1 कुरि 15 - पहाड़ी महासुई

मसीह रौ दुजी बारै ज़िउंदौ हुणौ

¹ ओ मैरै प्यारै साथी विश्वासिउओ, आबै हाऊं तुमुलै सेज़ी खुशी री खौबर याद कौरावा ऊ। ज़ो मुंइऐ पैहलै शुणाई एरी आ, ज़ेथ माथै तुमुऐ पैहलै विश्वास भी कौरौ थौ। ज़ेथाई तुमै टेकै औन्दै भी आ।

² परमेश्‍वरै तुमारौ तिऐं खुश खौबरी रै ज़ौरिऐ छ़ुटकारौ कियौ आ, अगर तुमै तेथ माथै विश्वास कौरा ई ज़ो मुंइऐ तुमुकै शुणाई थी। नाईं ता तुमारौ विश्वास कौरणौ बेकार हुऔ।

³ एज़ी वज़ाह कु मुंइऐ सौभी कु पैहलै तुमुकै सेज़ी खास बूश बोली, ज़ो मुकै प्रभु कु मिली थी। कि पवित्रशास्त्रा रै वचना रै मुताबिक यीशु मसीह आमारै पापा री ताइंऐ मौरी गौ आ,

⁴ और ओडाच़ी दी छ़ाड़ौ आ; और पवित्रशास्त्रा रै मुताबिक चिजै दिनै सेऊ परमेश्‍वरै ज़िउंदौ भी किऔ आ।

⁵ सेऊ पतरसा कै और सारै बारह च़ेलेऊ कै भी दिशौ आ।

⁶ तैबै सेऊ पांज़ शौआ कु ज़ादै च़ेलेऊ कै एकी बारै दिशौ आ, ज़ास मांझ़िया कु भौरी का इबी झ़ांऊ ज़िउंदै भी आ, पर कुछ़ गौऐ मौरी।

⁷ तैबै सेऊ याकुबा कै दिशौ और तैबै सारै प्रेरितु कै दिशौ आ।

⁸ हाऊं इणै तरिकै कौरी एक प्रेरित बौणौ, ज़ो एक भौरी अलग थौ।

⁹ कैलैकि हाऊं प्रेरिता मांझ़िऐ ज़ादौ खास नाईं थौ, यानी के प्रेरित बोलणै रै लायक भी नाईं आसतौ, कैलैकि मुंइऐ परमेश्‍वरा री कलिसिया रै विश्वासी सताऐ थै।

¹⁰ पर परमेश्‍वरा री बौड़ी दया री वज़ाह कु हाऊं प्रेरित ऊ भी। तेसरी बौड़ी दया ज़ो मुं माथै हुई, सेऊ बेकार नाईं हुऔ। पर मुंइऐ दुजै प्रेरितु कु बौड़ी-च़ौड़ियौ मैहनत भी की आ। तैबै भी एऊ सब मेरी तौरफा कु नाईं बल्कि परमेश्‍वरा री बौड़ी दया कु ज़ो मुं माथै थी।

¹¹ एथीलै च़ाऊ हाऊं आ, च़ाऊ दुजै प्रेरित औलै, आमै सारै यीशु मसीह रै बारै दी एका परचार कौरी ई, और एथीई माथै तुमुऐ भी विश्वास भी कियौ आ।

आमारौ दुजी बारै ज़िउंदौ हुणौ

¹² ता आबै हाऊं तुमु कु एक बूश पुछ़ाऊ: ज़ेबी कु मसीहा रौ परचार कौरा ई कि सेऊ मौरै औन्दै मांझ़िया कु ज़िउंदौ हुऔ आ, ता तुमु मांझ़िया कु केती इणौ बोलाई कि मौरै औन्दै रौ दुजी बारै ज़िउंदौ हुणौ आसतौ नाईं?

