1 कुरि 7 - पहाड़ी महासुईशादी रै बारै दी सवाल 1 आबै हाऊं तुमारी बुशु रौ ज़वाब दियाऊ ज़ो तुमुऐ आपणी चिट्ठी दी लिखौ थौ। तुमुऐ पुछ़ौ थौ कि, “का एक आदमी लै इणौ आच़्छ़ौ आ कि सेऊ शादी ना कौरा?” 2 पर मेरी सलाह इऐ आ कि गान्दै कामा कु बौच़णा लै हर एक आदमी री आपणी बोउटी हुआ, और हर एक छ़ेउड़ी रौ बोउटौ च़ांई हुऔ। 3 बोउटौ आपणी बोउटी रौ हक्क पुरौ कौरा। और तिणी ई बोउटी भी आपणै बोउटा रौ हक्क पुरौ कौरा। 4 बोउटी रौ आपणै शरीरा माथै कोई हक्क नाईं पर तिंआरै बोउटै रौ हक्क आ। तिणी ई बोउटै रौ भी आपणै शरीरा माथै कोई हक्क नाईं, पर तेसरी बोउटी रौ आ। 5 तुमै एकी दुजै कु अलग नाईं रौ। पर सिरफ आपु मांझ़िऐ चौपड़ुइयौ कुछ़ बौगता झ़ांऊ आपणी सौमझ़िऐ प्राथना लै अलग रौ तेथ बासिऐ रौ एकी साथाई। इणौ ना च़ांई हुऔ कि तुमारै बिण सबरा री वज़ाह कु शैतान तुमु मुसीबता दी पा। 6 पर हाऊं ज़ो इणौ बोलदै ऊ लागौ औन्दौ, इऐ सिरफ मेरी सलाह सा ना कि हुकम। 7 हाऊं ता इणौ च़ाहा ऊ कि ज़िणौ हाऊं ऊ तिणी सारै आदमी रौआ। पर हर एक आदमी लै परमेश्वरा री तौरफा कु अलग-अलग वरदान ई मिलै औन्दै। कासलै केज़ै रौंगा रौ और कासलै केज़ै रौंगा रौ। 8 आबै हाऊं तिउंलै बोलाऊ, ज़ुण बिण शादी रै ई और ज़ुण विधवा ई कि तिऊं लै इणौ ई रौइणौ आच़्छ़ौ आ ज़िणौ हाऊं आ। 9 पर अगर सै सबर नाईं कौरी सौका लै, ता सै शादी कौरालै। कैलैकि शादी कौरणी बुरै बिच़ारा कु आच़्छ़ी आ। 10 ज़ासरी शादी हुई गोई आ, तिउंलै हाऊं नाईं पर प्रभु हुकम दिआ कि बोउटी आपणै बोउटै कु अलग ना हुआ। 11 और ज़ैबै अलग भी हुआ लै बिणा शादीऐ रौएऊ। या ता पैहलकै बोउटै आइलै डेवेऊ-और ना बोउटौ आपणी बोउटी कु अलग रौआ। 12 आबै हाऊं तिऊं विश्वासिऊ लै बोलाऊ ज़ुणिऐ अविश्वासी लोगु आइलै शादी की आ। इयौ हुकम मुकै प्रभु कु नाईं मिलौ: अगर कासी विश्वासी भाई री छ़ेउड़ी आमारै प्रभु माथै विश्वास नाईं कौरदी पर आपणै बोउटै आइलै रौउणौ च़ाहा सा ता तिणी विश्वासी भाईऐ सै पोरु नाईं च़ांई गाड़नी। 13 ज़ास छ़ेउड़ी रौ बोउटौ भी विश्वास नाईं छ़ाड़ा लौ, और आपणी बोउटी आइलै रौइणा लै खुश औलौ। तियांऐ आपणौ बोउटौ नाईं च़ाई छ़ाड़णौ। 14 कैलैकि इणौ बोउटौ ज़ुण विश्वास नाईं कौरदौ, सेऊ आपणी बोउटी रै ज़ौरिऐ पवित्र कौरीया। और इणी बोउटी ज़ो विश्वास नाईं कौरदी, सै आपणै बोउटै रै ज़ौरिऐ पवित्र कौरीया सा। अगर इणौ ना हुआ थौ ता तुमारी सन्तान अशुद्ध रौउणी थी; पर आबै सै परमेश्वरा लै अलग कौरी गौऐ ई। 