2 कुरि 8 - पहाड़ी महासुईखुशी कौरी दाण दैणौ 1 आबै ओ मैरै प्यारै साथी विश्वासिउओ आमै तुमुलै परमेश्वरा री तिऐं बौड़ी दया री खुश खौबर देई ई ज़ो मकिदुनीया परदेशा री कलिसिया रै लोगु माथै हुई आ। 2 कि ज़ेबी भौरी दुःखा दी तिऊंरौ इम्तहान हुऔ ता सै भौरी खुश हुऐ और भौरी गरीबी दी तिंउऐ खुलै ज़िवा कौरीऐ ओरी विश्वासिऊ री मज़द कौरना लै पैसै दै। 3 तिंउरै बारै दी मेरी इऐ गवाही आ तिंउऐ आपणी शक्ति कु यानी के शक्ति कु भी ज़ादौ दैऔ आ। 4 एस दाणा दी और पवित्र लोगु री सेवा दी ज़ुण यहुदिया परदेशा दी ई, साथी हुणै री मज़दा रै बारै दी, आमुकु घौड़ी-घौड़ी औरज़ की, 5 और ज़िणी आमुऐ आश की थी, तिणी ई नाईं बल्कि पैहलै आपणौ ज़िऊ प्रभु लै, तैबै परमेश्वरा री मौरज़ी कौरी बासिऐ आमुलै भी दैऔ। 6 एथीलै आमुऐ तितुस सौमझ़ाऔ कि ज़िणौ तिणीऐ पैहलै शुरु कियौ थौ तिणौ ई तुमु मांझ़िऐ एस दाण दैणा रौ काम पुरौ भी कौरालौ। 7 एथीलै ज़िणौ तुमै सारी बुशु दी मतलब के विश्वास, वचना रौ परचार कौरणै दी ज्ञान और सारी रौंगा री कोशिषा दी, और तेस प्यारा दी ज़ो आमु आइलै छ़ाड़ाई, बौड़दै लागै औन्दै और तिणौ ई ज़ुरतमंद विश्वासिऊ लै दाण दैणै रै कामा दी भी बौड़दै थाकौ लागी। 8 हाऊं इऐं बूश तुमुलै हुकमा रै रुपा दी नाईं दैंदै लागौ औन्दौ पर दुजै रै हौसला कु तुमारै प्यारा री सौच़्च़ाई परखुणा लै भी ऊ बोलदै लागौ औन्दौ। 9 तुमै आमारै प्रभु यीशु मसीहा री बौड़ी दया ज़ाणाई कि सेऊ अमीर हुइयौ भी तुमुलै गरीब बौणौ आ ताकी तेसरै गरीब हुइयौ तुमै अमीर हुऔ। 10 पिछ़लै बौरशा दी तुमै सारेऊ कु पैहलै थै ज़ुण दाण दैणौ च़ाहा थै, और तुमै थै ज़ुणिऐ सारेऊ कु पैहलै दाण दैणौ शुरु कियौ, इऐं बुशा दी मेरी सलाह एज़ी आ कि, एऊ तुमुलै आच़्छ़ौ आ। 11 एथीलै आबै एस काम पुरौ कौरौ कि ज़िणौ तुमैं देणा री इच़्छ़ा लै तुमैं तैयार थै, तिणी ई आपणै-आपणै खौरच़ै रै मुताबिक पुरौ भी कौरौ। 12 कैलैकि अगर तुमै च़ाहा लै ता दाण तेथरै मुताबिक कबूल भी हुआ सा ज़ो तेसकै आसती आ, ना कि तेथरै मुताबिक ज़ो तेसकै नाईं आ। 13 हाऊं इणौ नाईं च़ाहांदौ कि दुजेऊ लै सुख और तुमुलै मिला दुःख। 14 पर बराबरी रै बिच़ारा कु एज़ै बौगतै तुमारी ज़ादी कौमाई कम कौमाई वाल़ै री ज़रूरत पुरी कौरा ताकी तिउंरी ज़ादी कौमाई तुमारौ काठौ बौगत सौंभाल़ा कि तुमारौ हिसाब किताब बराबर हुआ। 15 ज़िणौ पवित्रशास्त्रा दी आ लिखौ औन्दौ, “ज़ुणिऐ भौरी कौमाऔ आ तेसरौ कुछ़ भी ना निकल़ौ, और ज़ुणिऐ थोड़ौ कौमाऔ तेसरौ कुछ़ भी कामत्ती ना निकल़ौ।” तितुस और तेसरै साथी 16 परमेश्वरा रौ धन्यबाद आ, ज़ुणिऐ तुमुलै सेज़ौ जोश तितुसा रै ज़िवा दी पाई ऐरौ आ ज़ो मुंदी थौ। 17 कि तिणीऐ आमारौ सौमझ़ाउणौ मानी ऐरौ तैबै ई भौरी खुश हुइयौ सेऊ आपणी मौरज़ी कौरी तुमु काऐ आशदै लागौ औन्दौ। 18 आमै तेस आइलै तेस विश्वासी भाई भी भेज़दै लागै औन्दै ज़ासरौ नाऊं खुशी री खौबर शुणाउणै रै बारै दी सारी कलिसिया रै विश्वासिऊ दी आ फौइलौ औन्दौ। 19 और एती ई नाईं, पर सेऊ कलिसिया रै विश्वासिउऐ मानी भी ऐरौ कि एस दाणा रै कामा लै आमु आइलै डिया। आमै इऐं सेवा एज़ी ताइंऐ कौरी आ कि प्रभु री महिमा और आमारै मौना री तैयारी मज़द कौरना लै पौगड़ी हुई बौल़ा। 20 आमै एज़ी बुशु दी खौबरदार रौई ई कि एस खुलै ज़िवा कौरी दैणै रै कामा रै बारै दी ज़ासरी सेवा आमै कौरी ई, कोई भी आमु माथै बौदी ना लाई बौल़ा। 21 कैलैकि ज़ो बुशै सिरफ प्रभु री नौज़री दी नाईं, पर लोगु री नौज़री दी भी भौली ई कि आमै तिऊं ठीक कौरना लै ध्यान देई। 22 आमुऐ तिऊं आइलै आपणौ एक विश्वासी भाई भी भेज़दै लागै औन्दै ज़ो आमुऐ घौड़ी-घौड़ी पौरखियौ भौरी बुशु दी जोशिलौ देखौ आ। पर आबै तुमु माथै तेसरौ बौड़ौ भरोसौ आ, एज़ी वज़ाह कु तेसदी तौंइऐ भी भौरी जोश आ। 23 अगर कुण तितुसा रै बारै दी पुछ़ा लौ, ता सेऊ मैरौ साथी और तुमुलै मैरै साथा दी कामा कौरणै वाल़ौ आ। और अगर कुण आमारै विश्वासी भाईऊ रै बारै दी पुछ़ा लौ, ता सै कलिसिया कु भेज़ै औन्दै कि सै यीशु मसीहा री महिमा कौरा ई। 24 एथीलै कि आपणौ प्यार और आमारौ सेऊ घमण्ड ज़ो तुमारै बारै दी आ, कलिसिया रै सामनै साबित कौरीयौ तिउंकै देखाल़ौ। |
This work is licensed under Creative Commons Attribution-ShareAlike 4.0 License.