¹³ अगर मौरै औन्दै रौ दुजी बारै ज़िउंदौ हुणौ आसतौ नाईं, ता मसीह भी नाईं हुऔ ज़िउंदौ।

¹⁴ अगर मसीह ज़िउंदौ नाईं हुऔ, ता आमारौ परचार कौरणौ भी बेकार आ, और तुमारौ मसीह माथै विश्वास भी बेकार आ।

¹⁵ अगर आमुऐ परमेश्‍वरा रै बारै दी झ़ूठ बोलौ आ। कि तिणीऐ यीशु मसीह मौरै औन्दै मांझ़िया कु ज़िउंदौ कियौ; पर अगर मौरै औन्दै असली दी ज़िउंदै नाईं कौरीया थै, ता परमेश्‍वरै मसीह भी ज़िउंदौ नाईं कियौ।

¹⁶ हाऊं तौंइऐ बोलाऊ कि अगर मौरै औन्दै नाईं ज़िआ थै, ता मसीह भी नाईं हुऔ ज़िउंदौ।

¹⁷ और अगर मसीह ज़िउंदौ नाईं हुऔ, ता तुमारौ मसीह माथै विश्वास बेकार आ, और तुमै इबी झ़ांऊ आपणै पापा दी औआ थै ज़िन्दगी ज़िउंदै लागै औन्दै।

¹⁸ यानी कि ज़ो मसीहा दी मौरी गोऐ आ, सै भी खातम हुऐ।

¹⁹ अगर आमै सिरफ इऐं ज़िन्दगी लै मसीह कु आश छ़ाड़ी, ता आमै सारै लोगु कु ज़ादै बिण भागा रै ई।

²⁰ पर सौच़्च़ी यीशु मसीह मौरै औन्दै मांझ़िया कु ज़िउंदौ हुऔ आ और ज़ुण मौरी गौऐ तिऊं मांझ़िऐ एऊ पैहलौ फौल़ हुऔ आ।

²¹ कैलैकि ज़िणी एक आदमी रै ज़ौरिऐ मौत आशी मतलब आदमा कु, तिणी ई एकी आदमी रै ज़ौरिऐ मौरै औन्दै रौ दुजी बारै ज़िउंदौ हुणौ भी आशौ आ, मतलब यीशु कु।

²² और ज़िणौ आदमा दी सारै मौरा ई, तिणी ई मसीह दी ज़िउंदै भी हुआ,

²³ पर हर एक आपणी-आपणी बारिऐ पैहलौ फौल़ मसीह, और तेथ बासिऐ मसीह रै दुजी बारै आशणै बासिऐ तेसरै लोग।

²⁴ तैबै ज़ैबै यीशु मसीह सारौ राज़, और सारौ हक्क, और शक्ति रौ खात्मौ कौरीयौ सारौ राज़्य परमेश्‍वर बाबा रै हाथा दी सांभा लौ, तैबै इऐं दुनिया रौ खातमौ हुआ।

²⁵ इणौ ज़ुरुरी आ कि सेऊ सेज़ै बौगता झ़ाऊं राज़ कौरा ज़ेबी झ़ाऊं मसीह आपणै सारै दुश्मनु आपणै बांगणा थालिऐ ना कौरालौ।

²⁶ सौभी कु आखरी दुश्मन ज़ो खातम ज़ुरुरी आ कौरणौ, सेऊ मौत आ।

²⁷ पवित्रशास्त्र बोला आ कि, “परमेश्‍वरै सारौ कुछ़ यीशु रै अधीना दी देई गौ आ, एथकु साफ ज़ाहिर हुआ कि परमेश्‍वर एथदी शामिल नाईं आसतौ ज़ुणिऐ सारौ कुछ़ तेसरै अधीन की ऐरौ आ।

²⁸ और ज़ैबै सारौ कुछ़ तेसरै अधीना दी हुई जा लौ, ता छ़ोहरु भी आपु परमेश्‍वरा रै अधीना दी हुआ सा, ज़ुणिऐ सब कुछ़ तेसरै हाथा दी कियौ, ताकी सारेऊ दी परमेश्‍वर सब कुछ़ औलौ।”

²⁹ अगर दुजी बारै ज़िउंदौ हुणौ नाईं आसतौ ता तिऊंरौ का हुआ सा, ज़ेज़ै मौरै औन्दै लै बपतिस्मौ निआं ई? अगर मौरै औन्दै ज़िउंदै नाईं कौरींदै ता लोग तिउंलै बपतिस्मौ कैलै नियां ई?

