1 पतरस 5 - पहाड़ी महासुईपुराणेउ और नौऐं ज़वानु लै सलाह 1 कुछ़ औज़ौ भी आ ज़ो हाऊं तुमु स्याणेऊ लै बोलणौ च़ाहा ऊ, कैलैकि हाऊं भी तुमु ज़िणौ स्याणौ ऊ। मुंइऐ आपु सै दु:ख देखै ई ज़ो मसीहै भौरी पैहलै उठाऐ थै। ज़ेबी सेऊ दुजी बारै वापिस आशा लौ ता हाऊं भी तेसरी महिमा दी शामिल हुआ ऊ। एक साथी स्याणै रै रुपा दी हाऊं तुमु सौमझ़ावा ऊ। 2 कि परमेश्वरा री तिऐं खुंबल़ी री, ज़ो तुमु मांझ़िऐ आ, देखभाल़ कौरौ। और इणै दबाव कौरी नाईं पर परमेश्वरा री मौरज़ी रै मुताबिक खुशी कौरीऐ, और बुरी कौमाई लै नाईं पर मौना लाइऔ कौरौ। 3 ज़ेज़ै लोग तुमुकै ई सांबै औन्दै, तिऊं माथै हक्क नाईं देखाऔ पर तिउंलै आच़्छ़ै औनैणौ बौणौ। 4 ज़ेबी यीशु मसीह ज़ुण परधान रखवाल़ी कौरणै वाल़ौ पौगड़ौ हुआ लौ, ता तुमुकै महिमा रौ ताज़ मिला आ ज़ो केबी भी खराब नाईं औन्दौ। 5 इणी ई कौरीऐ नौंज़वानुऔ तुमै भी स्याणै लोगु रै अधीन रौऔ। तुमै सारै, निउलै हुइयौ एकी दुजै री सेवा कौरौ, “कैलैकि परमेश्वर घमण्डिऊ रौ विरोध कौरा आ, पर निउलै लोगु माथै कौरा आ बौड़ी दया।” 6 एथीलै परमेश्वरा रै तागत वाल़ै हाथा थालै निउलै हुइयौ रौऔ, ज़ेथ कौरी सेऊ तुमु ठीक बौगता दी बौड़ावा। 7 आपणी सारी फिकर तेस माथै टालौ, कैलैकि तेसकै तुमारौ ध्यान आ। 8 सबर कौरौ, खौबरदार रौऔ। कैलैकि तुमारौ विरोधी शैतान उंगुरणै वाल़ै ब्रागा ज़िणौ एज़ी ताका दी रौआ आ कि कास धेड़ियौ खाउलै। 9 विश्वासा ई मज़बूत हुईऔ, इणौ ज़ाणियौ तेसरौ सामनौ कौरौ कि तुमारौ भाई ज़ो दुनिया दी आ इणै दुःख ई लागै औन्दै सौइन्दै। 10 आबै परमेश्वर ज़ुण सारी बौड़ी दया रौ बाब आ, ज़ुणिऐ तुमै मसीह दी आपणी केबी ना खातम हुणै वाल़ी महिमा लै औटाऐ, तुमारै थोड़ै ई दु:ख उठाउणै बासिऐ आपु ई तुमु सिद्ध, पाक्कौ, तागती वाल़ौ कौरा। 11 सेऊ जुगा-जुगा झ़ांऊ शक्तिशाली रुपा दी राज़ कौरा। आमीन! आखरी ढाल 12 मुंइऐ इऐ छ़ोटी चिट्ठी तुमुलै लिखी आ और सिलवानुसा रै हाथा दी भेज़ी आ। हाऊं तेस मसीह दी एक विश्वासा रै लायक भाई ज़िणौ माना ऊ। मैरौ लिखणै रौ मकसद इयौ आ कि तुमुलै हिम्मत और भरोसौ देऊ कि ज़ो कुछ़ भी तुमै च़ौगुरदै ई लागै औन्दै सेऊ परमेश्वरा री सौच़्च़ी बौड़ी दया सा आ। एथीई दी पाक्कै रौऔ। 13 बेबीलौन शैहरा रै विश्वासी ज़ुण तुमु ज़िणै परमेश्वरा रै ज़ौरिऐ चुनै औन्दै ई, तुमुलै ढाल कौरा ई। मरकुस ज़ुण मुकै छ़ोहरु ज़िणौ आ, सेऊ भी तुमुलै ढाल बोला आ। 14 प्यारा दी एकी-दुजेऊ आइलै गौल़ै मिलियौ ढाल कौरौ। हाऊं प्राथना कौराऊ कि परमेश्वर तुमु सौभी लै शान्ति दिया ज़ुण तुमै मसीह दी ई। |
This work is licensed under Creative Commons Attribution-ShareAlike 4.0 License.