1 पतरस 2 - पहाड़ी महासुईज़िउंदौ पात्थर और च़ोखी प्रजा 1 एथीलै सारै रौंगा री दुश्मनी और छ़ल, कपट और ज़लन और बेइज़्ज़ती पोरु छ़ाड़ौ। 2 ज़िणौ नौऐं पैदै हुऐ औन्दै लोल़डै आपणी मां रै दुधा लै तरसा ई, तिणी ई तुमै भी परमेश्वरा रै वचन शिखणै री इच़्छ़ा कौरौ ताकी तुमै स्याणै बौणा। तैबै आखरी दी परमेश्वर तुमु दुनिया री बुरी च़िज़ा कु बौच़ावा सा। 3 कैलैकि ज़िणौ पवित्रशास्त्र बोला सा कि, तुमुऐ मैहसूस कौरीयौ ज़ाणौ आ कि प्रभु भौलौ आ। 4 आबै तुमै प्रभु काऐ आशै ई, ज़ुण ज़िउंदौ पात्थर आ, ज़ो आदमीऐ निकामौ ज़ाणौ आ, पर परमेश्वरा लै भौरी किम्मती और च़ुनौ औन्दौ आ। 5 और आबै तुमै ज़िउंदै पात्थर ई ज़ेथरौ आत्मिक घौर चाणना लै इस्तेमाल कौरा ई। तुमै पवित्र याजकु रै गुट भी ई और यीशु मसीह रै ज़ौरिऐ तुमै आत्मिक बौल़ी च़ौड़ावा ई ज़ेथ कौरी परमेश्वर खुश औआ आ। 6 इयौ तिणी आ ज़िणौ परमेश्वर पवित्रशास्त्रा दी बोला आ, “देखौ, हाऊं सिय्योना रै कुणै रौ च़ुनौ औन्दौ और भौरी किमत्ती पात्थर छ़ाड़ाऊ, और ज़ो कोई तेस माथै विश्वास कौरालौ, सेऊ केज़ी रीती कौरी शर्मिंदौ नाईं औन्दौ।” 7 एथीलै तुमुलै ज़ुण विश्वासी ई, सेऊ किमत्ती आ, पर अविश्वासिऊ लै सेज़ौ पात्थर ज़ेज़ौ बाड़ीउऐ निकामौ ज़ाणौ थौ, आबै कुणै रौ पात्थर बौणौ। 8 और पवित्रशास्त्र तौंइऐ बोला सा, “एस पात्थरा कौरी भौरी लोग ठोकर खाआ ई और इयौ सेज़ौ पात्थर आ ज़ेथ कौरी सै लोटणै भी ई।” सै इणै एथीलै लोटणै ई कैलैकि सै परमेश्वरा रै वचनु मानणा लै इनकार कौरा ई और एज़ी सौज़ा परमेश्वरै तिउंलै छ़ाड़ी थी। 9 पर तुमै एक चुनै औन्दै वंश, और राजपदधारी, याजकु रै समाज, और पवित्र लोग, और परमेश्वरा री आपणी ज़ौण-पौरज़ा ई, एथीलै कि ज़ुणिऐ तुमै न्यारै मांझ़िया कु आपणै नोखै प्याशै दी औटाऐ औन्दै ई, तेसरै गुण पौगड़ै कौरौ। 10 तुमै पैहलै परमेश्वरा रै लोग नाईं थै पर आबै परमेश्वरा री ज़ौण-पौरज़ा ई, तुमु माथै दया नाईं हुई थी पर आबै तुमु माथै दया हुई गोई आ। मसीही रौ काम 11 ओ मैरै प्यारै साथी विश्वासिउओ, हाऊं तुमु कु औरज़ कौराऊ कि तुमै आपुलै परदेशी और मुसाफिर ज़ाणीऔ तिऊं संसारिक विच़ारु कु ज़ो आत्मा कु युद्ध कौरा ई, बौच़ी रौऔ। 