2 कुरि 9 - पहाड़ी महासुईसाथी-मसीहिऊ लै मज़द 1 आबै यरुशलेमा रै विश्वासिऊ लै दाण दैणै री सेवा रै बारै दी मुकै तुमुलै लिखणौ ज़ुरुरी नाईं। 2 कैलैकि हाऊं तुमारै ज़िवा री त्यारी ज़ाणाऊ, ज़ेथरी वज़ाह कु हाऊं तुमारै बारै दी मकिदुनीया परदेशा रै विश्वासिऊ रै सामनै घमण्ड देखाल़ा ऊ कि तुमै कुरिन्थिया रै लोग अखाया परदेशा दी एकी बौरशा ओउलै त्यार ई हुऐ औन्दै, और तुमारै हौसलै तौंइऐ भी भौरी लोग उकसाऐ ई। 3 पर मुंइऐ सै चीन विश्वासी भाई एथलै भेज़ै ई कि आमुऐ ज़ो घमण्ड तुमारै बारै दी देखाल़ौ आ, सेऊ घमण्ड एज़ी बुशा दी बेकार ना बौणा। पर ज़िणौ मुंइऐ बोलौ तिणी ई तुमैं यरुशलेमा रै विश्वासिऊ लै दाण भेज़णा लै त्यार रौऔ। 4 इणौ ना च़ांई हुऔ कि अगर कुण मुं आइलै मकिदुनीया परदेशा कु कुछ़ विश्वासी आशा और तुमु दाणा आइलै तैयार ना देखा, ता हुई बौल़ा आ कि एज़ै भरोसै री वज़ाह कु आमारी बेइज़्ज़ती हुआ, पर तुमारी तेथकु भी ज़ादी बेइज़्ज़ती हुणी। 5 एथीलै मुंइऐ विश्वासी भाईऊ कु इणी औरज़ कौरणी ज़रूरी सौमझ़ौ कि सै पैहलै कु ई तुमु काऐ आशा, और तुमारै ज़िवा खोलियौ दैणै रौ फौल़ ज़ेथरै बारै दी पैहलै कु वचन देई गौ थौ, तयार कौरीयौ छ़ाड़ा कि एऊ ज़ौबरिऐ नाईं पर ज़िवा खोलियौ दैणै रै फौल़ा बाशीऐ त्यार हुआ दाण किणौ देई लै 6 पर बूश एज़ी आ, ज़ुण थोड़ौ बौआ सा, सेऊ थोड़ौ लौआ भी आ। और ज़ो भौरी बौआ सा, सेऊ भौरी का लौआ सा। 7 हर एक आदमी ज़िणौ मौना दी ठाणा तिणौ दाण कौरा। ना ता कुड़-कुड़ाइयौ और ना ज़ौबरी ऐ, कैलैकि परमेश्वर खुशी कौरी दैणै वाल़ेऊ आइलै प्यार छ़ाड़ा सा। 8 परमेश्वर सारै रौंगा री बौड़ी दया भौरी का दिआ सा ज़ेथ कौरी हर बुशु दी और हर बौगतै, सारौ कुछ़ ज़ो तुमुकै ज़रूरी औली, तुमु काऐ रौआ। और हर एक भौलै कामा लै तुमुकै भौरी कुछ़ च़ांई हुऔ। 9 ज़िणौ पवित्रशास्त्रा दी आ लिखौ औन्दौ, “परमेश्वर ज़ुरतमंद लोगु लै खुलै ज़िवा कौरी दिया आ, तिणीऐ गरीबु लै दाण दैऔ, तेसरी भौलाई सौदा लै बौणी रौआ।” 10 परमेश्वर आ ज़ुण बौइणै वाल़ेऊ लै बीज और खाणा लै रोटी दिआ सा, सेऊ तुमुकै बीज दिआ, और तेस कामयाब कौरा। और तुमारी भौलाई रै फौल़ बौड़ाउवा सा। 11 तुमुकै हर रौंगा री आशीष मिला ताकी तुमै सौदा खुलै ज़िवा कौरीऐ दाण देई बौल़ा। और ज़ेबी आमै तुमारै दाण गरीब लोगु काऐ नीईंयौ डेउलै, ता सै लोग परमेश्वरा रौ धन्यबाद कौरा ई। 12 कैलैकि इऐं सेवा पुरी कौरणै कु ना सिरफ परमेश्वरा रै लोगु री ज़रूरत पुरी औन्दी, पर लोगु री तौरफा कु परमेश्वरा रौ भी भौरी धन्यबाद हुआ सा। 13 कैलैकि इऐं सेवा रौ सबूत मानियौ सै परमेश्वरा री महिमा पौगड़ी कौरा ई कि तुमैं यीशु मसीह री खुशी री खौबर मानियौ तेथरै अधीन रौआ ई, ज़ुरतमंद विश्वासिऊ और सारेऊ री मज़द कौरणै दी खुलै ज़िऊ पौगड़ै कौरदै थाका ई लागी। 14 और सै तुमुलै प्राथना कौरा ई, कैलैकि तुमु माथै परमेश्वरा री बौड़ी दया आ, और तुमु कु मिलणै री आश कौरदै थाका ई लागी। 15 परमेश्वरा रौ, तेसरै दाणा लै ज़ो हिसाबा कु बाइरै आ, तेसरौ धन्यबाद च़ांई हुऔ। |
This work is licensed under Creative Commons Attribution-ShareAlike 4.0 License.