1 थिस्स 2 - पहाड़ी महासुईपौलुसा रौ परचारा रौ काम 1 ओ मैरै प्यारै साथी विश्वासिउओ, तुमै आपु ई ज़ाणाई कि आमारौ तुमु काऐ आशणौ फाइदा रौ काम हुऔ आ, 2 ज़िणौ कि तुमै आपु ई ज़ाणाई कि पैहलै फिलिप्पी गांवा दी दु:ख उठाउणै और बुरौ बरताव सहन कौरना माथै भी आमारै परमेश्वरै आमुलै एती हिम्मत देई, कि आमै परमेश्वरा री खुश-खौबरी तुमारै इलाकै दी भौरी विरोधा मांझ़िऐ भी तुमुकै शुणाई। 3 कैलैकि आमारी शिक्षा ना ता धोखै री और ना गलत इरादै री और ना ता ठगबाज़ी री आ। 4 पर ज़िणौ परमेश्वरै आमुकै इणै लायक सौमझ़ियौ खुश-खौबरी सौंभाल़ी आ, आमै तिणी ई परचार कौरी ई, एथीलै आमै लोगु नाईं पर परमेश्वर, ज़ुण आमारौ ज़िऊ पौरखा सा खुश कौरी ई। 5 तुमै ज़ाणाई आमै ना ता केबी हेरा-फेरी वाल़ी बुशै लाई थै, और ना ता आमै तुमु कु मिलणै रौ लोभ-लाल़च़ कौरा थै, एज़ी बुशा रौ परमेश्वर गवाह सा। 6 हालांकी आमै मसीह रै प्रेरित हुणै री वज़ाह कु तुमु माथै भार पाई बौल़ी थै, तैबै भी आमुऐ तुमु कु और कास ओरी कु इज़्ज़तमान नाईं च़ाई थै, और ना तुमु कु, और ना ओरी कासी कु। 7 पर ज़िणै कौरी मां आपणै लोल़डेऊ री देखभाल़ कौरा सा, तिणौ ई आमुऐ भी तुमु मांझ़िऐ रौइयौ प्यार देखाल़ौ आ। 8 और तिणी ई आमै तुमारी बौड़ी इच़्छ़ा कौरीयौ ना सिरफ परमेश्वरा री खुश-खुशी री खौबरी माथै आपणी ज़ान दैणा लै भी तुमुलै तैयार थै, एथलै कि तुमै आमारै भौरी प्यारै हुई गोऐ थै। 9 कैलैकि ओ मैरै प्यारै साथी विश्वासिउओ, तुमै आमारी मैहनत और कौष्ट याद छ़ाड़ाई। आमुऐ एथीलै राची-दिनै काम धान्धौ कौरीयौ तुमु मांझ़िऐ परमेश्वरा री खुश-खौबरी रौ परचार कियौ आ कि तुमु मांझ़िऐ कासी माथै भी भार ना पौड़ा। 10 तुमै आपु ऊ गवाह ई, और परमेश्वर भी गवाह आ कि तुमु सारै विश्वासिऊ आइलै आमारौ च़ाल-च़लण किणौ पवित्र, धार्मिक और बेकसूर रौ आ 11 तुमै ज़ाणाई कि ज़िणौ बाब आपणै छ़ोहरु आइलै बरताव कौरा, तिणी ई आमै भी तुमु मांझ़िऐ हर एकी लै शिक्षा दिया थै, और शान्ति दिया थै, और सौमझ़ाई थै 12 ताकी तुमारै च़ाल-च़लणा कौरी परमेश्वरा लै इज़्ज़त मिला, ज़ुण तुमु आपणै राज़ा दी और महिमा दी औटावा सा। 13 एथीलै आमै भी परमेश्वरा रौ धन्यबाद सौदा कौरी कि ज़ैबै आमारै ज़ौरिऐ परमेश्वरा री खुश-खौबरी तुमुऐ शुणी, तुमुऐ सेऊ लोगु रौ नाईं बल्कि परमेश्वरा रौ वचन सौमझ़ियौ मानौ आ, ज़ो खौबर सौच़्च़ी परमेश्वरा री तौरफा कु आ। और सेऊ आपणै वचना रै ज़ौरिऐ, तुमारी ज़िन्दगी दी, काम कौरा सा, कैलैकि तुमै मसीह माथै विश्वास कौरा ई,। 14 एथीलै तुमै, ओ मैरै प्यारै साथी विश्वासिउओ, परमेश्वरा री तिऊं कलिसियाऊ री ज़िणी च़ाल-च़ालदै लागौ और इऊं यहुदिया दी मसीह यीशु दी आ, कैलैकि तुमुऐ भी आपणै लोगु कु तिणौ दु:ख झ़ेलौ थौ। 15 ज़ुणिऐ प्रभु यीशु और भविष्यवक्ता भी झ़ांगै और आमै भी सताऐ, और परमेश्वर तिऊंकु खुश नाईं, और सै सारै आदमी रौ विरोध कौरा ई, 16 और सै दुज़ी ज़ाती कु तिंउरै छ़ुटकारै लै बुशै लाइणै कु आमु रोका ई। इणै कौरी सै सौदा आपणै पापा रौ घौड़ौ भौरदै थाका ई लागी। और आबै आखरी दी परमेश्वर तिउंलै ज़रूर सौज़ा दैणै वाल़ौ आ। कलिसिया कु मिलणै री च़ाहा 17 ओ मैरै प्यारै साथी विश्वासिउओ, ज़ैबै आमै थोड़ै बौगता लै, तुमु आइलै नाईं थै पर आमै रोज़ तुमारै बारै दी सुंच़ा थै, ता आमुऐ बौड़ी च़ाहा कौरी तुमु कु मिलणा लै ओर भी भौरी कोशिश की। 18 एथीलै आमुऐ, खास कौरी मुंई पौलुसै, एकी बारै नाईं बल्कि कई बारै तुमु काऐ आशणौ च़ाऔ, पर शैतानै आमै तुमु काऐ दुबारौ आशणै नाईं दै। 19 आमारी आशा या बौड़ी खुशी या बौड़ाई रौ मुकुट कुण आ? का आमारै प्रभु यीशु रै आशणा रै बौगता दी तेसरै सामनै तुमै नाईं औन्दै? 20 आमारी बौड़ाई और बौड़ी खुशी तुमै ऐ ई। |
This work is licensed under Creative Commons Attribution-ShareAlike 4.0 License.