2 कुरि 10 - पहाड़ी महासुई

पौलुसा रौ हक्क

¹ हाऊं सेऊ ई पौलुस ऊ ज़ो तुमु काऐ नीउलौ ऊ पर पीठी पिछ़ु तुमारी तौरफा दी हिम्मत कौराऊ, तुमुकै मसीहा रौ निउलौपन और कौंअल़ाई री वज़ाह कु मेरी बुशै शुणना लै औरज़ कौराऊ।

² हाऊं एज़ी औरज़ कौराऊ कि तुमु काऐ मुं निडर हुइयौ सौख्ताई कौरी धौमकाउणौ ना पौड़ा, ज़िणौ हाऊं कुछ़ लोगु माथै ज़ो आमु संसारिक लोगु ज़िणै सौमझ़ा ई, सौख्ताई कौरी धौमकाउणै रै बारै दी बिच़ार कौराऊ।

³ कैलैकि अगर आमै इऐं दुनिया दी रौई, तैबै भी आमै दुश्मनु आइलै नाईं लौड़दै ज़िणै इऐं दुनिया रै लोग लौड़ाई।

⁴ कैलैकि आमारी लौड़ाई रै औज़ार शरीरा कौरी लौड़णा रै नाईं आसतै, पर दुश्मनु रै इलाकै तबाह कौरना लै परमेश्‍वरा रै ज़ौरिऐ शक्ति वाल़ै औज़ार ई।

⁵ एथीलै आमै ख्याला रौ और हर उंच़ी बुशा रौ, ज़ो परमेश्‍वरा रै पैहच़ाणा रै विरोधा दी उठा सा तिऊं बुशै ज़ौड़ी कु खातम कौरी ई और हर एक भावना कैदा दी कौरीऔ मसीहा रौ आज्ञाकारी चाणी ई।

⁶ और त्यार रौई ई कि ज़ैबै तुमारी हुकम रौ पालन पुरौ हुई जा लौ, ता हर एक रौंगा री हुकम ना मानणै वाल़ै लै सौज़ा दिआ।

⁷ तुमैं तिऊं सबूत शुणौ, ज़ो आखी रै सामनै ई। अगर कासकै आपणै घौरा माथै भरोसौ औलौ कि हाऊं मसीह रौ ऊ, ता सेऊ इणौ भी ज़ाणालौ कि ज़िणौ सेऊ मसीहा रौ आ तिणै आमै भी मसीह रै ई।

⁸ कैलैकि अगर हाऊं तेस हक्‍का रै बारै दी औज़ौ भी घमण्ड देखाल़ु लौ, ज़ो प्रभुऐ तुमारै विश्वास खातम कौरना लै नाईं पर बौड़ाउणा लै आमुकै दैऔ आ ता हाऊं बेशर्म नाईं औन्दौ।

⁹ इणौ हाऊं एथलै बोलाऊ कि चिट्ठीऊ रै ज़ौरिऐ कि हाऊं तुमु डराउणै वाल़ौ ना बौणु।

¹⁰ कैलैकि कुछ़ लोग बोलाई, “तिउंरी चिट्ठी ता असरदार और दमदार ई। पर ज़ेबी सेऊ सामनै हुआ ता तेबी सेऊ शरीरा दी कमज़ोर और तेसरी बुशु रौ कोई मतलब नाईं।”

¹¹ ज़ो इणौ बोला सा, सेऊ इणौ सौमझ़ा लौ कि ज़िणौ पीठी पिछ़ु चिट्ठीऊ दी आमारै वचन ई, और तिणी ई तुमारै सामनै आमारै काम भी हुआई।

¹² कैलैकि आमुकै इणी हिम्मत नाईं कि आमै आपु ई तिऊं मांझ़िऐ इणै कुछ़ आइलै साथाई गिणीया या तिउंकै आपु मिली लै, ज़ुण आपणी तारीफ आपु कौरा ई और आपु ई आपु मांझ़िऐ नापुई-तोलूइयौ एकी दुजै आइलै मिल़ुइयौ मुर्ख बौणा ई।

¹³ कैलैकि आमै ज़ो काम परमेश्‍वरै आमुकै दैऔ आ तेथकु बाइरै घमण्ड बिल्कुल भी नाईं कौरुलै, पर तिऐं ज़ागाह झ़ांऊ ज़ो परमेश्‍वरा रै आमु कालै चाणी ऐन्दी आ, और तेथदी तुमैं भी आशी गौऐ ई, और तेथी रै मुताबिक घमण्ड भी कौरा ई।

¹⁴ कैलैकि आमै आपणै हिसाबा कु बाइरै आपु बौड़ाउणै नाईं च़ाहांदै, ज़िणौ कि तुमु झ़ांऊ ना पहुच़णा री हालती दी हुआ, पर यीशु मसीहा री खुशी री खौबर शुणाउंदै-शुणाउंदै तुमु झ़ांऊ पहुंच़ी ऐरै ई।

¹⁵ आमै हिसाबा कु बाइरै दुजै री मैहनती माथै घमण्ड नाईं कौरदै। पर आमुकै आश आ कि ज़िणी-ज़िणी ई तुमारौ विश्वास बौड़दै थाका लौ लागी, तिणी-तिणी ई आमै भी आपणै हिसाबा रै मुताबिक तुमारी वज़ाह कु तौंइऐ भी बौड़दै थाकी लागी,

¹⁶ ताकी आमै तुमारै हिसाबा कु औगांऊ बौड़ियौ दूर-दुरा झ़ाऊं खुशी री खौबर शुणाई। कैलैकि इणौ नाईं कि आमै दुजै रै हिसाबा भितै बौणै-बौणाऐ कामा माथै घमण्ड कौरी।

¹⁷ पर ज़िणौ पवित्रशास्त्रा दी आ लिखौ औन्दौ, “ज़ो घमण्ड कौरालौ सेऊ आपणै प्रभु माथै घमण्ड कौरालौ।”

¹⁸ कैलैकि ज़ुण आपणी बौड़ाई कौरा सा सेऊ नाईं, पर ज़ासरी बौड़ाई प्रभु कौरा सा सेऊ परमेश्‍वरा री नौज़री दी आच़्छ़ौ आ।