1 यहुन्ना 5 - पहाड़ी महासुईधौतरी माथै ज़ितणौ 1 ज़ास आदमी रौ इणौ विश्वास आ कि यीशु ई मसीह आ, सेऊ परमेश्वरा रौ छ़ोहरु आ। और ज़ुण-कुण परमेश्वरा आइलै प्यार छ़ाड़ा सा। सेऊ तिऊं ओरीऊ आइलै भी प्यार छ़ाड़ा सा ज़ुण तेसरै लोल़डै ई। 2 ज़ेबी आमै परमेश्वरा आइलै प्यार कौरी ई और तेसरै हुकम मानी ता इणै कौरी आमै ज़ाणी कि आमै परमेश्वरा री सन्ताना आइलै प्यार कौरी ई। 3 आमै परमेश्वरा रै हुकम मानियौ इणौ साबित कौरी कि आमै परमेश्वरा आइलै प्यार कौरी ई। और तेसरै हुकम मानणै कठिण नाईं ई। 4 कैलैकि हर एक ज़ुण परमेश्वरा रौ छ़ोहरु आ, सेऊ धौतरी दी ज़ितौ औन्दौ आ। और सेऊ ज़ितणौ ज़ो धौतरी माथै ज़िता आ, सेऊ आमारौ विश्वास आ। 5 धौतरी माथै ज़ितणै वाल़ौ कुण आ? सिरफ सेऊ ज़ासरौ इणौ विश्वास आ कि यीशु ई परमेश्वरा रौ छ़ोहरु आ। यीशु मसीह रै बारै दी चीन गवाही 6 एऊ सा सेऊ यीशु मसीह आ ज़ुणिऐ पाणी कौरी बपतिस्मौ नींऔ और बासिऐ ज़ेबी सेऊ मौरौ ता तेसरौ लोऊ बौऔ, सेऊ ना सिरफ बपतिस्मा निणा लै बल्कि क्रुसा माथै मौरणा लै आशौ थौ। 7 और ज़ो गवाही दिया सा, सै पवित्र आत्मा आ। कैलैकि पवित्र आत्मा सौदा सौच़्च़ बोला आ। 8 गवाही दैणै वाल़ै चीन ई आत्मा, पाणी और लोऊ। और चिया एकी बुशा दी मंज़ूर ई। 9 ज़ैबै आमै आदमी री गवाही मानी ई, ता परमेश्वरा री गवाही ता एथकु बौड़ियौ आ। और परमेश्वरा री गवाही इणी आ, कि तिणीऐ आपणै छ़ोहरु रै बारै दी गवाही देई आ। 10 ज़ुण परमेश्वरा रै छ़ोहरु माथै विश्वास कौरा आ, सेऊ आपु दी परमेश्वरा री गवाही छ़ाड़ा आ। ज़ुणिऐ परमेश्वरा माथै विश्वास नाईं कियौ तिणीऐ सेऊ झ़ुठौ चाणौ आ, कैलैकि तिणीऐ तिऐं गवाही माथै विश्वास नाईं कियौ ज़ो परमेश्वरै आपणै छ़ोहरु रै बारै दी देई आ। 11 और सै गवाही एज़ी आ कि परमेश्वरै आमुकै सौदा री ज़िन्दगी देई आ, और इऐ परमेश्वरा रै छ़ोहरु रै ज़ौरिऐ आ ज़ासकु आमुलै सौदा री ज़िन्दगी मिला आ। 12 ज़ासकै छ़ोहरु आ, तेसकै सौदा री ज़िन्दगी आ। और ज़ासकै परमेश्वरा रौ छ़ोहरु नाईं आ, तेसकै सौदा री ज़िन्दगी भी नाईं आ। सौदा री ज़िन्दगी 13 मुंइऐ तुमै, ज़ुण परमेश्वरा रै छ़ोहरु रै नावां माथै विश्वास कौरा ई, एथीलै लिखौ आ ताकी तुमुकै पौतौ लागा कि सौदा री ज़िन्दगी तुमारी आ। 14 और आमुकै परमेश्वरा काऐ ज़ो हिम्मत हुआ, सै एज़ी आ। कि अगर आमै कुछ़ तेसरी मौरज़ी कौरी मांगी ई, ता सेऊ आमारी शुणा आ। 15 ज़ैबै आमै ज़ाणी कि ज़ो कुछ़ आमै मांगी परमेश्वर आमारी शुणा, ता इणौ भी ज़ाणी कि ज़ो कुछ़ आमुऐ तेसकु मांगौ आ, सेऊ मिलौ आ। 16 अगर कुण आपणौ विश्वासी भाई इणै पाप कौरदै देखा लै ज़ेथरौ नतीज़ौ मौत नाईं आ, ता औरज़ कौरौ, कि परमेश्वर तेस तिऊं कालै, ज़ुणिऐ इणौ पाप कियौ आ, ज़ेथरौ नतीज़ौ मौत नाईं आ, ज़िन्दगी दिया आ। पाप इणौ भी हुआ ज़ेथरौ नतीज़ौ मौत आ। तेथरै बारै दी हाऊं औरज़ कौरना लै नाईं बोलदौ। 17 सारै बुरै काम पाप ई, पर इणै पाप भी ई ज़ेथरौ नतीज़ौ मौत नाईं आ। 18 आमै ज़ाणी कि ज़ुण परमेश्वरा रै छ़ोहरु ई, सै पाप कौरदै नाईं थाकदै लागी। पर ज़ुण परमेश्वरा रै छ़ोहरु यीशु रै छ़ोहरु ई, तेस सेऊ बौच़ाई छ़ाड़ा आ, और सेऊ बुरौ शैतान तेस छ़ुईं नाईं बौल़दौ। 19 आमै ज़ाणी कि आमै परमेश्वरा कु ई, और सारौ सण्सार तेस बुरै शैताना रै वशा दी आ। 20 आमै इणौ भी ज़ाणी ई परमेश्वरा रौ छ़ोहरु यीशु मसीह इऐं दुनिया दी आशी गौ आ, और तिणीऐ आमुकै औकल आ देई ऐन्दी ताकी आमै तेस सौच़्च़ै परमेश्वर ज़ाणा। और आमै परमेश्वरा दी ज़ो सौच़्च़ाई आ, मतलब तेसरै छ़ोहरु यीशु मसीह दी रौई ई। सौच़्च़ौ परमेश्वर और सौदा री ज़िन्दगी एज़ी आ। 21 ओ लोल़डेउओ, तुमै आपु मुर्तिऊ कु बौच़ी रौऔ। |
This work is licensed under Creative Commons Attribution-ShareAlike 4.0 License.