2 कुरि 13 - पहाड़ी महासुईआखरी बार खौबरदार कौरणै 1 आबै चीजी बारै हाऊं तुमु काऐ आशणौ ऊ, पवित्रशास्त्रा दी आ लिखौ औन्दौ कि, “दुई या चीन गवाह रै मुंआ कौरी सारी बुशै पाकी कौरा ई।” 2 ज़िणौ हाऊं ज़ेबी दुजी बारै तुमु आइलै थौ, तिणी ई आबै दूर रौइयौ तिऊं लोगु कु ज़ुणिऐ पैहलै पाप कियौ, और ओरी सारेऊ लोगु कु पैहलै बोलाऊ कि अगर हाऊं तौंइऐ आशु लौ ता नाईं छ़ाड़दौ। 3 हाऊं तुमुलै बोलाऊ कि तुमै ता एथरौ सबूत च़ाहा ई, कि मसीह मैरै ज़ौरिऐ बोला सा, ज़ेबी मसीह तुमु ठीक कौरा सा ता मसीह कमज़ोर नाईं पर तुमु मांझ़िऐ शक्ति वाल़ौ आ। 4 सेऊ कमज़ोरी री वज़ाह कु क्रुसा माथै टांगी ता ऐरौ आ। तैबै भी परमेश्वरा री शक्ति कौरी ज़िउंदौ आ। आमै भी मसीह ज़िणै कमज़ोर ई, पर परमेश्वरा री शक्ति कौरी ज़ो तुमुलै आ तेस आइलै ज़िवी ई। 5 आपु पौरखियौ कि विश्वासा दी आसती कि नाईं। आपणी ज़ांच़ कौरौ। का तुमैं आपणै बारै दी इणौ नाईं ज़ाणदै कि यीशु मसीह तुमु दी आ? नाईं ता तुमैं पौरखुइयौ निकामै निकल़ी गोऐ ई। 6 पर मेरी आश आ कि तुमैं पोरु ज़ाणाई कि आमै निकामै नाईं आसतै। 7 आमै आपणै परमेश्वरा कु प्राथना कौरी कि ज़ो तुमै आच़्छ़ौ कौरा। एथलै नाईं कि आमै ठीक दिशी गोऐ, पर एथलै कि तुमैं भौलाई कौरौ, च़ाऊ आमै निकामै ई कैलै ना औलै। 8 कैलैकि आमै सौच़्च़ाई रै विरोधा दी कुछ़ नाईं कौरी बौल़दै, पर सिरफ सौच़्च़ाई लै ई कौरी ई। 9 ज़ैबै आमै कमज़ोर ई, और तुमैं शक्ति वाल़ै ई, ता आमै खुश हुई ई, और इणी प्राथना भी कौरी ई कि तुमै विश्वासा दी पाक्कै बौणौ। 10 एज़ी वज़ाह कु हाऊं तुमारी पीठी पिछ़ु इऊं बुशै लिखाऊ, कि हाज़िर हुइयौ मुकै तेस हक्का कौरीऐ ज़ो प्रभुऐ बिगाड़णा लै नाईं पर चाणना लै मुकै दैऔ आ, सौखती कौरी कुछ़ ना जा लौ कौरणौ। आखरी ढाल 11 पर ओ मैरै प्यारै साथी विश्वासिउओ, खुश रौऔ, और पाकै थाकौ बौणदै लागी, एकी दुजै लै हौसलौ दैऔ, एक ई मन छ़ाड़ौ, मेल मिलापा कौरी रौऔ। प्यार और शान्ति दैणै वाल़ौ परमेश्वर तुमु आइलै हुआ। 12 एकी दुजै आइलै पवित्र ज़िवा कौरी गौल़ै मिलियौ ढाल कौरौ। 13 सारै परमेश्वरा रै लोग तुमुकै ढाल कौरा ई। 14 प्रभु यीशु मसीह री बौड़ी दया और परमेश्वरा रौ प्यार और पवित्र आत्मा रौ साथ तुमु सौभी आइलै औन्दै थाका लौ लागी। |
This work is licensed under Creative Commons Attribution-ShareAlike 4.0 License.