1 कुरि 16 - पहाड़ी महासुईविश्वासिऊ लै दाण 1 आबै हाऊं तुमारै तेस सवाला रै बारै दी ज़वाब दियाऊ ज़ो तुमुऐ पुछ़ौ थौ। तुमुऐ दाणा रै बारै दी पुछ़ौ थौ ज़ो यरुशलेमा दी रौइणै वाल़ै परमेश्वरा रै लोगु लै कौट्ठै कियौ थौ। ज़िणौ हुकम मुंइऐ गलातिया री कलिसिया लै दैऔ, तिणौ तुमै भी कौरौ। 2 हौफ्तै रै पैहलै दिनै तुमु मांझ़िया कु हर एक आपणी-आपणी आमदानी रै मुताबिक कुछ़ आपुकै छ़ाड़ा लै कि ज़ेबी हाऊं आशु लौ ता दाण ना जा लौ मांगणौ। 3 ज़ेबी हाऊं तुमु काऐ आशु लै, ता ज़ास तुमै च़ाहा ई तिऊं हाऊं चिट्ठी देइयौ भेज़ाऊ कि सै तुमारौ दाण यरुशलेमा दी पहुंच़ावा। 4 अगर मैरौ डेउणौ ज़ुरुरी हुआ लौ ता, सै मुं आइलै आशालै। पौलुसा रौ डेउणौ और काम कौरणौ 5-7 अगर प्रभु री इच़्छ़ा हुआ ली ता हाऊं तुमु आइलै लाम्बै बौगता लै रुका ऊ। पर आबै ज़ेबी हाऊं मकिदुनीया लै डेउलौ ता हाऊं तुमु आइलै नाईं ज़ादै बौगता झ़ाऊं नाईं रुकदौ। तिऐ डेउणै बासिऐ हाऊं तुमु काऐ आशाऊ। तैबै हाऊं कुछ़ बौगता लै या पुरै हिऊंदा दी तुमु आइलै रौआऊ। तेथ बासिऐ तुमै मुं मैरै आगलै सफरा दी भेज़ी सौका ई, सेऊ च़ाऊ किऐ भी औलौ। 8 पर हाऊं पिन्तेकुस्ता रै साज़ै झ़ांऊ इफिसुस शैहरा दी रौआऊ। 9 कैलैकि मुकै तिऐ असरदार काम कौरणै रौ बौड़ौ मौकौ आ। तिऐ मैरै विरोध कौरणै वाल़ै भौरी आ। 10 अगर तीमुथियुस तिऐ आशी जा लौ, ता तेस आइलै इज़्ज़ता कौरी बरताव कौरेऊ। कैलैकि सेऊ मुं ज़िणौ प्रभु रौ काम कौरा सा। 11 एथीलै कोई भी तेस बेकार ना ज़ाणालौ, पर तेस सही-सलामत एज़ी भिलै पहुंच़ाइयौ कि मुं काऐ आशा, कैलैकि हाऊं तेस पौखदै लागौ औन्दौ कि सेऊ विश्वासिऊ आइलै आशा। 12 साथी विश्वासी भाई अपुल्लोसा कु मुंइऐ भौरी औरज़ की आ कि तुमु काऐ विश्वासिऊ आइलै आशा। पर तिणीऐ एज़ै बौगतै डेउणा री कुछ़ भी इच़्छ़ा नाईं की, पर ज़ैबै ठीक बौगत औलौ तैबै सेऊ तुमु काऐ आशा लौ। आखरी हुकम और ढाल 13 च़ोकसिऐ रौएऊ, विश्वासा दी टेकी रौएऊ, हिम्मत वाल़ै बौणौ, विश्वासा दी मज़बूत रौ। 14 ज़ो कुछ़ तुमै कौरा ई तेस प्यारा कौरी कौरौ। 15 ओ मैरै प्यारै साथी विश्वासिउओ, तुमै स्तिफनुसा रै टौबर ता ज़ाणाई कि सै अखाया परदेशा री फौसली रै पैहलै विश्वासी ई, और परमेश्वरा रै लोगु री सेवा लै सौभी कु पैहलै तैयार रौआ ई। 16 एथीलै हाऊं तुमु कु औरज़ कौराऊ कि इणै लोगु रै अधीन रौ, यानी के हर एकी रै ज़ो एज़ै कामा दी मैहनती और साथ दिआई। 17 हाऊं स्तिफनुस और फूरतूनातुस और अखइकुस रै आशणै कु भौरी खुश ऊ, कैलैकि तिउंरी वज़ाह कु तुमारी कामी-घौटी पुरी हुई आ। 18 तिंउऐ मैरै और तुमारै मौना लै आराम दैऔ आ। एथीलै इणै लोगु री इज़्ज़त कौरौ। 19 आसिया परदेशा री कलिसियाऊ री तौरफा कु तुमुलै ढाल। अक्विला और तेसरी बोउटी प्रिसका रौ और तिंउरै घौरा री कलिसिया रौ भी तुमुलै प्रभु दी भौरी भौरी ढाल। 20 सारै विश्वासिऊ री तौरफा कु तुमुलै ढाल। आपु मांझ़िऐ गौल़ै मिलियौ ढाल कौरौ 21 मुंइऐ किणै बौड़ै-बौड़ै आखरु दी आपणै हाथा कौरी तुमुलै ढाल लिखौ आ। 22 अगर कुण प्रभु कु प्यार ना कौरालौ ता सेऊ शापित आ। ओ आमारै प्रभु, आश! 23 आमारै प्रभु यीशु री बौड़ी दया तुमु माथै औन्दै थाकाली लागी। 24 मैरौ प्यार मसीह यीशु दी तुमु सौभी आइलै बौणी रौआ। आमीन। |
This work is licensed under Creative Commons Attribution-ShareAlike 4.0 License.