1 थिस्स 3 - पहाड़ी महासुईतीमुथियुस भेज़णौ 1 एथीलै ज़ैबै आमुकै रौउऔ नाईं ता आमुऐ इणौ सुंच़ौ कि एथेंस शैहरा दी एखुली रौउलै, 2 और आमुऐ तीमुथियुस, ज़ो मसीहा री खुश-खौबरी दी आमारौ भाई और परमेश्वरा रौ सेवक आ, एथीलै तुमु काऐ भेज़ौ कि तुमु विश्वासा दी मज़बूत कौरा, ताकी तुमारौ विश्वास यीशु मसीह दी लगातार बौणी रौआ, 3 कि कोई भी इऊं मुसीबता री वज़ाह कु यीशु मसीह माथै विश्वास कौरणौ ना च़ांई छ़ाड़ौ। कैलैकि तुमै आपु ज़ाणाई कि आमु सारेउऐ इणी मुसीबत झ़ेलणी जा ई। 4 कैलैकि पैहलै, ज़ेबी आमै तुमारै काऐ थै ता तुमुलै बोला थै कि आमु मुसीबत जा ई झ़ेलणी, और इणौ ई हुऔ, ज़िणौ कि तुमै ज़ाणा भी ई। 5 एज़ै कारणै ज़ैबै मुकै तौंइऐ रौउऔ नाईं, ता तुमारै विश्वासा रै हाल ज़ाणना लै मुइंऐ तीमुथियुस भेज़ौ, कि इणौ ना च़ांई हुऔ कि परखणै वाल़ै शैतानै तुमै पौरखै औलै, और आमारी मैहनत बेकार हुआ। तीमुथियुसा रै ज़ौरिऐ खुश-खौबरी मिलणी 6 पर इबी तीमुथियुसै ज़ो तुमारै काऐ कु आमु काऐ आशौ आ, तुमारै विश्वासा री और प्यारा री खुश-खौबरी शुणाई और एज़ी बूश भी शुणाई कि तुमै सौदा प्यारा आइलै आमु याद कौरा ई, और आमु देखणा री आश छ़ाड़ाई, ज़िणौ कि आमै भी तुमु देखणा री आश छ़ाड़ी ई। 7 और एथीलै ओ मैरै प्यारै साथी विश्वासिउओ, आमुऐ आपणै सारै दु:ख और मुसीबता दी तुमारै मज़बूत विश्वासा रै बारै दी ज़ो यीशु माथै आ शुणियौ भौरी खुशी पाई। 8 कैलैकि आबै अगर तुमै प्रभु दी टेकी रौआ लै ता आमारौ हौसलौ बौड़ा आ। 9 और ज़िणी खुशी आमुकै तुमु कु ज़ुण आपणै परमेश्वरा रै सामनै आ, तेथरै बौदल़ै आमै तुमारै बारै दी किणी रीती कौरी परमेश्वरा रौ धन्यबाद कौरुलै? 10 आमै राची-दिनै तुमुलै भौरी प्राथना कौरी ई कि तुमु कु तौंइऐ मिलु लै और तुमारै विश्वासा री कामी पुरी कौरी। 11 आमै प्राथना कौरी की आमारौ बाब परमेश्वर और आमारौ प्रभु यीशु मसीह तुमु काऐ आशणै दी आमारी मज़द और अगुवाई कौरा। 12 और प्रभु इणौ कौरा कि ज़िणौ आमै तुमु आइलै प्यार कौरी सी, तिणौ ई तुमारौ प्यार भी आपु मांझ़िऐ और सारेऊ लोगु आइलै बौड़ा, और तरक्की कौरदै थाका लागी, 13 ताकी सेऊ तुमारौ मन इणौ टेकावा कि ज़ेबी आमारौ प्रभु यीशु आपणै सारै पवित्र लोगु आइलै दुजी बारै वापिस आशा और तुमै आमारै परमेश्वर और बाबा रै सामनै पवित्रता दी बेकसूर बौणा। |
This work is licensed under Creative Commons Attribution-ShareAlike 4.0 License.