12 दुजी ज़ाती रै लोगु कु तुमु रौ च़ाल-च़लण आच़्छ़ौ च़ांई हुऔ। ताकी ज़ेज़ी-ज़ेज़ी बुशु दी तुमु बुरै ज़ाणीऔ बदनाम कौरा ई, सै तुमारै आच़्छ़ै कामा देखीयौ बौड़ी दया रै दिना दी परमेश्वरा री बौड़ाई कौरा। परमेश्वरा रै नुकुर 13 प्रभु री इज़्ज़त कौरना लै तुमै हर एक परधाना रै अधीन रौऔ, ज़ुण लोगुऐ ई चुनै औन्दै, और राज़ै रै अधीना दी एथलै रौऔ कैलैकि सेऊ सारेऊ कु बौड़ौ परधान आ। 14 आफसरा रै अधीन एथलै, कैलैकि सै राज़ै रै ज़ौरिऐ गान्दै काम कौरणै वाल़ेऊ लै सौज़ा दैणा लै, और आच़्छ़ै काम कौरणै वाल़ेऊ री बौड़ाई कौरना लै तेसरै भेज़ै औन्दै ई। 15 परमेश्वर च़ाहा सा की तुमै आच़्छ़ै काम कौरौ ताकी तुमै तिऊं मुर्ख लोगु आपणै विरोधा दी आरोप लाइणै कु रोका, ज़ुण परमेश्वर नाईं ज़ाणदै। 16 तुमारौ च़ाल-च़लण आज़ाद लोगु ज़िणौ ता हुआ पर तुमै आपणी आज़ादी रौ इस्तेमाल बुराई च़ोरना लै नाईं पर परमेश्वरा रै सेवका रै रुपा दी कौरौ। 17 सारेऊ री इज़्ज़त कौरौ, आपणै सारै साथी विश्वासिऊ आइलै प्यार कौरौ, परमेश्वरा कु डौरौ, राज़ै री इज़्ज़त कौरौ। मसीह आमारौ आदर्श 18 ओ सेवको, हर रौंगा रै डौरा आइलै आपणै मालिका रै अधीन रौ, ना सिरफ भौलेऊ और ना निउलेऊ रै, पर काठेऊ रै भी। 19 अगर कुण आदमी एज़ी वज़ाह कु सौबरा कौरी दु:ख भोगा आ और गलत सहन कौरा सा कैलैकि सेऊ सौमझ़ा सा कि परमेश्वरा कै इणौ आच़्छ़ौ लागा सा ता इऐ भौली बूश आ। 20 कैलैकि अगर तुमुऐ गौलती कौरीऔ मार खाई आ और सौबर छ़ाड़ी आ, ता एथदी का बौड़ाई री बूश आ? पर अगर आच़्छ़ौ काम कौरीऔ दुःख उठाऔ और सौबर छ़ाड़ी आ ता एऊ परमेश्वरा कै आच़्छ़ौ लागा आ। 21 और तुमै एथीलै औटाई भी गौऐ, कैलैकि मसीह ऐ भी तुमारी ताइंऐ दुःख उठाइयौ तुमुलै एक गवाही देई गोई आ, कि तुमुऐ भी तिणी ई कौरणौ च़ांई ज़िणौ तिणीऐ कियौ आ। 22 ना ता तिणीऐ पाप किऔ, और ना तेसरै मुंआ कु गलत बूश निकल़ी। 23 सेऊ गाल़ी शुणियौ गाल़ी नाईं दिआ थौ, और दु:ख उठाइयौ कासी लै भी धौमकी नाईं दिआ थौ, पर आपु सौच़्च़ै फैसलै कौरणै वाल़ै रै हाथा दी सौंभाल़ा थौ। 24 सेऊ आपु ई आमारै पाप आपणै शरीरा माथै नीईंयौ क्रुसा माथै च़ौड़ी गौ, ज़ेथ कौरी आमै पापा दी मौरीयौ धार्मिकता लै ज़िन्दगी बितावा, तेसी रै मार खाणै कु तुमै च़ांगै हुऐ ई। 25 तुमै पैहलै भौटकी औन्दी भेरीऊ ज़िणै थै, पर आबै आपणै प्राणा री भेराल़डु और रखवाल़ै यीशु काऐ वापिस आशी गौऐ। |
This work is licensed under Creative Commons Attribution-ShareAlike 4.0 License.