³⁰ और आमै भी कैलै हर बौगतै मुसीबता दी पौड़ी थाका ई?

³¹ ओ मैरै प्यारै साथी विश्वासिउओ, मुलै तेस घमण्डा री कसम ज़ो आमारै प्रभु यीशु दी हाऊं तुमारै बारै दी कौराऊ, कि हाऊं रोज़-रोज़ मौउता रौ सामनौ कौराऊ।

³² अगर हाऊं आदमी री रीती माथै इफिसुसा दी ज़ांगल़ी जानवरु आइलै लौड़ौ ता मुलै का फाइदौ हुऔ आ? अगर मौरै औन्दै ज़िवा लै नाईं, “ता आशौ, खाई पीई लै, कालै ता इणी भी मौरी आ।”

³³ धोखै दी ना रौऔ, “बुरी खुम्बल़ी आच़्छ़ौ च़ाल-च़लण पोरु बिगाड़ा सा।”

³⁴ च़ोकसिऐ रौऔ और पाप कौरणौ पोरु छ़ाड़ौ, इणौ हाऊं तुमु बेशरम कौरना लै ऊ बोलदै लागौ औन्दौ। कैलैकि तुमु मांझ़िऐ कुछ़ लोग ता परमेश्‍वर ज़ाणदै नाईं।

दुजी बारै ज़िउंदै हुणै रौ शरीर

³⁵ आबै कुण इणौ बोली बौल़ा, मौरै औन्दै किणै ज़िउंदै हुआई? और किणौ हुआ तिऊंरौ शरीर?

³⁶ ओ बिणा औकली वाल़ेउओ! ज़ो कुछ़ तुमै बौआ ई ज़ेबी झ़ांऊ सेऊ माटै थाल मौरदौ नाईं तेबी झ़ाऊं सेऊ ज़ौमदौ नाईं।

³⁷ और ज़ो तू बौआ ई, सेऊ सेज़ौ शरीर नाईं ज़ो पैदौ हुणै वाल़ौ आ, पर बीजा रौ गुल़ौ आ, च़ाऊ गिवां रौ आ च़ाऊ केज़ै भी नाज़ा रौ आ।

³⁸ पर परमेश्‍वर आपणी मौरज़ी रै मुताबिक तेसलै शरीर दिआ सा, और हर एकी बीजा लै खास शरीर आ।

³⁹ सारौ शरीर एक ज़िणौ नाईं लोगु रौ कुछ़ ओर। गुन्डू रौ शरीर दुजौ आ, च़िड़ु-च़िटकोरु रौ ओर आ, और माच़्छ़ी रौ शरीर दुजौ।

⁴⁰ सौरगा रौ भी शरीर आ और धौतरी माथलौ भी शरीर आ। पर सौरगा रै शरीरा री च़ौमक कुछ़ ओर आ और धौतरी माथलै शरीरा री कुछ़ ओर।

⁴¹ सुरजा री च़ौमक कुछ़ ओर आ, और ज़ुना रौ कुछ़ ओर, और तारेऊ री च़ौमक कुछ़ ओर, (कैलैकि एकी तारै कु दुजै तारै रै च़ौमुकणा दी फर्क ऐ आ)

⁴² मौरै औन्दै रौ ज़िउणौ भी इणौ आ। शरीर भी नाश हुणौ री हालती दी ज़ाल़ियौ या दाबियौ इऐं धौतरी माथै बौआ, और सेऊ शरीर ज़ो दुजी बारै ज़िउंदौ हुऔ आ सेऊ नाश हुणै वाल़ौ नाईं आ।

⁴³ सेऊ शरीर बिणा इज़्ज़ती कौरी धौतरी दी बौ आ और तेज़ च़ौमक आइलै ज़िउंदौ हुऔ आ, कमज़ोर हुइयौ बौआ ई और शक्ति आइलै ज़िउंदौ हुऔ आ।

