2 थिस्स 3 - पहाड़ी महासुईआमुलै प्राथना कौरदै रौ 1 आखरी दी ओ मैरै प्यारै साथी विश्वासिउओ, आमुलै प्राथना कौरदै थाकौ लागी कि प्रभु रौ वचन इणौ शिगरी सारे दी फौइला और सारी ज़ागाह दी इज़्ज़ता आइलै अपणावा, ज़िणौ तुमु मांझ़िऐ हुऔ आ। 2 और इणी प्राथना कौरौ कि परमेश्वर आमु बुरै और कौपटी लोगु कु बौच़ावा कैलैकि भौरी लोग एथ माथै विश्वास नाईं कौरदै। 3 तुमै प्रभु माथै आच़्छ़ा कौरी विश्वास कौरी सौका ई। सेऊ तुमु मज़बुती कौरी टेकावा सा और तेस दुष्ट आदमी कु बौच़ाई छ़ाड़ा सा। 4 आमुऐ तुमुकै ज़ो कुछ़ कौरना लै बोलौ आ, तुमै तिणी ई कौरदै लागै औन्दै और कौरदै भी थाका ई लागी। 5 परमेश्वरा रै प्यार और मसीहा रै सबरा री भिलै प्रभु तुमारै मौना री अगुवाई कौरा। कामा कौरणै रौ हक्क 6 ओ मैरै प्यारै साथी विश्वासिउओ, आमै तुमुलै सेज़ै हक्का कौरीऐ हुकम देई ज़ो आमुकै प्रभु यीशु मसीहै दैऔ आ। कि तुमैं हर एक इणै भाई-बौइणी कु अलग रौऔ ज़ुण बुरी च़ाल-च़ाला ई और ज़ो शिक्षा तिणीऐ आमुकु शिखी आ तेथरै मुताबिक नाईं कौरदौ। 7 कैलैकि तुमै आपु ई ज़ाणाई कि किणी रीती कौरी आमु ज़िणी च़ाल-च़ालणी च़ांई, ज़िणी आमै भी तुमु आइलै आच़्छ़ी च़ाल च़ाली आ। 8 और कासी री भी रोटी मुफ्ती ऐ नाईं खाई। पर मैहनती और कौष्टा कौरी राच-दीन धान्धौ कौरा थै कि तुमु कासी भी माथै भार ना पौड़ा। 9 इणौ नाईं कि आमुकै हक्क नाईं, पर एथीलै कि आमै आपु तुमुलै एक आच़्छ़ौ आदमी बौणी कि तुमै आमु ज़िणी च़ाल च़ाला। 10 कैलैकि ज़ेबी आमै तुमारै काऐ थै, तेबी भी इणी हुकम तुमुलै देई थै कि अगर कुण काम कौरणौ नाईं च़ाहा लै ता सेऊ रोटी भी नाईं खा लौ। 11 आमै शुणी ई कि कुछ़ लोग तुमु मांझ़िऐ बुरी च़ाल च़ाला ई, और कुछ़ काम नाईं कौरदै, पर दुजेऊ रै कामा दी हाथ पा ई। 12 इणै लोगु लै आमै सेज़ै हक्का कौरी हुकम देई और सौमझ़ाई ज़ो आमुकै प्रभु यीशु मसीह दैऔ आ कि च़ुटुकच़ार कामा कौरीयौ आपणी मैहनता री रोटी खाआ लै। 13 तुमै ओ मैरै प्यारै साथी विश्वासिउओ, भौलाई कौरणै दी हिम्मत ना छ़ाड़ौ। 14 अगर कुण आमारी इऐं चिट्ठी री खौबर नाईं माना लौ, तेस माथै खास ध्यान छ़ाड़ौ, और तेस आइलै नाईं हाण्डौ, ताकी तेसरी बेइज़्ज़ती हुआ। 15 तैबै भी तेस आइलै आपणै दुश्मना ज़िणौ बरताव नाईं कौरौ, पर भाई ज़ाणियौ तेस सौमझ़ाऔ। आखरी ढाल 16 हाऊं प्राथना कौराऊ कि प्रभु ज़ो शान्ति रौ मूल़ आ आपु ई तुमुलै सौदा सारै रौंगा री शान्ति दिआ। प्रभु तुमु सौभी आइलै साथा दी रौआ। 17 मुंइऐ किणै बौड़ै-बौड़ै आखरु दी आपणै हाथा कौरी तुमुलै ढाल लिखौ आ। मेरी हर चिट्ठी री पैहच़ाण निशाण एऊ आ। मैरै लिखणै रौ इणौ तरिकौ आ। 18 हाऊं इणी प्राथना कौराऊ कि आमारै प्रभु यीशु मसीहा री बौड़ी दया तुमु सौभी माथै औन्दै थाका लागी। |
This work is licensed under Creative Commons Attribution-ShareAlike 4.0 License.