज़ो ज़ीमीदार मैहनत कौरा सा फौसली रै पैहलै हिस्सै माथै तेसरौ हक्क औआ सा। 7 इऊं औनैणेऊ रै बारै दी सुंच़ौ कि इऐ का शिखावा ई, और प्रभु इऊं सौमझ़णै दी तुमारी मज़द कौरा सा। 8 यीशु मसीह लगातार याद कौरौ, ज़ो राज़ै दाऊदा रै वंशा कु पैदौ हुऔ और परमेश्वरै सेऊ मौरै औन्दै मांझ़िआ कु ज़िउंदौ किऔ आ, और इऐ खुश-खौबरी आ ज़ो हाऊं लोगु कै शुणावा ऊ। 9 कैलैकि इऐं खुश-खौबरी शुणाउणै री वज़ाह कु हाऊं एक गुनैहगारा ज़िणै दु:ख साहा ऊ, इदरा झ़ाऊं कि ज़ेला दी भी बन्द ऊ। तैबै भी परमेश्वरा रै वचन फौइलणै कु कोई नाईं रोकी सौकदौ। 10 एज़ी वज़ाह सा कि हाऊं सेज़ै लोगु रै फाइदै लै दु:ख ऊ सौइंदै लागौ औन्दौ, ज़ो परमेश्वरै ई चुनै औन्दै ताकी सै भी प्रभु यीशु मसीह माथै विश्वास कौरा और छ़ुटकारौ और महिमा हासिल कौरा ज़ो सौदा लै आ। 11 इऐ बूश सौच़्च़ी आ कि अगर आमै मसीह आइलै मौरी भी गौऐ आ, ता तेस आइलै ज़िउंदै भी हुई आ। 12 अगर आमै सबरा कौरी तेसलै दु:ख सहन कौरुलै, ता तेस आइलै राज़ै ज़िणौ राज़ भी कौरी। अगर आमै बोली की आमै प्रभु नाईं ज़ाणदै ता प्रभु भी बोला कि हाऊं तुमु नाईं ज़ाणदौ, 13 इदरा झ़ाऊं कि अगर आमै मसीह लै बफादार नाईं औलै, तैबै भी सेऊ आमुलै बफादार रौआ सा, कैलैकि सेऊ सौदा आपणै स्वभाव रै मुताबिक काम कौरा सा। 14 ज़ो बुशै मुइंऐ तुमुकै बोली ई, तिऊं आपणै लोगु कै बिसुरणै नाईं दै। और प्रभु रै सामनै ज़ुण एक गवाह सा, ताऐं सै खौबरदार च़ांई कौरणै कि सै आखरु रै मतलबा रै बारै दी वाद-विवाद नाईं कौरा, ज़ेथ कौरी कुछ़ फाइदौ नाईं, पर शुणनै वाल़ै लोगु लै बौड़ौ नुकसान ई औआ सा। सौभी कु आच़्छ़ौ कारीगर 15 सौच़्च़ाई रै वचना रौ ठीक ढौंगा कौरी इस्तेमाल कौरीयौ परमेश्वरा रै अपणाउणै रै लायक सेवक बौणनै री पुरी कोशिश कौरौ, ज़ास शर्मिंदौ ना जा लौ हुणौ। 16 संसारिक और बेकारा री बुशेऊ कु दूर रौऔ, कैलैकि ज़ुण लोग इऊं बुशु दी शामिल औआ ई सै परमेश्वरा कु औज़ौ भी दूर औआ ई 17 और इणी बुशै शौड़ै औन्दै ज़खमा ज़िणै थाका ई फौइलदै लागी। और लोगु रै विश्वास चोड़ाई ज़ो तिउंरी शुणाई। हुमिनयुस और फिलेतुस तिऊं मांझ़िया कु ई। 18 तिंउऐ सौच़्च़ाई माथै विश्वास कौरणौ छ़ाड़ी गौ आ, सै इणौ बोलाई, कि परमेश्वरै मौरै औन्दै विश्वासी सौदा री ज़िन्दगी लै पैहला कु ज़िउंदै कौरी गौऐ। ज़ेथरौ नौतिज़ौ इणौ आ कि सै कुछ़ विश्वासिऊ मसीह री शिक्षा माथै हाण्डणा लै मौना कौरा ई। 19 तैबै भी परमेश्वरा रै लोगु रौ विश्वास पाकी पौई ज़िणी मज़बूत बौणी रौआ सा, और तिऐं पौई दी इणै आखर ई लिखै औन्दै, “प्रभु ज़ाणा सा कि तेसरै आपणै लोग कुण ई,” और इणौ भी “ज़ुण प्रभु री आराधना कौरा सा तिणीऐ बुरै काम कौरणै पोरु च़ांई छ़ाड़णै।” 20 बौड़ै घौरा दी ना सिरफ सुनै च़ाँदी रै ओखर बल्कि ज़ुखड़ै और माटै रै ओखर भी हुआई, केज़ै ओखर खास मकसदा लै, और केज़ै ओखर रोज़कै कामा लै इस्तेमाल औआ ई। 21 तिणी ई अगर कुण विश्वासी आपु इऊं बुरी च़िज़ु कु अलग कौरालौ, ता सेऊ तेस ओखरा ज़िणौ औआ सा ज़ास खास कामा लै इस्तेमाल कौरा ई, अगर तेसरी ज़िन्दगी पवित्र औली ता तेसरौ मालिक तेस आच़्छ़ै काम लै इस्तेमाल कौरा आ। 22 तिऊं बुरी च़िज़ा कु आपु दूर रौऊ ज़ास ज़वान लोग कौरणै च़ाहा ई, ज़ेज़ै लोग सौच़्च़ै ज़िवा कौरी प्रभु री आराधना कौरा ई, तिऊं आइलै सौच़्च़ाई, और विश्वास, और प्यारा कौरी, मेल-मिलाप चाणीऔ छ़ाड़। 23 पर बेअकली, और फालतु री बुशा कु दूर रौऊ, कैलैकि तू ज़ाणाई कि इणी बुशा कु झ़ौगड़ै पैदै औआ ई। 24 प्रभु रै सै सेवक झ़ौगड़ै कौरणै वाल़ै नाईं च़ांई हुणै, पर सेऊ सौभीऊ आइलै कौंउल़िऐ, और परमेश्वरा रै वचन आच़्छ़ै तरिकै कौरीऐ शिखाउणै वाल़ौ और सबर छ़ाड़णै वाल़ौ च़ांई हुणौ। 25 और ज़ुण तेसरौ बिरोध कौरा ई सै तिणीऐ बौड़ै प्यारा कौरी सौमझ़ाउणै च़ांई, हुई सौका कि शायद परमेश्वर तिउंकै सौच़्च़ाई ज़ाणनै और तेस भिलै फिरणै रौ मौकौ दिया। 26 और इऐ लोग दुजी बारै तौंइऐ आच़्छ़ै कौरी सुंच़णै लायक औआ और शैतान मानणै कु और तेसरी च़ालाकी कु ज़ो फाई ज़िणै ई पोरु छ़ुटा। |
This work is licensed under Creative Commons Attribution-ShareAlike 4.0 License.