⁴⁴ सण्सारिक शरीर बौआ ई और आत्मिक शरीर ज़िउंदौ हुआ आ, ज़ैबै कि सण्सारिक शरीर आ, ता आत्मिक शरीर भी आ।

⁴⁵ ज़िणौ पवित्रशास्त्रा दी आ लिखौ औन्दौ कि “पैहलौ आदमी यानी की आदम ज़िउंदौ प्राणी बौणौ।” और आखरी आदम यानी कि यीशु मसीह ज़ुण आमुलै सौदा री ज़िन्दगी दिया आ।

⁴⁶ पर पैहलै आत्मिक नाईं थौ बल्कि सण्सारिक थौ, तेथ बासिऐ आत्मिक हुऔ।

⁴⁷ पैहलौ आदमी धौतरी कु यानी कि माटै रौ थौ बौणौ औन्दौ। और मसीह दुजौ आदमी ज़ुण सौरगा कु आशौ आ।

⁴⁸ ज़िणौ आदम माटै रौ थौ, तिणै सै भी आ ज़ो सण्सारा रै ई। और ज़िणौ मसीह सौरगा रौ आ, तिणै सै भी आ ज़ो आसमानी आ।

⁴⁹ और ज़िणौ आमुऐ तेसरौ रूप धारण कियौ आ ज़ो माटै रौ थौ तिणौ तेस सौरगा रै बाबा रौ रूप भी धारण कौरी आ।

⁵⁰ ओ मैरै प्यारै साथी विश्वासिउओ, हाऊं इणौ बोलाऊ कि मांस और लोऊ परमेश्‍वरा रै राज़ा दी नाईं डेई बौल़दै, और ना नाश हुणै वाल़ौ बिणा नाश हुणै वाल़ै रौ हक्कदार हुई बौल़दौ।

^51-52 हाऊं तुमुकै भेदा री बूश बोलाऊ, आमु मांझ़िया कु कुछ़ विश्वासी नाईं मौरदै, पर एकी घौड़ीऐ पलक झ़ौपकियौ, आखरी कौरनाल़ फुकरिंदै आमारै शरीर बौदलिणै ई। कौरनाल़ बाज़िणी आ, मौरै औन्दै ज़िउंदै हुइयौ केबी ना खातम हुणै वाल़ै बौणनै ई, और आमारै शरीर बौदलिणै ई।

⁵³ कैलैकि ज़रूरी आ कि नाश हुणै वाल़ौ शरीर केबी ना नाश हुणै वाल़ौ शरीर भीड़ा लौ, और एऊ मौरणै वाल़ौ शरीर अमर हुणै वाल़ौ शरीर भीड़ा लै।

⁵⁴ और ज़ैबै एऊ नाश हुणै वाल़ौ शरीर बिणा नाश हुणै वाल़ौ शरीर भिड़ी जा लौ और एऊ मौरणै वाल़ौ शरीर अमर हुणै वाल़ौ शरीर भिड़ी जा लौ, तैबै सेऊ वचन पुरौ हुआ आ, ज़ो पवित्रशास्त्रा दी यशायाह भविष्यवक्तै आ लिखौ औन्दौ कि,

⁵⁵ “ओ मौत, तेरी ज़ीत किऐ रौई आ? ओ मौत तैरौ डंक किऐ रौ आ?”

⁵⁶ मौउता रौ डंक पाप आ, और पापा री तागत नियम ई।

⁵⁷ पर परमेश्‍वरा रौ धन्यबाद च़ांई हुऔ, ज़ुण आमु आमारै प्रभु यीशु मसीह रै ज़ौरिऐ आमारै पाप और मौउता माथै ज़ितावा आ।

⁵⁸ एथीलै ओ मैरै प्यारै साथी विश्वासिउओ, विश्वासा दी मज़बूत और अटल रौ, और प्रभु रै कामा दी सौदा बौड़दै थाकौ लागी, कैलैकि आमै इणौ ज़ाणी आ कि तुमारी मैहनत प्रभु दी बेकार नाईं आसती।