2 कुरि 5 - पहाड़ी महासुईआमारौ सौरगा ज़िणौ घौर 1 कैलैकि आमै ज़ाणी ई कि आमारै शरीर इऐं धौतरी माथै तेस ताम्बु बाशीऐ आ, ज़ेथदी आमै रौई ज़ो नाश हुणौ आ, ता आमु कालै परमेश्वरा री तौरफा कु सौरगा दी एक इणौ घौर मिला सा ज़ो हाथा कौरी बौणौ औन्दौ घौर नाईं पर सौदा लै पाकौ घौर आ। 2 पर ज़ेबी आमै इऐं धौतरी माथा रै घौरा दी रौई ता आमै लेरी ई। और आश छ़ाड़ी आ कि आमुलै सौरगा रौ घौर मिला आ 3 ज़ेबी आमै आपणै सौरगा रै घौरा दी रौउलै तैबै आमै कास नांगै आदमी ज़िणै नाईं हुणै। 4 और आमै एस घौरा दी रौइयौ भारै थाली दाबुऐ औन्दै, कैलैकि आमै संसारिक शरीर छ़ाड़णौ नाईं च़ांहदै पर आमै च़ाई कि परमेश्वर आमुलै सौरगा रौ शरीर दिआ, ताकी आमारौ नौंवौ शरीर ज़ो सौदा लै रौउणौ आ सेऊ इऊं शरीर ज़ो नाश हुणै ई बौदला आ। 5 परमेश्वरै आपु आमै एज़ी बुशा लै ई त्यार किऐ औन्दै, ज़ुणिऐ आमुकै बयानै दी पवित्र आत्मा भी आ देई औन्दी। इयौ ब्यानौ सेज़ौ वायदौ आ ज़ो परमेश्वर बासिऐ आमुलै पुरौ कौरा आ। 6 आमुकै पुरौ विश्वास आ, कैलैकि आमै ज़ाणी ई कि ज़ेबी झ़ांऊ आमै शरीरा दी रौउंदै लागै औन्दै तेबी झ़ांऊ आमै प्रभु कु अलग ई ज़ुण सौरगा दी आ 7 कैलैकि आमै मसीह माथै विश्वासा री वज़ाह कु ज़िउंदै ई ना कि तेस देखीयौ। 8 एथीलै आमै भरोसौ छ़ाड़ी आ, शरीरा कु अलग हुइयौ प्रभु आइलै रौइणौ सौभी कु आच़्छ़ौ सौमझ़ी ई। 9 एज़ी वज़ाह कु आमै आपणै मौना दी इणौ च़ांई कि आमै सौरगा दी रौउलै या च़ाऊ धौतरी माथै रौउलै आमै प्रभु कै आच़्छ़ै च़ांई लागणै। 10 कैलैकि ज़ुरुरी आ कि आमु सौभीऊ रौ राज़ मसीह रै फैसलै रै राज़गादी काऐ खुला, कि हर एक आदमी आपणै-आपणै भौलै बुरै कामा रौ बौदल़ौ निआं ज़ो तिणीऐ आपणै शरीरा कौरीऐ किएई। परमेश्वरा आइलै मेल-ज़ोल 11 एथीलै प्रभु रौ डौर मानियौ आमै लोगु कु औरज़ कौरी कि सै सौच़्च़ाई माथै विश्वास कौरा। पर परमेश्वर आमारौ हाल ज़ाणा आ और मेरी आश इणी आ कि तुमै आमारै बारै दी ज़ाणा कि आमै किणै रौंगा रै लोग ई। 12 तैबै भी आमै आपणी बौड़ाई तुमु काऐ नाईं कौरदै, पर आमै आपणै बारै दी तुमुकै घमण्ड कौरणै रौ मौकौ देई ई, कि तुमैं तिउंलै ज़वाब देई बौल़ा, ज़ो मौना लै नाईं पर देखावटी बुशु लै घमण्ड कौरा ई। 13 अगर कुण बोलालौ कि आमै पागल ई, ता आमै परमेश्वरा लै ई और अगर बोलालै कि आमै होश-बाशी दी, ता तुमुलै ई। 14 कैलैकि मसीहा रौ प्यार आमु मज़बूर कौरा सा। एथीलै कि आमै इणौ सौमझ़ी ई कि ज़ैबै एक सारेऊ लै मौरी गौ आ ता सारै मौरी गोऐ। 15 और मसीह इणै कौरी सारै लोगु लै मौरौ कि ज़ो लोग ज़िउंदै ई, सै एथ बासी आपुलै ना ज़िआ पर तेसलै ज़िआ ज़ो तिउंलै मौरौ आ और तौंइऐ दुजी बारै ज़िउंदौ हुऔ आ। मसीहा दी नौईं सृष्टी 16 पर एथ बासी आमै कासी रौ भी शरीरा रै मुताबिक तेसरौ फैसलौ नाईं कौरदै। यानी के एकी बारै प्रभु यीशु भी आमुऐ शरीरा रै मुताबिक ज़ाणौ थौ, तैबै भी एथ बासी मसीह आमै इणौ नाईं ज़ाणदै। 17 एथीलै अगर कुण मसीहा माथै विश्वास कौरा आ ता सेऊ मसीह दी नौंवौ आदमी आ। पुराणी बुशै बिती गोई। देखौ, आबै सारी बुशै नौईं हुई गोई आ। 18 एज़ी सारी बुशै परमेश्वरा री तौरफा कु आ, ज़ुणिऐ यीशु मसीह रै ज़ौरिऐ आपु आइलै आमारौ मेल-मिलाप कौरी ऐरौ आ, और मेल मिलापा री सेवा आमु सौभी कै सांबी एरी आ। 19 एथरौ मतलब इणौ आ कि परमेश्वरै मसीहा दी हुइयौ आपु आइलै धौतरी रै लोगु रौ मेल मिलाप कौरी ऐरौ आ, और तिंउरै बुरै कामा रौ आरोप तिऊं माथै नाईं लाऔ और परमेश्वरै मेल मिलापा रौ वचन आमुकै सौंभाल़ी ऐरौ आ। 20 एथीलै, आमै मसीहा रै बज़ीर ई। और परमेश्वर आमारै ज़ौरिऐ लोगु कु औरज़ कौरदै लागौ औन्दौ, कि लोग तेसरै वचन अपणावा। एथीलै आमै मसीह री तौरफा कु बोली ई कि परमेश्वरा आइलै मेल-ज़ोल कौरौ 21 मसीह पापा कु अणज़ाण थौ, सेऊ ई परमेश्वरै आमारी ताइंऐ तेस आइलै पापी ज़िणौ बरताव कियौ कि आमै मसीह दी हुइयौ परमेश्वरा रै आच़्छ़ै और धौर्मी आदमी बौणा। |
This work is licensed under Creative Commons Attribution-ShareAlike 4.0 License.