15 पर ज़ो आदमी विश्वास नाईं कौरदौ, अगर सेऊ अलग औलौ ता अलग औणै दैऔ, इणी हालतीऐ कोई भाई या बौइण बानणा दी नाईं आ। कैलैकि परमेश्वरै आमै मेल मिलापा कौरना लै ई औटाऐ औन्दै। 16 का पौतौ आ इणौ भी हुई सौका आ कि छ़ेउड़ी आपणै बोउटै रै छ़ुटकारै री वज़ाह बौणा और बोउटौ आपणी बोउटी रै छ़ुटकारै री वज़ाह बौणा। ज़िणौ परमेश्वर औटावा सा तिणौ च़ालौ 17 परमेश्वरै ज़ुण ज़िणै हालता दी छ़ाड़ै औन्दै और ज़िणै औटाऐ ई, सेऊ तेथी दी बौणी रौआ। सारी कलिसिया लै मैरौ एज़ौ हुकम आ। 18 अगर कासी रौ यीशु मसीह माथै विश्वास कौरदी बारै खतनौ औलौ कियौ औन्दौ ता सेऊ इऐं बूश ना च़ोरा और अगर तेसरौ खतनौ नाईं हुऔ औलौ ता सेऊ आपणौ खतनौ ना कौरावा। 19 कैलैकि ना खतना वाल़ौ कुछ़ आ और ना बिणा खतनै वाल़ौ, पर परमेश्वरा रौ हुकम मानणौ ई सारेऊ कु ज़ुरुरी आ। 20 हर एक आदमी ज़ो ज़ेज़ी हालती दी आ औटाऔ औन्दौ सेऊ सेज़ी हालती दी रौआ। 21 अगर तू सेवका री हालती दी आ औटाऔ औन्दौ ता फिकर ना कौरै। पर अगर तू आज़ाद हुई बौल़ा ई, ता इणौ ई काम कर। 22 कैलैकि ज़ो सेवा कौरणै री हालती दी प्रभुऐ औटाऔ औन्दौ आ, सेऊ प्रभु रै आज़ाद कियौ औन्दौ आ। तिणौ ई ज़ो आज़ादी री हालती आ औटाऔ औन्दौ, सेऊ मसीह रौ सेवक आ। 23 परमेश्वरै तुमै बौड़ी किमत्ती देइयौ ई खरीदै औन्दै। लोगु रै सेवक ना बौणौ, पर परमेश्वरा रै बौणौ। 24 ओ मैरै प्यारै साथी विश्वासिउओ, ज़ुण कुण ज़ेज़ी हालती आ औटाऔ औन्दौ, तिणीऐ सेज़ी हालती दी परमेश्वरा आइलै रौ। बिण ब्याई और विधवाऐ 25 बिण ब्याई छ़ोटुड़ी रै बारै दी मुकै प्रभु यीशु रै कोई भी हुकम नाईं मिली, पर विश्वास वाल़ौ हुणा लै ज़िणी दया प्रभुऐ मुं माथै की आ, तेथी रै मुताबिक हाऊं तुमुलै हुकम दिआऊ। 26 आज़कल विश्वासिऊ लै काट्ठौ बौगत आ एथीलै मेरी सौमझ़िऐ इणौ आच़्छ़ौ आ कि आदमी ज़िणौ आसा सा तिणी रौआ। 27 अगर तुमै शादी शुदा ई ता आपणी बोउटी कु अलग हुणै री कोशिश ना कौरौ। और अगर तू शादी-शुदा नाईं ता आपुलै बोउटी लोड़दै नाईं डेऊ। 28 पर अगर तू शादी कौरालौ और अगर बिण ब्याई छ़ोटूड़ भी शादी कौरा ली, ता कुछ़ भी पाप नाईं आसतौ। पर इणेउऐ आपणी ज़िन्दगी दी दु:ख जा ई झेलणै, एथीलै हाऊं तुमु तिऊं दु:खा कु बौच़ाउणौ च़ाहा ऊ। 29 ओ मैरै प्यारै साथी विश्वासिउओ, हाऊं इणौ बोलाऊ कि आमुकै इऐं दुनिया दी ज़ादौ बौगत नाईं आ बौच़ौ औन्दौ, एथरी वज़ाह कु इणी झ़ौरी ना कौरौ कि आमुकै बोउटी आ या नाईं, पर प्रभु री सेवा कौरणै रै बारै दी सुंच़ौ। 