1 कुरि 3 - पहाड़ी महासुईकलिसिया दी गुटबाज़ी री बुराई 1 ओ मैरै प्यारै साथी विश्वासिउओ, ज़ेबी हाऊं तुमु आइलै थौ तेबी हाऊं तुमुकै गैहरी शिक्षा नाईं शिखाई बौल़ौ, ज़िणौ आत्मिक लोगु कै शिखावा थौ। मुइंऐ तुमु आइलै इणी बुशै लाइणी पौड़ी ज़िणै कि तुमै इऐं दुनिया रै ई और मसीह ज़िन्दगी दी लोल़डै ई। 2 सेज़ै बौगतै मुंइऐ तुमुलै परमेश्वरा रै वचना कु आसान शिक्षा शिखाई, ज़िणौ एक आदमी लोल़डै लै दूध दिया सा। मुइंऐ परमेश्वरा रै वचना कु गैहरी शिक्षा नाईं शिखाई ज़ो नाज़ ज़िणी आ, कैलैकि तुमै तेथलै त्यार नाईं थै। 3 कैलैकि इबी झ़ाऊं तुमै संसारिक लोगु ज़िणी ज़िन्दगी ज़िआ ई, एथीलै कि ज़ैबै तुमु दी ज़लन और लौड़ाई-झ़ौगड़ै ई तैबै का इणौ साबित नाईं कौरदै कि तुमै संसारा रै ई? और तुमारौ च़ाल-च़लण इणै लोगु ज़िणौ आ ज़ुण प्रभु रै नाईं। 4 कैलैकि ज़ैबै एक बोला सा, “हाऊं पौलुसा रौ ऊ” और दुजौ, “हाऊं अपुल्लोसा रौ ऊ” ता का तुमै संसारिक लोगु ज़िणै नाईं? 5 अपुल्लोस का सा? और का सा पौलुस? सिरफ सेवक, ज़ासरै ज़ौरिऐ तुमुऐ परमेश्वरा माथै विश्वास कियौ, आमु हर एकीऐ तिणौ काम कियौ आ ज़िणौ परमेश्वरै कौरना लै सांबौ थौ। 6 अगर हाऊं डोखरै रौ औनैणै देइयौ सौमझ़ाऊ ता मुंइऐ बीज बौऔ, अपुल्लोसै सिंच़ाऔ पाणी कौरी, पर परमेश्वरै बौड़ाऔ। 7 एथीलै ना ता बौइणै वाल़ौ कुछ़ आ और ना सिंच़ाई कौरणै वाल़ौ, पर परमेश्वर ई सब कुछ़ आ ज़ो बौड़ाउणै वाल़ौ आ। 8 बौइणै वाल़ौ और सिंच़ाई कौरणै वाल़ौ दुइयौ एक ज़िणी सा। पर हर एक आदमी कौमाई कौरी आपणी ई परमेश्वरा कु आपणी मज़दुरी पा सा। 9 कैलैकि आमै परमेश्वरा रै साथी ई। तुमैं परमेश्वरा रै डोखरै और परमेश्वरा रै चाणै औन्दै। 10 परमेश्वरा री तिऐं बौड़ी दया रै ज़ौरिऐ ज़ो मुकै दैऔ औन्दौ, मुंइऐ बुद्धिमान राज़मिस्त्री री पौई पाई, और दुजौ तेथ माथै चिणाई कौरा आ। पर हर एक आदमी च़ोकसी दी रौइयौ कि सेऊ तेस माथै किणी चिणाई कौरा सा। 11 कैलैकि तिऐं पौई छ़ाड़ियौ ज़ो पौड़ी ऐन्दी आ, और सै पौई यीशु मसीह आ, कोई भी दुजी पौई नाईं पाई बौल़दौ। 12 अगर कुण इंऐ पौई माथै सुनौ या च़ाँदी या भौरी किमत्ती पात्थर या काठ या घासा भूसा री चिणाई कौरा, 13 ता सारै काम पौगड़ौ हुआई। कैलैकि सेज़ौ दीन तेसलै बोला, एथीलै कि आगी आइलै पौगड़ौ हुआ और सै आग हर एक काम परखा कि किणौ आ। 14 ज़ासरौ काम तेस माथै बौणीयौ टेकी रौआ, सेऊ मज़दुरी पा सा। 15 अगर कासरौ काम ज़ौल़ी जा लौ, ता सेऊ नुकसान उठावा लौ। पर सेऊ आपु पोरु बौच़ा लौ ज़ौल़दै-ज़ौल़दै। 16 का तुमैं नाईं ज़ाणदै कि तुमैं परमेश्वरा रै घौर आ, और परमेश्वरा रौ आत्मा तुमु भितै रौआ? 17 अगर कुण परमेश्वरा रौ घौर नाश कौरालौ ता परमेश्वर तेस नाश कौरा सा। कैलैकि परमेश्वरा रौ घौर पवित्र आ, और सेऊ घौर तुमैं ई। 18 अगर कुण आपुलै दुनिया रै लोगु री नौज़री दी ज्ञानी सौमझ़ा लौ, ता तुमै आपुलै मुर्ख बौणौ, ताकी तुमै परमेश्वरा री नौज़री दी सौच़्च़ी ज्ञानी बौणा। 19 कैलैकि एस धौतरी रै लोगु रौ ज्ञान परमेश्वरा काऐ मुर्खता सा, ज़िणौ पवित्रशास्त्रा दी आ लिखौ औन्दौ कि, “परमेश्वर ज्ञानिऊ तिऊं री च़ालाकी दी फौसावा सा,” 20 पवित्रशास्त्र इणौ भी बोला आ, “प्रभु ज्ञानिऊ रै बिच़ार ज़ाणा कि सै सब बेकार ई।” 21 एथीलै कासी भी खास लोगु माथै घमण्ड कौरणौ बन्द कौरा, कैलैकि परमेश्वरै सारी च़िज़ै तुमारी भौलाई लै देई गोई आ। 22 का पौलुस, का अपुल्लोस, का कैफा, का धौतरी, का ज़िन्दगी, का मौरण, का च़ालदै लागौ औन्दौ, का आशणै वाल़ौ, सारौ कुछ़ तुमारौ आ, 23 और तुमैं मसीह रै ई, और मसीह परमेश्वरा रौ आ। |
This work is licensed under Creative Commons Attribution-ShareAlike 4.0 License.