1 कुरि 9 - पहाड़ी महासुईप्रेरितु रै हक्क और काम 1 का हाऊं आज़ाद नाईं ऊ? का हाऊं प्रेरित नाईं ऊ? का मुंइऐ यीशु ज़ुण आमारौ प्रभु आ नाईं देखौ? का तुमै प्रभु दी मैरै चाणै औन्दै नाईं आ? 2 अगर हाऊं दुजेऊ लै प्रेरित नाईं, तैबै भी तुमुलै ता आसती ऊ। कैलैकि तुमारौ मसीह माथै विश्वास कौरणौ इणौ साबित कौरा सा कि हाऊं प्रेरित ऊ। 3 ज़ुण मुं पौरखा ई, तिउंलै मैरौ ज़वाब एज़ौ आ। 4 का आमुलै खाणै-पिणै रौ हक्क नाईं आ? 5 का आमुलै एज़ौ हक्क नाईं आ, कि कास मसीह छ़ोटुड़ी आइलै शादी कौरीयौ तिंया आइलै रौई, ज़िणौ दुजै प्रेरित और प्रभु रै भाई याकूब, यहुदा और पतरस बोलाई। 6 का सिरफ हाऊं और बरनबास ई इणै, ज़ुण आपु आपणी कौमाई कौरना लै मज़बूर ई? 7 सेना दी इणौ कुण हुआ ज़ुण आपणै ई खौरच़ै माथै एक फौज़ी रै रुपा दी काम कौरा? मतलब कि इणौ हुआ कुण कि ज़ुण अंगुरा रौ बौगिच़ौ लाइऔ तिदरा कु अंगूर ना खा? और कुण ऐ आ इणौ ज़ुण भेरी च़ारियौ तिऊंरौ दूध ना पिया? 8 हाऊं इऊं बुशु लोगु रै तरिकै कौरीऐ नाईं बोलदौ। मुसा रै नियम भी एज़ी बुशै बोलाई। 9 कैलैकि मुसा रै नियमा दी इणौ आ लिखौ औन्दौ, “बाइंदी बारै बौल़दा रै मुं नाईं च़ांई बानणै।” का परमेश्वरा कै सिरफ बौल़दा री ई फिकर कौरा सा? 10 या खास कौरीऐ आमुलै ई बोला सा? ओ, आमुलै ई लिखौ औन्दौ, कैलैकि ठीक आ कि बौल़दा जोचणै वाल़ौ आशी कौरीऐ बौल़द जोचा और बाइणै वाल़ौ भागीदार भी आशी कौरीऐ हौल़ च़लावा। 11 आमुऐ तुमु मांझ़िऐ आत्मिक च़िज़ै बौई, एथीलै एज़ी कोई बौड़ी बूश नाईं आसती कि तुमु कु शरीर वाल़ी च़िज़ेऊ री फौसल लौई। 12 अगर दुजेऊ रौ तुमु माथै हक्क आ, तैबै का तुमु माथै आमारौ हक्क तिऊंकु ज़ादौ नाईं आसतौ? तैबै भी आमुऐ एस हक्का रौ इस्तेमाल नाईं कियौ। पर आमुऐ सब कुछ़ सौबरा कौरीऐ सहन कौरौ आ ताकी मसीह री खुशी री खौबरी रै परचारा दी कोई रुकावट ना हुआ। 13 का तुमै नाईं ज़ाणदै ज़ुण परमेश्वरा रै घौरा दी सेवा कौरा ई, सै परमेश्वरा रै घौरा कु खा पिया ई। और ज़ुण बेदी री सेवा कौरा ई, सै बेदी आइलै भागीदारी हुआई? 14 इणै कौरीऐ प्रभु रै भी ठहराऔ औन्दौ आ कि ज़ो लोग खुशी री खौबर शुणाउवाई तेसरौ खौरच़ौ भी खुशी री खौबरी कौरीऐ औआ। 15 पर मुइंऐ इऊं हक्का रौ इस्तेमाल नाईं कियौ और एस हाऊं एथरी ताइंऐ नाईं ऊ लिखदै लागौ औन्दौ कि आबै तुमै मुलै इणौ कौरौ। हाऊं च़ाऊ रौंगै मौरुलै पर हाऊं एज़ै गर्वा कु दूर नाईं औणौ च़ांहादौ। 