30 और लेरणै वाल़ै इणै हुऔ, मानौ कि सै केबी भी लेरदै नाईं। और खुशी कौरणै वाल़ै इणै हुऔ, मानौ कि सै कोई खुशी ना कौरा। और खरीदणै वाल़ै इणै हुऔ कि, मानौ कि तिऊं कै कुछ़ भी नाईं आसतौ। 31 और ज़ो कुछ़ आमुकै इऐं दुनिया दी आ, आमुऐ सै च़िज़ै भौरी खास नाईं च़ांई सौमझ़णी। कैलैकि इऐ च़िज़ै सौदा लै नाईं रौउंदी। 32 पर हाऊं इणौ च़ाहा ऊ कि तुमुलै फिकर ना हुआ। बिणा शादी रौ आदमी प्रभु री सेवा री फिकरा दी रौआ सा कि प्रभु किणै कौरी खुश छ़ाड़ुलै। 33 पर शादी शुदा आदमी धौतरी री बुशु री फिकरी दी रौआ कि आपणी बोउटी किणै कौरीऐ खुश छ़ाड़ुलै। 34 शादी शुदा और बिण शादी शुदा छ़ेवड़िउ दी भी फर्क आ: बिण शादी शुदा वाल़ी छ़ोटी प्रभु री सेवा री फिकरी दी रौआ कि सै शरीर और आत्मा दी दुइया दी पवित्र च़ांई, पर शादी शुदा वाल़ी छ़ेउड़ी दुनिया री च़िज़ु री फिकरी दी लागी रौआ सा कि आपणौ बोउटौ किणै कौरीऐ खुश छ़ाड़ी। 35 हाऊं इऐं बूश तुमारी भौलाई लै बोलाऊ ना कि तुमु फौसाउणा लै, इणौ कि एथीलै ज़िणौ शोभा-ढौभा आ तिणी ई च़ांई कौरणौ, कि तुमै एकी मौना हुइयौ प्रभु री सेवा दी लागी रौआ। 36 अगर कासकै इणौ लागा कि आपणी छ़ोटुड़ी री शादी दी बेरी पाइणै रै ज़ौरिऐ तिंया आइलै गलत आ कौरदै लागौ औन्दौ, कैलैकि तियांरी उमर आ डेउंदै लागी ऐन्दी, ता सेऊ तिणी कौरालौ ज़िणौ तेसकै ठीक लागा सा। सेऊ तिऐं शादी कौरणै दिया लौ एऊ कोई पाप नाईं आसतौ। 37 पर ज़ुण मौना दी पाकौ रौआ और तेसकै ज़रूरत नाईं औली, यानी की आपणी इच़्छ़ा काबु कौरालौ, और आपणै मौना दी इऐ बूश ठाणी एरी कि आपणी बिण ब्याई छ़ोटी री शादी नाईं कौरदौ, ता सेऊ आच़्छ़ौ कौरा सा। 38 एथीलै कि ज़ुण आपणी छ़ोटुड़ी री शादी कौरालौ, सेऊ आच़्छ़ौ कौरा सा, और ज़ुण शादी नाईं कौरदौ, सेऊ तेथकु भी आच़्छ़ौ कौरा सा। 39 ज़ेबी झ़ांऊ कास छ़ेउड़ी रौ बोउटौ ज़िउंदौ रौआ सा, तेबी झ़ांऊ सै तेस आइलै बानुई ऐन्दी आ, पर अगर तिंआरौ बोउटौ मौरी जाआ लौ ता सै ज़ास आइलै च़ाहा ली शादी कौरी सौका सा, पर सिरफ मसीह विश्वासी आइलै। 40 पर अगर ज़िणी आसा सा तिणी ई रौआ ली ता मैरै बिच़ारा दी ओर भी आच़्छ़ौ आ। और हाऊं सौमझ़ाऊ कि परमेश्वरा री आत्मा मुंदी भी आ। |
This work is licensed under Creative Commons Attribution-ShareAlike 4.0 License.