1 कुरि 5 - पहाड़ी महासुई

कलिसिया दी बुराई

¹ मुंइऐ लोग इणै बोलदै शुणै ई कि तुमु मांझ़िऐ कुछ़ लोग गान्दै काम कौरा ई यानी के इणै गान्दै काम ज़ो अविश्वासी लोगु मांझ़िऐ भी नाईं औन्दै, कि एक आदमी आपणै बाबा री छ़ेउड़ी आपुलै छ़ाड़ा।

² और तुमै शोक ता नाईं कौरदै, ज़िणै कौरी इणै कामा कौरणै वाल़ौ तुमु मांझ़िया कु पोरु गाड़िया, पर घमण्ड कौरा ई।

³ हालांकी हाऊं तिऐ तुमु आइलै नाईं थौ पर आत्मा रै भाव तुमु आइलै हुइयौ मानौ ज़िणौ तुमु आइलै हाज़िर ऊ। इणै काम कौरणै वाल़ै रै बारै दी एज़ौ हुकम देई ऐरौ आ

⁴ कि ज़ैबै तुमै और मेरी आत्मा आमारै प्रभु यीशु री शक्ति आइलै कौठै हुआ ता इणौ आदमी आमारै प्रभु यीशु रै नावां कौरी

⁵ शरीरा रै नाशा कौरना लै शैताना कै सौंभाल़ा, ताकी तेसरी आत्मा प्रभु यीशु रै दिना दी छ़ुटकारौ पा।

⁶ घमण्ड कौरणौ बन्द कौरौ। का तुमै नाईं ज़ाणदै ज़िणौ थोड़ौ ज़ेई संज़ेड़ौ पुरौ मुछ़ौ औन्दौ पिठौ ओसारा, तिणी ई अगर एक आदमी लै पाप कौरणै री इज़्ज़ाज़त दिया लै ता ज़ल्दी सारै लोगु माथै पाप कौरणै रौ असर पौड़ा सा।

⁷ आपकु पुराणौ संज़ेड़ौ गाड़ीयौ तुमै शुद्ध हुऔ कि नौउवौ मुछ़ौ औन्दौ पिठौ बौणौ ताकी तुमै बिणा संज़ेड़ै वाल़ै हुआ। कैलैकि आमारौ भी फसह रौ साज़ौ, ज़ो यीशु मसीह आ, बौल़ी हुऔ आ।

⁸ एथीलै आशौ, आमै साज़ै दी खुशी मौनाई, ना ता पुराणै संज़ेड़ै कौरी और ना बुराई और ना दुष्टता रै संज़ेड़ा कौरी, पर सीधाई और सौच़्च़ाई री बिणा संज़ेड़ै री रोटी कौरी

⁹ मुंइऐ आपणी पिछ़ली चिट्ठी दी तुमुलै लिखौ आ गान्दै कामा कौरणै वाल़ेऊ री संगती दी ना रौएऊ।

¹⁰ इणौ नाईं कि तुमै बिल्कुल इऐं धौतरी रै गान्दै कामा कौरणै वाल़ेऊ री, या लोभिऊ री, या धोखौ दैणै वाल़ेऊ री, या मूर्ती पुज़णै वाल़ेऊ री संगती नाईं कौरौ। कैलैकि एज़ी हालतीऐ ता तुमु धौतरी कु निकुल़नौ ई जा।

¹¹ पर मैरौ बोलणौ इणौ आ कि अगर कुण आपुलै विश्वासी बोलीयौ, गान्दै काम, या लोभी, या मूर्ती पुज़णै वाल़ौ, या गाल़ी दैणै वाल़ौ, या सुरी पिणै वाल़ौ, या बुराई कौरणै वाल़ौ औलौ ता तेसरी संगती नाईं कौरणी। इदरा झ़ांऊ कि इणै आदमी आइलै रोटी भी ना खाइयौ।

¹² कैलैकि इऐ मेरी ज़िम्मेबारी नाईं आसती कि हाऊं अविश्वासी लोग गुनाहगार चाणु। पर पाक्कै कौरीयौ तिऊं धौमकाऊ ज़ुण तुमारी कलिसिया रै लोग ई।

¹³ पर अविश्वासिऊ रौ फैसलौ परमेश्‍वर कौरा सा। पवित्रशास्त्र बोला आ, तेस गान्दै काम कौरणै वाल़ौ आपु मांझ़िऐ कु पोरु गाड़ौ।