1 थिस्स 5 - पहाड़ी महासुईप्रभु रै वापिस आशणा लै तैयार रौइणौ 1 पर ओ मैरै प्यारै साथी विश्वासिउओ, एथरी कोई ज़ुरत नाईं, कि प्रभु यीशु रै वापिस आशणै रै बौगत और तारीखा रै बारै दी तुमुलै कुछ़ लिखुलै। 2 कैलैकि तुमै आपु ई ठीक ज़ाणाई कि ज़िणौ राची च़ोर आशा सा, तिणौ ई प्रभु यीशु रौ आशणौ भी हुणौ आ। 3 ज़ेबी लोग बोलदै औलै लागै औन्दै कि “आमै ठीक ई, और कुछ़ भी डौर नाईं आसतौ,” ता तिऊं माथै एकी ई घौड़ी विनाश आशा सा, ज़िणी गौरकड़ी छ़ेउड़ी दी बेदण, और सै तिऊं बौड़ी मुसीबता कु केज़ी भी रीती कौरी नाईं बौच़णै। 4 पर प्यारै साथी विश्वासिउओ, तुमै न्यारै दी नाईं आसतै, कि सेज़ौ दीन तुमु माथै च़ोरा ज़िणौ आशा लौ। 5 कैलैकि तुमै प्याशै री, और दुसा री सन्तान ई, आमै ना ता राची रै और ना न्यारै री सन्तान ई। 6 एथीलै आमै अविश्वासिऊ बाशीऐ सुती ना थाका, पर उज़ीई ई और खौबरदार रौएऊ। 7 कैलैकि ज़ुण सुता ई, सै राची ई सुता ई, और ज़ुण शराब पिणै वाल़ै हुआई, सै राची ई माच़ा ई। 8 पर आमै ता दिना रै ई, विश्वास और प्यारा रौ रक्षा रौ कवच भिड़ीयौ और छ़ुटकारै री आशा रौ टोपौ भिड़ीयौ खौबरदार रौऔ। 9 कैलैकि परमेश्वरै आमै रोशा कौरी सौज़ा दैणा लै नाईं, बल्कि एथलै ई छ़ांटै औन्दै कि आमै आपणै प्रभु यीशु मसीह कु छ़ुटकारौ पाई लै। 10 सेऊ आमुलै एथीलै मौरौ, कि आमै च़ाऊ ज़िउंदै औलै, च़ाऊ मौरुलै, ता आमै सौदा तेसी आइलै ज़िवी ज़ेबी प्रभु यीशु वापिस आशा लौ। 11 एज़ै कारणै एकी दुजै लै हौसलौ दैऔ, और एकी दुजै री प्रभु यीशु रै विश्वासा री मज़बुती दी मज़द कौरौ, पर आच़्छ़ौ आ कि तुमै इणौ भी कौरदै थाका ई लागी। कलिसिया लै शिक्षा 12 ओ मैरै प्यारै साथी विश्वासिउओ, आमै तुमु कु औरज़ कौरी ई, कि ज़ेज़ै तुमु मांझ़िऐ मैहनत कौरा ई, और प्रभु दी तुमारै अगुवै ई, और तुमुलै शिक्षा दिआई, तिउंरी इज़्ज़त कौरौ और मानौ। 13 और तिंउरै कामा री वज़ाह कु प्यारा आइलै तिऊं भौरी इज़्ज़ता रै लायक सौमझ़ौ आपु मांझ़िऐ मिली-ज़ुलियौ रौऔ। 14 और ओ मैरै प्यारै साथी विश्वासिउओ, आमै तुमु सौमझ़ाई ई, कि ज़ुण आल़सी बौणी गौऐ, तिऊं खौबरदार कौरौ, कायरु लै हिम्मत दैऔ, ज़ुण विश्वासा दी कमज़ोर ई तिऊं सौम्भाल़ौ, सारेऊ आइलै सौबर छ़ाड़ौ। 15 खौबरदार रौऔ! कोई भी कास आइलै बुराई रै बौदल़ै बुराई ना कौरालौ, पर सौदा भौलाई कौरना लै त्यार रौआ, और आपु मांझ़िऐ सौभी आइलै सौदा भौलाई री कोशिश कौरौ। 16 सौदा भौरी खुश रौऔ। 17 हर बुशा दी प्राथना दी थाकौ लागी। 18 सारी बुशु दी धन्यबाद कौरौ कैलैकि तुमुलै मसीह यीशु दी परमेश्वरा री एज़ी ई मौरज़ी आ। 19 पवित्र आत्मा रै काम लोगु री ज़िन्दगी दी हुणै कु नाईं रोकौ। 20 ज़ो भविष्यवाणी पौगड़ी हुई तिऊं तुमै बेकार ना ज़ाणौ 21 सारी बुशै पौरखौ, ज़ो बूश आच़्छ़ी आ तिऊं अपणाऔ 22 हर रौंगा री बुराई कु बौच़ी थाकौ। आशीर्वाद 23 शान्ति रौ परमेश्वर आपु ई तुमु पुरी रीती कौरी पवित्र कौरा सा। और तुमारी आत्मा, प्राण और शरीर आमारै प्रभु यीशु मसीहा रै वापिस आशणै झ़ांऊ पुरै-पुरै और बेकसूर और सौंभाल़ी छ़ाड़ा। 24 ज़ुणिऐ तुमै औटाएई सेऊ एस पुरौ भी कौरा कैलैकि सेऊ विश्वास वाल़ौ आ 25 ओ मैरै प्यारै साथी विश्वासिउओ, आमुलै प्राथना कौरौ। 26 सारै विश्वासिऊ आइलै पवित्र ज़िवा कौरी गौल़ै मिलियौ ढाल कौरौ। 27 हाऊं तुमुलै प्रभु रौ हुकम दिआऊ, कि इऐं चिट्ठी सारै विश्वासी भाईऊ कै पौढ़ीयौ शुणाएऊ। 28 आमारै प्रभु यीशु मसीह री बौड़ी दया तुमु माथै औन्दै थाकाली लागी। |
This work is licensed under Creative Commons Attribution-ShareAlike 4.0 License.