16 अगर हाऊं खुशी री खौबर शुणाऊं ता मुलै कुछ़ भी गर्वा री बूश नाईं, कैलैकि एऊ ता मैरौ फर्ज़ आ। अगर हाऊं खुशी री खौबर नाईं शुणाउलौ, ता मुलै फिटकार आ! 17 अगर हाऊं आपणी मौरज़ी कौरी परचार कौराऊ ता मुलै तेथरी मज़दुरी मिला सा, पर अगर हाऊं परचार आपणी मौरज़ी कौरी नाईं कौरदौ ता एऊ सिरफ आपणी ज़िम्मेबारी पुरी कौरणी आ। 18 ता मेरी केज़ी मज़दुरी आ? एऊ कि हाऊं खुशी री खौबरी रौ परचार मुफ्तिऐ कौरुलौ, इदरा झ़ांऊ कि खुशी री खौबरी दी ज़ो मैरौ हक्क आ तेस भी हाऊं पुरी रीती कौरी इस्तेमाल नाईं कौरु। 19 कैलैकि सौभी कु आज़ाद हुइयौ भी हाऊं सौभी रौ सेवक बौणौ, एथीलै कि हाऊं ज़ादै कु ज़ादै लोगु मसीह काऐ आणु। 20 हाऊं यहुदिऊ लै यहुदी बौणौ कि हाऊं यहुदिऊ मसीह दी आणु। ज़ो लोग यहुदी नियमा रै अधीन थै दौबै औन्दै, तिऊं मसीह काऐ आणना लै हाऊं नियमा रै अधीन हुऔ। असली दी ता हाऊं नियमा रै अधीन नाईं थौ। 21 इणी ई ज़ेबी हाऊं दुज़ी ज़ातीऊ आइलै थौ ज़ुण यहुदिऊ रै नियम नाईं मानदै, ता हाऊं तिऊं ज़िणौ बौणौ ताकी तिऊं मसीह दी आणु। एथरौ इणौ मतलब नाईं आसतौ कि हाऊं परमेश्वरा रै नियम नाईं मानदौ बल्कि हाऊं सौदा मसीह रै हुकम माना ऊ। 22 और ज़ेबी हाऊं तिऊं आइलै थौ ज़ुण विश्वासा दी कमज़ोर ई, ता मुइंऐ तिऊं आइलै तिणी बरताव कियौ ज़िणौ सै कौरा थै। ताकी हाऊं तिउंरी मसीह पिछ़ु हाण्डणा लै मज़द कौरु। हाऊं सब लोगु लै सब कुछ़ बौणौ ताकी हाऊं किणै ना किणै कोरीऐ कुछ़ लोगु रौ छ़ुटकारौ कौराऊ। 23 हाऊं एस सब कुछ़ मसीह री खुशी री खौबरी रौ परचारा लै कौराऊ ताकी मुकै सै आशीषै मिला ज़ेथरौ वायदौ परमेश्वरै आ कियौ औन्दौ। मसीह दी फेट 24 का तुमै नाईं ज़ाणदै कि फेटै रै मुकाबलै दी ता सब फेटे मारा ई, पर इनाम एक ई आदमी निआं सा? तुमै इणी ई फेटै मारौ कि तुमै ज़िता। 25 हर एक पहलवान सारौ कुछ़ सौबर कौरा सा। सै ता एक मुरझ़ाणै वाल़ै ताज़ ज़ितणा लै इणौ सब कुछ़ कौरा ई, पर आमै ता तेस ताजा लै कौरी सा ज़ो केबी ना मुरझ़ाअंदौ। 26 एथीलै हाऊं ता एज़ी ई रीती कौरीऐ फेटै मारा ऊ पर बिणा मतलबा री फेटै नाईं मारदौ। हाऊं भी इणी रीती कौरीऐ मुकुऐ कौरीऐ पिटिआ ऊ, पर तेस बाशीऐ नाईं ज़ो बागुरा दी मुकुऐ लाइयौ पिटिआ सा। 27 हाऊं आपणौ शरीर आपणै बौशा दी आणाऊ, ताकी इणौ ना च़ांई हुऔ कि ओरीउलै परचार कौरीयौ हाऊं केज़ी रीती माथै निकामौ बौणु। |
This work is licensed under Creative Commons Attribution-ShareAlike 4.0 License.