2 कुरि 4 - पहाड़ी महासुईमाटै रै ओखरा दी धन 1 एथीलै ज़ैबै आमु माथै इणी दया हुई कि आमुकै परमेश्वरा रौ परचार कौरणै री सेवा मिली, ता आमै निराश नाईं औन्दै। 2 पर आमुऐ लाज़ी रै गुप्त काम पोरु छ़ाड़ी ऐरै, और ना च़ालाकी कौरी च़ालदै, और ना परमेश्वरा रै वचना दी मिलावट कौरदै। पर आमै परमेश्वरा रै सामनै सौच़्च़ाई री शिक्षा देई, कि हर एक आदमी एथरी गवाही देई सौका ई कि इऐ सौच़्च़ी आ। 3 ज़ेज़ी खुशी री खौबरी रौ आमै परचार कौरी, तेथ माथै अगर पौरदौ आ पौड़ौ औन्दौ, ता सेऊ पौरदौ तिऊं लै आ पौड़ौ औन्दौ ज़ुण नाश हुणै वाल़ी बाटा दी हाण्डा ई। 4 इऐं धौतरी रै ईश्वर शैतानै तिऊं अविश्वासिऊ री आखी शेड़ी आ की ई ऐन्दी, ताकी मसीह ज़ो परमेश्वरा रौ रूप आ, तेसरै च़ौमकणै वाल़ी खुश-खौबरी रौ प्याशौ तिऊं माथै ना च़ौमका। 5 कैलैकि आमै आपुलै नाईं, पर यीशु मसीह लै परचार कौरी ई कि सेऊ प्रभु आ। और तेसरै बारै दी इणौ बोली ई कि आमै यीशु री वज़ाह कु तुमारै सेवक ई। 6 एथीलै कि परमेश्वरै बोलौ, “न्यारै मांझ़िया कु प्याशौ च़ौमकौ,” और परमेश्वरै आमुकै प्याशै ज़िणी सौमझ़ देई ताकी आमै परमेश्वरा री महिमा देखी बौल़ु ज़ो यीशु मसीह दी पौगड़ी हुई। 7 पर आमै माटै रै ओखरु ज़िणै ई ज़ेथदी इऐ धन ज़यदाद आ छ़ाड़ी औन्दी कि एथरौ पौतौ लागा कि इऐ सौदा री तागत आमारी तौरफा कु नाईं पर परमेश्वरा री तौरफा कु बौणी रौआ। 8 आमै च़ारौ तौरफा दी दुःख ता भोगी आ, पर मुसीबता दी नाईं पौड़दै। घौबरा ई ता ई, पर निराश नाईं औन्दै। 9 आमु सतावा ता भौरी ई, पर आमु शोटदै नाईं, लोटाल़ा ता ई, पर नाश नाईं औन्दै। 10 आमै हर बौगतै झ़ांगिणै रै खौतरै दी ज़िवी ई ज़िणौ यीशु झ़ांगौ थौ, ताकी यीशु री ज़िन्दगी भी आमारै शरीरा कु पौगड़ी हुआ। 11 कैलैकि ज़ेबी झ़ांऊ आमै ज़िउंदै ई सौदा यीशु री वज़ाह कु आमु मौउता रै खौतरै दी सौंभाल़ा ई कि यीशु री ज़िन्दगी भी आमारै मौरणै वाल़ै शरीरा कु पौगड़ी हुआ। 12 एथीलै आमै मौउता रै खौतरै दी ज़िवी ई, पर एथरौ नौतिज़ौ तुमुलै सौदा री ज़िन्दगी हुऔ आ। 13 एथीलै कि आमुदी सेई विश्वासा री आत्मा सा ज़ेथरै बारै दी पवित्रशास्त्रा दी लिखौ औन्दौ भी आ, “मुंइऐ विश्वास कियौ, एथीलै ‘हाऊं’ मतलब के आमै भी विश्वास कौरी ई, एथीलै आमै बोली ई।” 14 कैलैकि आमै ज़ाणी ई कि, ज़ुणिऐ प्रभु यीशु मौरै औन्दै मांझ़िया कु ज़िउंदौ कियौ आ, सेऊ आमु भी प्रभु यीशु आइलै साथाई ज़ाणियौ ज़िउंदौ कौरा सा, और तुमु आइलै आपु काऐ हाज़िर कौरा सा। 15 कैलैकि इऐ सारी बुशै हाऊं तुमुलै एथीलै बोलाऊ कि आमुऐ तुमारै फाइदै लै दु:ख झ़ेलौ आ, ज़िणी परमेश्वरा री बौड़ी दया भौरी लोगु मांझ़िऐ पौउंच़ा आ तैबै सै परमेश्वरा री महिमा लै भौरी धन्यबाद कौरा ई 16 एथीलै आमै निराश नाईं औन्दै। आमारौ एऊ नाश हुणै वाल़ौ शरीर सुलै-सुलै कमज़ोर हुआ सा, और आमारी आत्मा हर दिना दी नौंवौ थाका आ औन्दै लागी। 17 कैलैकि आमारौ थोड़ै बौगता रौ हौल़्कौ ज़ेई दुःख आमुलै भौरी ई खास और सौदा री महिमा तयार कौरदै थाका लागी। 18 और आमै ता देखी ऐन्दी च़िज़ु नाईं पर अणदेखी च़िज़ु देखदै थाकी लागी। कैलैकि देखी ऐन्दी च़िज़ै दौख दिना री ई, पर अणदेखी च़िज़ै सौदा लै बौणी रौआ ई। |
This work is licensed under Creative Commons Attribution-ShareAlike 4.0 License.